بەكىرەنىڭ بابىن تاپقان

«حان بەكىرە 11» دەپ اتالاتىن اۋىل شارۋاشىلىعى وندىرىستىك كووپەراتيۆىنە بارعانىمىزدا كوزىمىزگە العاش تۇسكەنى ەكى باس­سەيندى تولتىرعان بەكىرە شاباعى بولدى. بۇرىن قۇقىق قورعاۋ سالاسىندا ەڭبەك ەتىپ, زەينەتكە شىققالى بالىق شارۋاشىلىعىن قولعا العان عالىمجان ناعيەۆ العاشقى تاجىريبەسىن تۇركىستان وبلىسىنداعى تولەبي اۋدانىندا باستاپتى.

وزگەلەرگە قاراعاندا بەكىرە وتە شىكامشىل بالىق. تابيعي ورتادا كوبەيۋى دە وڭاي ەمەس. ۋىل­دىرىق شاشۋىن ونشاقتى جىل كۇتەتىنىڭىز تاعى بار. سۋدا زياندى قوسپا كوبەيگەنى دە بۇل بالىقتىڭ بولاشاعىنا قاۋىپ. سوندىقتان بەكىرەنى جاساندى جولمەن ءوسىرۋ الدەقايدا ءتيىمدى.

«بۇرىنعى ارال بەكىرەسى قازىر كوزدەن بۇل-بۇل ۇشقالى دا جارتى عاسىردان اسىپ بارادى. مىنا باسسەيندەگىلەر كالۋگا مەن لەنا بەكىرەلەرى­نىڭ بۋدانىنان شىققان شاباق­تار. وسىلاردى جەرگىلىكتى سۋعا بەيىمدەپ, كوبەيتۋدى ماقسات ەتىپ وتىرمىن. ءبىز قازىر جەراس­تى ۇڭعىماسىنان الىنعان سۋدى بىرنەشە سۇزگىدەن وتكىزىپ بارىپ باسسەينگە قۇيعانىمىزبەن ونىڭ قۇرامىنا ءبارىبىر وزەن سۋى اسەر ەتەدى. بۇل بالىقتاردىڭ جەرگىلىكتى سۋعا بەيىمدەلۋىنە سەپ بولادى», دەيدى كاسىپكەر.

تاعى ءبىر ەرەكشەلىك – بالىق­تىڭ بۇل ءتۇرى وتە تازا بولادى. دەنەسى قۇرت, ميكروب قابىل­دا­مايدى. ولار­دا باسقا بالىقتار­داعى سياق­تى تىكەن بولمايدى, تەك شەمىرشەك بار. سويتە تۇرا, بالىقتار­دىڭ ىشىندەگى ءالسىزى دە وسى. شاباقتا­رىنىڭ سالماعى بەل­گىلى ءبىر مەجەدەن اسقاسىن عانا يم­مۋنيتەتى جوعارىلاي باستايدى.

وسىعان دەيىن ءدوڭماڭداي, سازان, اق امۋر ءوسىرىپ كورگەن كا­سىپكەر قازىر سىرتتان تورتا, ءتىستى جانە شورتانعا سۇرانىس ارتىپ وتىرعانىن ايتادى. سوندىقتان ەلدە بالىق شارۋاشىلىعىنا بەت بۇرعاندار كوپ. ايتسەدە, بۇل سالادا كورشى وزبەكستاننان كوپ كەيىن قالىپ وتىرمىز. ولار كەيىنگى جىلدارى جالپى اۋلانعان, شەتەلگە شىعارىلعان, جان باسىنا شاققانداعى كورسەتكىش بو­يىنشا بىزدەن كوش ىلگەرى تۇر. ءبىزدىڭ وڭىردە دە باستاماسى قولداۋ تاۋىپ, وسى ىسكە بەل شەشە كىرىسكەندەر از ەمەس. قالانىڭ اينالاسىندا, شيەلى اۋدانىندا سازان ءوسىرىپ وتىرعان ازاماتتار بار. قالا ىرگەسىنەن فورەل وسىرەتىن شارۋاشىلىق پايدا بولدى. جەرگىلىكتى اكىمدىك تە بار كومەگىن اياپ جاتقان جوق. وسىنداي قولداۋلار ناتيجەسىندە الداعى كووپەراتيۆ نىسانى ورنالاسقان كوشەگە تاس توسەۋ جوسپارلانىپ وتىر.

