سوڭعى بىرنەشە جىلدا ەلىمىزدە ۇكىمەتتىك ەمەس ۇيىمداردى قارجىلاندىرۋ كولەمى ەكى ەسەگە وسكەن. ۇلتتىق ستاتيستيكا بيۋروسىنىڭ دەرەگىنشە, وتكەن جىلى 28,1 مىڭ بەلسەندى ۇكىمەتتىك ەمەس ۇيىم جۇمىس ىستەگەن, دەپ جازادى Egemen.kz.
ۇەۇ ەلىمىزدىڭ بارلىق وڭىرىندە بار, بىراق ولاردىڭ سانى ايماقتاردا ءارتۇرلى. 2024 جىلى جۇمىس ىستەپ تۇرعان ۇيىمداردىڭ ۇشتەن ءبىرى استانا (4,1 مىڭ) مەن الماتىدا (5,3 مىڭ) شوعىرلانعان. سول سەبەپتى ۇەۇ-عا ارنالعان مەملەكەتتىك الەۋمەتتىك تاپسىرىستىڭ شامامەن 28%-ى ءدال وسى ەكى مەگاپوليسكە تيەسىلى بولدى.
ۇەۇ جوبالارىن قارجىلاندىرۋ كولەمى بويىنشا الماتى الدا. وتكەن جىلى قالاداعى ۇكىمەتتىك ەمەس سەكتور 6,1 ملرد تەڭگە كولەمىندە گرانت يگەردى. ايماقتاردىڭ كوپجىلدىق قارجىلىق ديناميكاسى تۇراقسىز بولعاندىقتان, ولاردى سالىستىرۋ قيىن.
مەملەكەتتىك قارجىلاندىرۋ كولەمى جاعىنان ەكىنشى ورىندا پاۆلودار وبلىسى (4,9 ملرد تگ) تۇر. سونداي-اق ۇزدىك بەستىككە استانا (3,3 ملرد تگ), قوستاناي (3,2 ملرد تگ) جانە اقتوبە (2,3 ملرد تگ) وبلىستارى كىردى. قارجىلاندىرۋ كولەمىندەگى ايىرماشىلىق وتە ۇلكەن. مىسالى, اباي وبلىسىندا وتكەن جىلى ازاماتتىق سەكتور جوبالارىنا نەبارى 330,7 ملن تەڭگە بولىنسە, ماڭعىستاۋدا 348,5 ملن تەڭگە, سولتۇستىك قازاقستاندا 420,3 ملن تەڭگە بولىنگەن. بۇل وڭىرلەردە الەۋمەتتىك ماسەلەلەر از دەگەندى بىلدىرمەيدى.
جالپى, 2024 جىلى مەملەكەتتىك الەۋمەتتىك تاپسىرىس اياسىنداعى قارجىلاندىرۋ 33,6 ملرد تەڭگەگە جەتىپ, ءبىر جىلدا 25,7%-عا, ال بەس جىلدا ەكى ەسەگە ارتتى.
ۇسب دەرەگىنە سايكەس, وتكەن جىلى ۇەۇ مەملەكەتتىك تاپسىرىس اياسىندا 2167 جوبا جۇزەگە اسىردى. گرانت سانى بويىنشا كوشباسشى قالالارعا قوستاناي جانە پاۆلودار وبلىستارى كىردى. جوبالاردىڭ 94%-ى قىسقا مەرزىمدى, ياعني ءبىر جىلعا عانا جوسپارلانعان. ۇزاقمەرزىمدى جوبالار سانى وتە از.
ۇەۇ نەگىزىنەن مەملەكەت وزەكتى دەپ تانىعان الەۋمەتتىك ماسەلەلەرمەن اينالىسادى. 2024 جىلى بارلىق جوبانىڭ شيرەگى الەۋمەتتىك وسال توپتارعا قولداۋ كورسەتۋگە باعىتتالدى (500 گرانت). بۇدان بولەك:
قوعامدىق كەلىسىمدى جانە ۇلتتىق بىرلىكتى نىعايتۋ – 227 گرانت;
جاستار ساياساتىن جانە بالالار باستامالارىن قولداۋ – 219 گرانت;
وتباسىلىق-دەموگرافيالىق جانە گەندەرلىك ماسەلەلەردى شەشۋگە جاردەمدەسۋگە 155 گرانت بولىنگەن.
قاراشا ايىندا قوعامدىق دامۋ ينستيتۋتى (قدي) مەملەكەتتىك تاپسىرىس اياسىنداعى ۇەۇ الەۋمەتتىك جوبالارىنىڭ تيىمدىلىگىنە ارنالعان زەرتتەۋ ناتيجەسىن جاريالادى. زەرتتەۋدە ۇەۇ وكىلدەرى مەملەكەتتىك تاپسىرىس كوبىنە ەسكىرگەن, وزەكتىلىگى تومەن تاقىرىپتار بويىنشا جاريالاناتىنىن ايتقان. ولار ۇەۇ ەكولوگيالىق ماسەلەلەردى, قوعامدىق ينفراقۇرىلىم مەن تكش كەمشىلىكتەرىن, جاستار اراسىنداعى دەۆيانتتى مىنەز-ق ۇلىقتى, مەكتەپتەگى بۋللينگتى, حالىقتىڭ قۇقىقتىق جانە قارجىلىق ساۋاتسىزدىعىن شەشۋگە كوبىرەك جۇمىلدىرىلۋى كەرەك دەپ سانايدى.