قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتى مەملەكەت قارجىسىن اسا ءىرى مولشەردە جىمقىرۋ دەرەگىن انىقتاپ, وعان قاتىسى بار تۇلعالاردىڭ زاڭسىز ارەكەتتەرىنىڭ جولىن كەستى, دەپ جازادى Egemen.kz.
تەرگەۋ ناتيجەسىندە بەلگىلى بولعانداي, قارماقشى اۋدانىنا قاراستى اقاي اۋىلىنداعى مەكتەپتىڭ باس ەسەپشىسى اينۇر ەراليەۆا وزىنە سەنىپ تاپسىرىلعان مەكتەپ ديرەكتورىنىڭ ەلەكتروندىق تسيفرلىق قولتاڭباسىن پايدالانا وتىرىپ, قىزمەتتىك وكىلەتتىگىن تەرىس پايدالانۋ ارقىلى مەكتەپ مۇعالىمدەرى م.ايجىگىت, ا.جارىقباەۆا, ج.وتەپبەرگەنوۆا, ا.نۇرمۇحانوۆا, گ.بايماعامبەتوۆا, گ.جومارتپەن الدىن الا ءسوز بايلاسىپ, بوتەننىڭ مۇلكىن اسا ءىرى مولشەردە جىمقىرعان.
باس ەسەپشىنىڭ سىبايلاسى ايبول تاۋپيقوۆ قىلمىستى ىسكە اسىرۋ كەزىندە كومەك كورسەتىپ, جىمقىرىلعان قارجىنى ءبولىسۋ مەن جاسىرۋعا جاردەمدەسكەن. ال اتالعان مۇعالىمدەر جىمقىرىلعان قاراجاتتى ءوزارا بولىسكەن. تەرگەۋ دەرەكتەرى بويىنشا, قىلمىستىق توپ 2022-2024 جىلدار ارالىعىندا مەملەكەتكە جالپى سوماسى 42 500 474 تەڭگە مولشەرىندە ماتەريالدىق زالال كەلتىرگەن.
سوت ۇكىمىمەن اينۇر ەراليەۆا قىلمىستىق كودەكستىڭ 189-بابىنىڭ 4-بولىگىنىڭ 2) تارماعى بويىنشا كىنالى دەپ تانىلىپ, 7 جىل مەرزىمگە باس بوستاندىعىنان ايىرۋ جازاسىنا كەسىلدى. الايدا سوت قك-ءنىڭ 74-بابىنىڭ 1-بولىگىنە سايكەس, سوتتالۋشىنىڭ كامەلەتكە تولماعان بالاسى 14 جاسقا تولماۋىنا بايلانىستى جازانىڭ ورىندالۋىن 5 جىل مەرزىمگە كەيىنگە قالدىردى. سونىمەن قاتار ول قارجى جانە بۋحگالتەرلىك ەسەپ سالاسىندا جۇمىس ىستەۋ قۇقىعىنان 10 جىل مەرزىمگە ايىرىلدى. جازاسىن قىلمىستىق اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەيدى. ايبول تاۋپيقوۆقا قك-ءنىڭ 63-بابى قولدانىلىپ, 7 جىل مەرزىمگە شارتتى جازا تاعايىندالدى. قالعان التى مۇعالىمنىڭ ارقايسىسىنا 2 جىلدان 2 جىل 4 ايعا دەيىن باس بوستاندىعىن شەكتەۋ جازاسى بەلگىلەندى.
اتالعان ءىس بويىنشا مەملەكەتكە كەلتىرىلگەن زالال سوتتالۋشىلاردان وندىرىلەدى.