«بەكىرە وتە نازىك, سالماق جي­عانشا كوزدەن تاسا ەتپەۋىڭ كەرەك. وسى نىساندى سالۋعا از قارجى جۇمسالعان جوق. ارينە, جەرگىلىكتى اكىمدىك بارىنشا كومەك كورسەتىپ جاتىر. «Amanat» پارتياسىنىڭ «اۋىل اماناتى» جوباسىنا قاتىسۋ ءۇشىن قۇجات تا وتكىزىپ قويدىم. نەسيە قولىمىزعا تيسە اينالىمىمىزدى ۇلعايتىپ, ەلەكتر ەنەرگياسى مەن سۋدى قايتادان تازالاپ قۇيۋ ارقىلى ۇنەمدەۋگە مۇمكىندىك تۋار ەدى. قازىر وسىنداعى 6 مىڭعا جۋىق شاباققا باسسەيندەر تارلىق ەتىپ تۇر. بۇل ونىڭ وسىمىنە اسەر ەتەدى», دەيدى كاسىپ يەسى.

بۇل سالانى سۋبسيديالاۋدا تۇيتكىل كوپ. قارجىلاي قولداۋ­دى جاعدايى بار ءىرى شارۋاشى­لىقتاردان ەمەس, شاعىن سەرىكتەس­تىكتەردەن باستاعان ءجون ەدى. تاعى ءبىر ماسەلە – ەلىمىزدە بالىق جەمىن شىعاراتىن ءوندىرىس ورنى ساناۋلى. جەم ساپاسى بالىقتىڭ سالماق قوسۋىمەن باعالانادى. بۇل جاعىنان جەرگىلىكتى جەم سىرتتان كەلەتىن ونىممەن باسەكەلەسە المايتىنىن مويىنداۋىمىز كەرەك. مىسالى, الەمگە تانىمال برەند «اللەر اكۆانىڭ» كيلوسى 1 250 تەڭگەدەن باستالادى. ءبىزدىڭ بالىقشىلار قىمبات بولسا دا سونى الۋعا ءماجبۇر. شەتەلدەن شىعاتىن وسىنداي ونىمدەرگە كەدەندىك تولەمدى ازايتىپ, باعاسى وزىندىك قۇنىنان كوپ كوتەرىلمەسە بالىقشىلار ءۇشىن ۇلكەن قولداۋ بولار ەدى.

«حان بەكىرە 11» اۋىل شا­رۋاشىلىعى وندىرىستىك كووپە­راتيۆىنە دە «اتامەكەن» كاسىپ­كەرلەر پالاتاسى, «بايقوڭىر» الەۋمەتتىك كورپوراتسياسى, جەر­گىلىكتى اكىمدىك تاراپىنان جاردەم جاسالىپ جاتىر. اۋىل اكىمدىگى مەن ەلەكتر جەلىسىن تاراتۋ مەكەمەلەرىنىڭ كومەگىمەن ءبىراز ماسەلە شەشىمىن تاپقان. كاسىپكەر الدا كۇن پانەلدەرى ارقىلى ەلەكتر جارىعىن الۋدى جوسپارلاپ وتىر. بەكىرەنىڭ بابىن تاپقان كاسىپكەر ايماقتا بالىق شارۋاشىلىعىنىڭ باسەكەگە قابىلەتتى سالاعا اينالارىنا سەنەدى.

قىزىلوردا