ارتىنا اداستىرمايتىن ءىز, ويعا تۇيەر ءسوز, باعىت-باعدار بەرەتىن جول قالدىرعان پاراساتى مول ازامات, عۇلاما عالىم تۋرالى ءسوز قوزعاۋ – قيىن, وي تولعاۋ – اۋىر. ەلىمىزدە كاسىپتىك ءبىلىم بەرۋدىڭ جاڭاشا جولىن اشىپ, عىلىمي تۇردە نەگىزىن سالعان جانە سونى ءىس جۇزىندە جۇزەگە اسىرعان پراگماتيك عالىمنىڭ ءبىرى دە بىرەگەيى – بولات ابدىكارىم ۇلى. ءماندى دە ماعىنالى ءومىرىن ەلىنە, حالقىنا, جاس ۇرپاققا ءبىلىم بەرۋ ىسىنە قالتقىسىز ارناعان, مەملەكەتشىل, حالىقشىل بوكەڭ قازىر ارامىزدا جوق, جارىق دۇنيەدەن ماڭگىلىك دۇنيەگە كوشكەنىنە ءبىر جىل ۋاقىت بولىپ قالدى. راس, «جاقسىنىڭ اتى, عالىمنىڭ حاتى ولمەيدى» دەگەنگە تاعى دا كوزىمىز جەتىپ وتىر. بولات ابدىكارىم ۇلى سياقتى عاسىر ارالاتىپ تۋاتىن تۇلعانى بۇگىنگى جانە ودان كەيىنگى ۇرپاقتىڭ ساناسىنا ءسىڭىرۋ – پارىز. سوندىقتان, ۇلتتىق پەداگوگيكانىڭ تارلانى, كاسىپتىك ءبىلىمنىڭ مايتالمانى تۋرالى ءسوز قوزعاۋ قيىن بولسا دا قولعا قالام, وي تولعاۋ اۋىر بولسا دا مويىنعا جاۋاپكەرشىلىك الدىق.
بولات ابدىكارىم ۇلىنىڭ سوڭعى قىرىق جىلعا جۋىق ومىرىنە كۋا بولدىم. كاسىبي سالاعا, لاۋازىمدىق قىزمەتتەرگە, ءتىپتى ازاماتتىق قارىم-قاتىناستارعا بايلانىستى ەتەنە جاقىن ارالاسۋعا, ەمەن-جارقىن پىكىر الىسۋدىڭ ءساتى ءتۇستى.
مەنىڭ ەڭبەك جولىم ءوزىمنىڭ زامانداستارىم سەكىلدى بالاڭ كەزىمدە-اق اۋىلدىڭ جىل ون ەكى اي بويى بىتپەيتىن قىم-قۋىت ءتىرلىگىمەن باستالدى. ودان سوڭ دا تەمىر يندۋستريالدىق-پەداگوگيكالىق تەحنيكۋمىندا ەڭبەكتەن قول ۇزگەنىم جوق. وسى ارناۋلى وقۋ ورنىندا وقي ءجۇرىپ, دەنە تاربيەسى جۇمىستارى بويىنشا جەتەكشى بولدىم جانە ساباق بەردىم. ستيپەنديامەن قوسا ايلىق الىپ ءجۇردىم. وسىلايشا, كاسىپتىك-تەحنيكالىق ءبىلىمدى وقىتۋ ۇردىستەرىنە تەرەڭ بويلادىم.
وتكەن عاسىردىڭ 70-ءشى جىلدارىنىڭ باسىندا اسكەر قاتارىنداعى قىزمەتتەن ورالعاننان كەيىن اقتوبە قالاسىنداعى كاسىپتىك-تەحنيكالىق ۋچيليششەلەردە مۇعالىم, وندىرىستىك وقىتۋ شەبەرى, ديرەكتوردىڭ ورىنباسارى, ارناۋلى كاسىپتىك وقۋ ورنىنىڭ ديرەكتورى قىزمەتتەرىن اتقاردىم. ورايى وسىلاي كەلىپ, مەنىڭ تاعدىرىم كاسىپتىك بىلىممەن, وسى جولدا ءبىلىم الىپ جