پەتروپاۆل. 20 اقپان. سولتۇستىك قازاقستان وبلىسىنىڭ دەلەگاتسياسى تۇمەن وبلىسىندا بولىپ, بىرقاتار مەموراندۋمدارعا قول قويدى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى.
قىزىلجار ءوڭىرىنىڭ باسشىسى ەرىك سۇلتانوۆ پەن تۇمەن وبلىسىنىڭ گۋبەرناتورى ۆلاديمير ياكۋشەۆتىڭ كەزدەسۋىنە ەكى تاراپتان بيزنەس سالاسىنىڭ وكىلدەرى, ءىرى كاسىپورىن باسشىلارى قاتىستى. ۆ.ياكۋشەۆ وبلىستار اراسىنداعى سىرتقى ساۋدا اينالىمى 132,5 ميلليون اقش دوللارىن قۇرايتىنىن, سوڭعى كەزدەرى كاسىپكەرلىك ىنتىماقتاستىقتىڭ كۇرت ارتقانىن جەتكىزدى. ە. سۇلتانوۆ ءوز سوزىندە قازاقستاندا جاڭا جۇمىس ورىندارىن قۇرۋ, ينۆەستيتسيالار تارتۋ باعىتىنداعى تاجىريبەلەرمەن ءبولىستى. ەل ەكونوميكاسىنا قارجى تارتۋدىڭ ءتيىمدى تۇستارىن اتاپ, بىرىگىپ جۇمىس ىستەۋگە شاقىردى.
دەلەگاتسيا بۇدان كەيىن الەمنىڭ 26 ەلىنەن كەلگەن ءىى حالىقارالىق ينۆەستيتسيالىق فورۋمعا قاتىستى. وندا قازاقستاننىڭ قازىرگى قارقىندى دامۋى جايلى جىلى پىكىرلەر ايتىلدى. ماسەلەن, «وپورا روسسي» قوعامدىق ۇيىمنىڭ پرەزيدەنتى الەكساندر كالينين ەلىمىزدە قالىپتاسقان ەكونوميكالىق تۇراقتىلىقتى جوعارى باعالادى.
ءىرى كاسىپورىنداردى ارالاۋ بارىسىندا الدىمەن انتيپينسك مۇناي وڭدەۋ زاۋىتىنا سوقتى. مۇندا وندىرىلەتىن «قارا التىننىڭ» ساپاسى ەۋرو-5 ستاندارتىنا سايكەس كەلەدى. بيىلدىڭ وزىندە عانا 143 ميلليارد رۋبل ينۆەستيتسيا قۇيىلىپتى. كۇنىنە 38 توننا نان-توقاش پىسىرەتىن نان كومبيناتى قۋاتتىلىقتى ءۇش ەسەگە ارتتىرۋدى مەجەلەپ وتىر. مەديتسينا قالاشىعى قۇرامىنا ەنەتىن كلينيكالىق اۋرۋحانا مەن نەيروحيرۋرگيا ورتالىعىندا جىلىنا ەكى مىڭنان استام وتا جاسالاتىن كورىنەدى.
ەكى كۇنگە سوزىلعان ساپار سوڭىندا 10 مەموراندۋمعا قول قويىلدى. قوس تاراپ ۇلتارالىق قارىم-قاتىناس سالاسىن نىعايتۋعا دا ۋاعدالاستى.
ءومىر ەسقالي.
دەرەك: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.
سۋرەت: ura.ru.