ارنايى مەملەكەتتىك جاردەماقىنى كىمدەر الادى؟

1999 جىلى ەنگىزىلگەن امج جۇيەسى ەلدەگى الەۋمەتتىك ساياساتتىڭ وزەكتى باعىتتارىنىڭ ءبىرى. قولدانىستاعى زاڭناما بويىنشا, جاردەماقى 17 ءتۇرلى ساناتقا جاتاتىن ازاماتتارعا بەرىلەدى. ولاردىڭ قاتارىندا:

ۇلى وتان سوعىسىنىڭ ارداگەرلەرى مەن وزگە ەلدەردەگى اسكەري ءىس-قيمىلدارعا قاتىسقاندار; ۇلى وتان سوعىسىنىڭ ارداگەرلەرىنە تەڭەستىرىلگەن ازاماتتار; ۇلى وتان سوعىسى كەزىندە قازا تاپقان جاۋىنگەرلەردىڭ ايەلدەرى مەن قازا تاپقان اسكەري قىزمەتكەرلەردىڭ وتباسى مۇشەلەرى; «حالىق قاھارمانى», «قازاقستاننىڭ ەڭبەك ەرى» اتاقتارىنا يە بولعاندار; تىل ەڭبەككەرلەرى; چەرنوبىل اتوم ەلەكتر ستانتسياسىنداعى اپاتتىڭ سالدارىن جويۋعا قاتىسقاندار; ساياسي رەپرەسسيالاردىڭ قۇرباندارى, مۇگەدەكتىگى بار ادامدار نەمەسە زەينەتكەرلەر; قازاقستان رەسپۋبليكاسى الدىنداعى ەرەكشە ەڭبەگى ءۇشىن زەينەتاقى تاعايىندالعاندار جانە باسقا دا ازاماتتار بار.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, جاردەماقى مولشەرى ازاماتتىڭ ساناتىنا قاراي ايلىق ەسەپتىك كورسەتكىشتىڭ (اەك) 2,13-تەن 138,63-كە دەيىنگى ارالىعىندا بەلگىلەنەدى. امج كولەمى جىل سايىن اەك وزگەرىسىنە سايكەس, رەسپۋبليكالىق بيۋدجەت تۋرالى زاڭعا ساي قايتا قارالادى.

ەگەر ازامات بىرنەشە سانات بويىنشا جاردەماقى الۋعا قۇقىلى بولسا, تولەم تەك ءبىر نەگىز بويىنشا, ونىڭ ءوز قالاۋى بويىنشا تاعايىندالادى.

ايتا كەتەيىك, ەل اۋماعىندا تۇراقتى تۇراتىن شەتەل ازاماتتارى مەن ازاماتتىعى جوق تۇلعالار دا بۇل تولەمگە قازاقستان ازاماتتارىمەن بىردەي قۇقىققا يە. امج راسىمدەۋ ءۇشىن ءوتىنىشتى eGov.kz پورتالى ارقىلى نەمەسە حالىققا قىزمەت كورسەتۋ ورتالىقتارى ارقىلى تاپسىرۋ جەتكىلىكتى.