الداعى 30 جىلدا جۇرەك-قان تامىرلارى اۋرۋلارى سالدارىنان ءولىم سانى كۇرت وسەدى دەپ بولجانىپ وتىر. ساراپشىلار بۇل كورسەتكىشتىڭ الەم بويىنشا 36 ميلليونعا جەتۋى مۇمكىن ەكەنىن ايتادى, دەپ حابارلايدى Egemen.kz.
Oxford Academic سايتىندا جاريالانعان زەرتتەۋگە سايكەس, الداعى 30 جىل ىشىندە جۇرەك-قان تامىرلارى اۋرۋلارىنان بولاتىن ءولىم-ءجىتىم 73%-عا كوبەيىپ, 36 ميلليونعا جەتۋى مۇمكىن. 2022 جىلى بۇل كورسەتكىش 19,8 ميلليون ادامعا تەڭ بولىپ, الەمدەگى جالپى ءولىمنىڭ شامامەن ۇشتەن ءبىرىن قۇرادى.
ال, مۇگەدەكتىككە بەيىمدەلگەن ءومىر جىلدارى (DALY) بويىنشا جالپى اۋرۋ جۇكتەمەسىنىڭ 55%-عا ءوسۋى بولجانىپ وتىر. اسىرەسە, 2-ءتيپتى قانت ديابەتى بار ناۋقاستار اراسىندا سوزىلمالى جۇرەك جەتكىلىكسىزدىگى باستى ءولىم سەبەپتەرىنىڭ ءبىرى بولىپ سانالادى.
قازاقستاندا سوڭعى ونجىلدىقتا قان اينالىمى جۇيەسى اۋرۋلارىنىڭ تارالۋى ارتقانىمەن, پروفيلاكتيكا مەن كارديولوگيالىق ورتالىقتاردى دامىتۋ ارقاسىندا ستاندارتتالعان ءولىم-ءجىتىم شامامەن 37%-عا تومەندەگەن. بۇل كورسەتكىشتەر كارديولوگيالىق قىزمەتتىڭ تيىمدىلىگىن دالەلدەيدى.
«دەنساۋلىق» ۇلتتىق قاۋىمداستىعى زتب باسقارما توراعاسىنىڭ ورىنباسارى, دارىگەر گينتاۋتاس-يۋوزاس كەنترا جۇرەك-قان تامىرلارى اۋرۋلارىنىڭ ءوسۋى دارىگەرلەردى دە, قوعامدى دا الاڭداتىپ وتىرعانىن ايتتى. ونىڭ سوزىنشە, جۇرەك ساۋلىعىن ساقتاۋ جاستىق شاقتان باستالۋى قاجەت.
«سالماقتى باقىلاۋ, تەمەكىدەن باس تارتۋ, دەنە بەلسەندىلىگىن ارتتىرۋ, تۇراقتى تەكسەرۋدەن ءوتۋ جانە بۇيرەك جاعدايىنا كوڭىل ءبولۋ – وسى شارالار الداعى ونجىلدىقتاردا ميلليونداعان مەزگىلسىز ءولىمنىڭ الدىن الۋعا مۇمكىندىك بەرەدى», دەدى دارىگەر.