اتىراۋ. 19 اقپان. اتىراۋ وبلىسىنا جاپونيانىڭ ىسكەر توبى قۇرامىندا وندىرىستىك, قارجىلىق جانە ساۋدا-ساتتىق قۇرىلىمدارىنىڭ وكىلدەرى كەلدى. بۇل تۋرالى egemen.kz ءتىلشىسى حابارلادى.
جاپوندىق ىسكەر توپ وكىلدەرىن باستاپ كەلگەن روبوتو قاۋىمداستىعى ديرەكتورىنىڭ ورىنباسارى ميكي ۆادزيمانىڭ ءمالىم ەتۋىنشە, ولاردى ەكونوميكانىڭ ناقتى سەكتورى قىزىقتىرادى. سونىڭ ىشىندە مۇناي-حيميا سالاسىنا باسىمدىق بەرىلەتىندىگى اڭعارىلدى. جالپى, بۇل ەلدىڭ وسى زامانعى جاڭا تەحنولوگيالاردى ويلاپ تابۋ, قۇراستىرۋ تاجىريبەسى باي. الداعى ۋاقىتتا جاپوندىق عالىمدار دايىنداعان ەنەرگيا ۇنەمدەيتىن تەحنولوگيالار قازاقستاندا تانىستىرىلاتىنعا ۇقسايدى.
اتىراۋ وبلىسىنىڭ اكىمى باقتىقوجا ىزمۇحامبەتوۆ جاپوندىق ىسكەر توپ وكىلدەرىنە جەر استى سۋلارىن تۇششىتۋ, قوي جانە تۇيە جۇندەرىنەن كيىم تىگۋ جانە كۇن ەنەرگياسىن ءوندىرۋ جوبالارىنا جاپوندىق تەحنولوگيالاردى قولدانۋ جونىندەگى ۇسىنىسىمەن ءبولىستى. بىرلەسكەن كاسىپورىن قۇرۋ ىقتيمالدىعى دا تالقىلاندى.
جولداسبەك شوپەعۇل.
دەرەك:egemen.kz.
سۋرەت: «اتىراۋ» گازەتى.