استانا. 20 اقپان. تارازدا كۇكىرت قىشقىل تيەلگەن ۆاگوندار تەمىر جولدان شىعىپ كەتۋىنە بايلانىستى جەرگىلىكتى اۋقىمداعى توتەنشە جاعداي جاريالاندى. بۇل تۋرالى جامبىل وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ دەرەگىنە سىلتەمە جاساعان Kapital.kz حابارلادى.
«بۇگىن تاراز قالاسىنىڭ شايقۇرىق جانە بۋرىل ستانسالارى ارالاعىنداعى وندىرىستىك ايماق تەرريتورياسىنداعى تەمىر جول بولىگىندە كۇكىرت قىشقىلى قۇيىلعان 7 تەمىرجول جۇگى تسيستەرناسىنىڭ رەلستەن شىعىپ كەتىپ, ولاردىڭ 3-ءى ءبىر جاعىنا قاراي اۋدارىلىپ قالۋىنا بايلانىستى قالا اكىمى جەرگىلىكتى اۋقىمداعى توتەنشە جاعداي جاريالادى. وسىنىڭ سالدارىنان تسيستەرنالاردىڭ بىرىنەن ازداعان مولشەردە كۇكىرت قىشقىلىنىڭ توگىلۋ فاكتىسى ورىن الدى», - دەدى دەپارتامەنتتىڭ ءباسپاسوز حاتشىسى ساۋلە مۇڭاتاەۆا جۇما كۇنى.
ول سونداي-اق پويىزدىڭ رەسەي فەدەراتسياسىنان شىعىپ, جامبىل وبلىسىنىڭ اۋماعىنداعى «قازفوسفات» جشس مينەرالدى تىڭايىتقىشتار زاۋىتىنا كەلە جاتقانىن اتاپ ءوتتى. «پويىزدىڭ سوستاۆى 44 ۆاگوننان تۇرعان, ولاردىڭ 15-ندە كۇكىرت قىشقىلى بولعان», -دەپ حابارلايدى قازتاگ.
قازىرگى تاڭدا كۇكىرت قىشقىلى توگىلىپ, ب ۇلىنگەن جەردىڭ زالالىن كەتىرۋ ءۇشىن وعان اك توسەلىپ قويىلدى. جامبىل تەمىر جولى بولىمشەسىنىڭ 2 اپات-قالپىنا كەلتىرۋ پويىزىنىڭ كۇشىمەن كۇكىرت قىشقىلى توگىلگەن تسيستەرنا ساعات 14:15-كە دەيىن ورنىنان الىنىپ, زاۋىت ستانساسىنا كوميسسيانىڭ تەكسەرۋىنە جىبەرىلدى.
«اپاتتىڭ زارداپتارىن جويۋ جۇمىستارى ءالى جالعاسىپ جاتىر. وسى زارداپتاردى جويۋ جونىندەگى جۇمىستارعا باسشىلىق جاسايتىن شتاب قۇرىلدى», - دەپ حاباردار ەتتى س.مۇڭاتاەۆا.
وقيعا بولعان جەردە وبلىستىق توتەنشە جاعدايلار دەپارتامەنتىنىڭ جەدەل توبى, جەدەل-قۇتقارۋ جاساعى, «ءورت ءسوندىرۋ جانە اپات-قۇتقارۋ جۇمىستارى قىزمەتى», سونداي-اق وبلىستىق جانە قالالىق اكىمدىكتەر وكىلدەرى, وبلىستىق ىشكى ىستەر دەپارتامەنتى, قاۋىپسىزدىك كوميتەتى دەپارتامەنتى, تۇتىنۋشىلار قۇقىعىن قورعاۋ, وبلىستىق ەكولوگيا باسقارماسى, «قازفوسفات» جشس سەكىلدى ءتيىستى ۇيىمداردىڭ وكىلدەرى جۇمىس جاساپ جاتىر.
قۇربان بولعاندار مەن زارداپ شەككەندەر جوق.
قۇرىش نۇرىمبەت.