پرەزيدەنت جانىنداعى ورتالىق كوممۋنيكاتسيالار قىزمەتىندە حالىقارالىق Silk Way Star ۆوكالدىق كونكۋرسى گراند-فينالىنىڭ قورىتىندىسىنا ارنالعان ءباسپاسوز كونفەرەنتسياسى ءوتتى, دەپ حابارلايدى Egemen.kz.
بۇل – 12 ەلدىڭ ونەرپازدارىن بىرىكتىرگەن العاشقى ازيالىق مەگاجوبا.
بريفينگكە قاتىسقان سپيكەرلەر:
– ەركەجان كۇنتۋعان, «Jibek Joly / Silk Way» تەلەارناسىنىڭ باسقارۋشى ديرەكتورى;
– ميشەل جوزەف, Silk Way Star جوباسىنىڭ جەڭىمپازى (موڭعوليا);
– ۆان دەلۋ, CMG ەۋرازيالىق بيۋروسىنىڭ باس رەداكتسيا مەڭگەرۋشىسى;
– حۋن بين, قازىلار القاسىنىڭ مۇشەسى (قىتاي);
– شين مين چول, قازىلار القاسىنىڭ مۇشەسى (كورەيا);
– داتو دانيا, قازىلار القاسىنىڭ مۇشەسى (مالايزيا).
ۇيىمداستىرۋشىلار حالىقارالىق قازىلار القاسىنىڭ باعالارى مەن كورەرمەندەر داۋىس بەرۋىنىڭ ناتيجەسىن ۇسىندى. داۋىس بەرۋگە ءتۇرلى ەلدەردەن 508 287 ادام قاتىستى, بۇل ايماقتاعى ۆوكالدىق تەلەجوبا ءۇشىن ەڭ جوعارى كورسەتكىشتەردىڭ ءبىرى جانە بايقاۋعا دەگەن حالىقارالىق قىزىعۋشىلىقتىڭ ايقىن دالەلى.
فينالداعى ورىندار ارالاس جۇيە بويىنشا انىقتالدى: 50% – كورەرمەن داۋىسى, 50% – قازىلار القاسىنىڭ باعاسى.
– Silk Way Star ازيانىڭ مادەني الۋان تۇرلىلىگىن توعىستىرعان الاڭعا اينالدى. جوبا مۋزىكا ەلدەر اراسىنداعى ءوزارا تۇسىنىستىكتى تەرەڭدەتىپ, ديالوگقا مۇمكىندىك بەرەتىنىن كورسەتتى. كورەرمەندەردىڭ بەلسەندىلىگى وڭىردە حالىقارالىق فورماتقا دەگەن قىزىعۋشىلىقتىڭ جوعارى ەكەنىن دالەلدەيدى, – دەدى ەركەجان كۇنتۋعان.
كورەرمەن داۋىس بەرۋىنىڭ قورىتىندىسى:
– ميشەل جوزەف (موڭعوليا) – 112 241 داۋىس
– مادينابونۋ ادىلوۆا (وزبەكستان) – 85 443
– چجان حە سيۋان (قىتاي) – 73 662
– يازمين ازيز (مالايزيا) – 73 609
– سارو گەۆورگيان (ارمەنيا) – 73 160
– اۆتانديل ابەسلاميدزە (گرۋزيا) – 46 027
– ALEM (قازاقستان) – 32 145
بارلىعى 43 ەلدىڭ ازاماتتارى ءوز فاۆوريتتەرىنە داۋىس بەردى. ەڭ كوپ داۋىس قازاقستان, قىتاي, موڭعوليا, اقش, رەسەي, تۇركيا, گەرمانيا, سينگاپۋر, يندونەزيا, وزبەكستان, گرۋزيا جانە مالايزيادان كەلدى.
جوبانىڭ فينالى قازاقستاندا Jibek Joly تەلەارناسىندا تىكەلەي ەفيردە كورسەتىلدى. سونىمەن قاتار, قىرعىزستاندا «مۋزىكا» جانە «مادانيات», ازەربايجاندا Space TV, تاجىكستاندا تۆ سافينا, موڭعوليادا UBS جانە AIST GLOBAL ارنالارىنان پاراللەل ەفيرلەر ۇيىمداستىرىلدى. بارلىعى فينالدى الەم بويىنشا تۆ مەن ستريمينگتىك سەرۆيستەردە شامامەن 120 ملن كورەرمەن تاماشالادى.