استانا. 20 اقپان. ءالجيردىڭ پرەزيدەنتى ابدەلازيز بۋتەفليكا رەسەي پرەزيدەنتى ۆلاديمير پۋتينگە حات جولدادى. بۇل تۋرالى الجير پرەزيدەنتىنىڭ ارنايى وكىلى يۋسەف يۋسفي رەسەي سىرتقى ىستەر ءمينيسترى سەرگەي لاۆروۆپەن كەزدەسكەن كەزىندە ايتتى.
تاسس ءتىلشىسىنىڭ حابارلاۋىنشا, اراب مەملەكەتىنىڭ ەلشىسى وسى حاتتى جەتكىزۋ ءۇشىن ماسكەۋگە ارنايى كەلگەن. «مەنى الجير پرەزيدەنتى ابدەلازيز بۋتەفليكا ءوزى جازعان حاتتى رەسەي پرەزيدەنتى ۆلاديمير پۋتينگە تاپسىرۋىم ءۇشىن ماسكەۋگە جىبەردى. ءبىزدىڭ ەلدەرىمىز ساياسي جانە ەكونوميكالىق قارىم-قاتىناس تۇرعىسىندا جوعارى دەڭگەيدە, ول ودان ءارى دامىپ كەلەدى, مەن ءبىر جاعى وسىنى اۋىزشا جەتكىزۋ ءۇشىن دە كەلدىم», - دەدى الجيرلىك ەلشى.
سونىمەن بىرگە, يۋسفي: «الجير پرەزيدەنتى سىزدەردىڭ ەلدەرىڭىزبەن كوپتەگەن سۇراقتار اۋقىمىندا, سونىڭ ىشىندە الەمنىڭ كومىرسۋتەك رىنوگىنداعى جاعداي تۋراسىندا كەڭەسۋدى قاجەت دەپ تاۋىپ وتىر», - دەپ اتاپ ءوتتى.
لاۆروۆ ءوز كەزەگىندە ەكى جاقتىڭ ايماقتىق جانە حالىقارالىق اۋقىمدا كۇن تارتىبىندە تۇرعان ماسەلەلەر بويىنشا جاسالىپ كەلە جاتقان ىنتىماقتاستىعى قاناعاتتانارلىق ەكەنىنە توقتالدى. «ەكى جاقتى قارىم-قاتىناس وتە جوعارى دەڭگەيدە تۇر. ءبىز ءسىزدىڭ كەلۋىڭىز ارقىلى بۇل مۇمكىندىكتى جاقىن كەلەشەكتە بۇل ماسەلەلەردى ەكى جاقتى تۇرعىدا جانە حالىقارالىق دەڭگەيدە قالاي شەشەتىنىمىزدى تالقىلاي الاتىنىمىزعا قۋانىشتىمىز», - دەپ اتاپ ءوتتى رەسەي ءمينيسترى.
مۇرات ايتقوجا.