قاراجال قالاسىندا №3 ءورت ءسوندىرۋ ءبولىمى اشىلىپ, سالتاناتتى جيىنعا توتەنشە جاعدايلار ءمينيسترى شىڭعىس ءارىنوۆ پەن ۇلىتاۋ وبلىسىنىڭ اكىمى داستان رىسپەكوۆ قاتىستى.
جاڭادان اشىلعان ءبولىم زاماناۋي ءورت ءسوندىرۋ تەحنيكالارىمەن تولىق جابدىقتالعان. عيماراتتا قىزمەتكەرلەردىڭ جۇمىس ىستەۋىنە, جەدەل ارەكەت ەتۋىنە قولايلى جاعداي جاسالعان.
– جاڭا ءورت ءسوندىرۋ ءبولىمى – جوعارى تالاپتارعا ساي زاماناۋي بازا. ءبىز جۇيەمىزدى جەتىلدىرۋدى, قۇتقارۋشىلارعا لايىقتى جاعداي جاساۋدى جالعاستىرامىز. قالالار مەن اۋىلدارعا بىردەي, تەڭ جاعداي قالىپتاستىرىپ جاتىرمىز, سوندا ءاربىر تۇرعىن ۋاقىتىلى جانە كاسىبي كومەك الادى, – دەدى توتەنشە جاعدايلار ءمينيسترى.
ۇلىتاۋ وبلىسى اكىمى داستان رىسپەكوۆ ازاماتتاردىڭ اماندىعى مەن تىنىشتىعىن ساقتاۋ باعىتىندا اتقارىلىپ جاتقان ءىس جالعاسىن تاباتىنىن ايتتى. جىل سوڭىنا دەيىن وبلىستىڭ جەزقازعان, ساتباەۆ قالالارىندا دا جاڭا نىسانداردىڭ اشىلۋىنا كۋا بولامىز دەپ جوسپارلاپ وتىرعانىن جەتكىزدى.
ءىس-شارا بارىسىندا قاراجال قالاسىنىڭ اكىمى ايقىن ەلەۋسىزوۆ مينيسترلىكتىڭ «ازاماتتىق قورعاۋ جۇيەسىن دامىتۋعا قوسقان ۇلەسى ءۇشىن» توسبەلگىسىمەن ماراپاتتالدى. ال اشىلۋ راسىمىنەن كەيىن ءىس-شاراعا قاتىسۋشىلار جاڭا نىسان اۋلاسىندا شىرشا اعاشىن وتىرعىزدى.
ۇلىتاۋ وبلىسى