الەۋمەتتىك جەلىدە الماتىداعى №29 بالاباقشا اسحاناسىندا تاراقاندار قاپتاپ جۇرگەن بەينەجازبا تاراعاننان كەيىن مەكەمەگە بىردەن تەكسەرىس جۇرگىزىلدى. قالالىق ءبىلىم باسقارماسى تەكسەرىستىڭ ناتيجەسىن ءمالىم ەتتى, دەپ حابارلايدى Egemen.kz.
اۋەزوۆ اۋدانىنىڭ سانيتارلىق-ەپيدەميولوگيالىق قىزمەتى جۇرگىزگەن تەكسەرۋ ناتيجەسى بويىنشا, بالاباقشادا بىرقاتار سانيتارلىق تالاپتاردىڭ بۇزىلعانى انىقتالىپ, مەكەمەنىڭ جۇمىسى بارلىق كەمشىلىكتەر تولىق جويىلعانعا دەيىن توقتاتىلدى.
«مەكتەپكە دەيىنگى ۇيىم ىشىندە دەزينفەكتسيالاۋ جانە جاعدايدى سانيتارلىق تالاپتارعا سايكەستەندىرۋ بويىنشا كەشەندى شارالار جۇرگىزىلىپ جاتىر», دەلىنگەن حابارلامادا.
بۇلدىرشەندەر ۋاقىتشا قالاداعى باسقا بالاباقشالارعا جىبەرىلدى. مەكەمە تەك سانيتارلىق تالاپتارعا تولىق ساي كەلىپ, ءتيىستى ورگانداردان رۇقسات العاننان كەيىن عانا قايتا اشىلادى.
ءبىلىم باسقارماسىنىڭ مالىمەتىنشە, بالاباقشادا دەزينفەكتسيا مەن دەراتيزاتسيا قىزمەتتەرى «وندىرىستىك كووپەراتيۆ» جشس-مەن جاسالعان كەلىسىمشارت اياسىندا جۇيەلى تۇردە جۇرگىزىلىپ كەلگەن. الايدا بالاباقشا ماڭىنداعى قوقىس جاشىكتەرىنىڭ ورنالاسۋى جاندىكتەردىڭ كوبەيۋىنە تۇرتكى بولۋى مۇمكىن ەكەنى دە ايتىلدى.