بيىل «سالتانات» مەملەكەتتىك بي ءانسامبلىنىڭ قۇرىلعانىنا – 70 جىل. اتى اڭىزعا اينالعان ۇجىم حالقىمىزدىڭ بي ونەرىن الەمگە ايگىلەپ كەلەدى.
مەرەيتوي اياسىنداعى ماڭىزدى ءىس-شارا ءانسامبلدىڭ تاريحىنا ارنالعان كىتاپتىڭ تۇساۋكەسەرىمەن باستالدى. ۇجىمنىڭ قالىپتاسۋ كەزەڭى, شىعارماشىلىق ىزدەنىستەرى مەن جەتىستىكتەرى جان-جاقتى قامتىلعان جاڭا باسىلىمدى تانىستىرۋ راسىمىنە كومپوزيتور, ەۋرازيالىق مادەنيەت قورىنىڭ پرەزيدەنتى, اكادەميك ەرۇلان قاناپيانوۆ, «سالتانات» مەملەكەتتىك بي ءانسامبلىنىڭ ديرەكتورى ەلۋباي كەنجاليەۆ, ارداگەرلەر مۇحامەتراحىم ءداۋىتوۆ, قايرات مۇقانوۆ, مەتسەنات سابىرجان مولداحانوۆ, ونەر مايتالماندارى قاتىستى.
ۇلتتىق ونەردىڭ, رۋحاني بايلىقتىڭ, شەبەرلىك پەن شابىتتىڭ ورداسىنا اينالعان ۇجىمنىڭ مەرەكەسى قازاقستان حالقى اسسامبلەياسىنىڭ 30 جىلدىعىمەن ورايلاسىپ, الماتىتەاترىندا ەل «سالتاناتى» مەرەيتويلىق كونتسەرتىنە ۇلاستى. ساحنا تورىندە «التىناي» مەملەكەتتىك حالىق بي ءانسامبلى, رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى, مەملەكەتتىك قۇدىس قوجامياروۆ اتىنداعى ۇيعىر مۋزىكالىق كومەديا تەاترى, «باحار» بي ءانسامبلى, ءانشى ومىرقۇل اينيازوۆ, «دارىن» مەملەكەتتىك جاستار سىيلىعىنىڭ لاۋرەاتى, كۇيشى تاڭات سادەنوۆ, رەسپۋبليكالىق كونكۋرستاردىڭ لاۋرەاتى, ءداستۇرلى ءانشى جاينا تارعىنوۆا كەشتىڭ كوركىن قىزدىردى.
وسكەلەڭ ۇرپاقتى ونەرگە باۋلۋ, تۋعان ەلگە دەگەن سۇيىسپەنشىلىگىن ارتتىرۋ مەن ۇلتارالىق دوستىقتى نىعايتۋدى ماقسات ەتكەن مەرەكەلىك كەشتە «سالتانات» ءانسامبلى جانىنان قۇرىلعان فولكلورلىق انسامبل اۋەزدى ءان مەن كۇمبىرلەگەن كۇيدەن شاشۋ شاشسا, مىڭ بۇرالعان بيشىلەر ۇلتتىق جانە الەم حالىقتارىنىڭ ءبيىن سالت-ءداستۇردىڭ ورنەگىمەن استاستىرىپ, كورەرمەنىن ەرەكشە اسەرگە بولەدى.
«سالتانات» مەملەكەتتىك بي ءانسامبلى بيىل «بي كەرۋەنى» جوباسى اياسىندا تۇركىستان, اقتوبە, سولتۇستىك قازاقستان وبلىسىندا جانە شىمكەنت, تاراز قالالارىندا گالا-كونتسەرت, شەبەرلىك ساباقتارى مەن فوتوكورمە وتكىزدى. كاسىبي مامانداردىڭ شەبەرلىك ساباقتارىنا 1000-نان اسا حورەوگراف, بيشىلەر قاتىسىپ, ارنايى سەرتيفيكات تابىستالدى.
الماتى