اتىراۋ وبلىسىندا قاراشا باستالعالى جەدەل رەسپيراتورلىق ۆيرۋستىق ينفەكتسيانى جۇقتىرۋ كورسەتكىشى ءوسىپ تۇر. ماسەلەن, 1–20 قاراشا ارالىعىندا جرۆي جۇقتىرۋعا بايلانىستى 32 مىڭنان استام دەرەك تىركەلدى.
وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسى ءاليا بەكەشەۆانىڭ ايتۋىنشا, تۇماۋ جۇقتىرعانداردىڭ باسىم بولىگى – 14 جاسقا دەيىنگى بالالار. ماۋسىمدىق تۇماۋدىڭ زەرتحانالىق راستالعان 17 جاعدايى انىقتالىپ وتىر. وسى كەزگە دەيىن 58 مىڭنان استام ادام ۆاكتسينا سالدىرعان.
وبلىستىق دەنساۋلىق ساقتاۋ باسقارماسىنىڭ باسشىسى قايسار ابداليەۆ ەمحانالارعا تۇماۋ سيمپتومىمەن ءبىر تاۋلىكتە 154 ادام قابىلداۋعا جۇگىنگەنىن ايتتى.
«ستاتسيونارلاردا 209 ناۋقاس جاتىر. ەم قابىلداۋشىلاردىڭ اراسىندا 126 بالا مەن 45 جۇكتى ايەل بار. وسىعان بايلانىستى وڭىردە قوسىمشا شارا قابىلداندى. تۇرعىنداردان تۇماۋ بەلگىلەرى بايقالسا, بىردەن مەديتسينالىق كومەككە جۇگىنگەنى ابزال», دەيدى قايسار ابداليەۆ.
اتىراۋ وبلىسىنداعى مەديتسينالىق مەكەمەلەردە 381 ينفەكتسيالىق توسەكتىك ورىن بار. ەمحانالارداعى فيلتر كابينەتى ساعات 08:00-20:00 ارالىعىندا جۇمىس ىستەيدى. ال ءموبيلدى بريگادالاردىڭ جۇمىس ۋاقىتى 22:00-گە دەيىن ۇزارتىلىپ وتىر. سونداي-اق وبلىستىق ينفەكتسيالىق اۋرۋحانادا قوسىمشا ءبىر دارىگەرلىك بەكەت اشىلدى.
اتىراۋ وبلىسى