اتىراۋ. 19 اقپان. اتىراۋ وبلىسىنىڭ اكىمى باقتىقوجا ىزمۇحامبەتوۆ حالىق الدىنداعى ەسەپ بەرۋ جيىنىندا ەكسترەميزمدى ناسيحاتتاعان 16 جاستاعى ءجاسوسپىرىمنىڭ ءىسى سوتتا قارالىپ جاتقانىن ءمالىم ەتتى. بۇل تۋرالى egemen.kz حابارلادى.
«تەرىس ءدىني اعىمداردىڭ جەتەگىندە جۇرگەن جاستاردىڭ قاي جاعىنان دا ساۋاتسىز, ءتىپتى نادان ەكەنىن كورىپ وتىرمىز. كوپشىلىگىنىڭ ماماندىعى جوق, ءبىلىمى مەكتەپپەن شەكتەلگەن. ەكسترەميزمدى ناسيحاتتاپ جۇرگەن ءبىر بالانىڭ ءىسى قازىر سوتتا قارالىپ جاتىر. جاسى ون التىدا. ەكى ايەلى بار. ءبىرىنشى ايەلى ءۇشىنشى بالاسىن بوسانايىن دەپ وتىر. اناسىمەن ارالاسپايدى», دەپ ءمالىم ەتتى وبلىس اكىمى باقتىقوجا ىزمۇحامبەتوۆ.
بىلتىر جاستاردى تەرىس اعىمدار جەتەگىنە ەرۋدەن ساقتاندىرۋ ماقساتىندا 66 مىڭ دانا اقپاراتتىق ماتەريال تاراتىلىپتى. بۇعان قوسا 161 مىڭ ادامنىڭ قاتىسۋىمەن 1 200-گە جۋىق ءىس-شارا ۇيىمداستىرىلىپتى.
جولداسبەك شوپەعۇل.
دەرەك:egemen.kz.
سۋرەت: adyrna.kz.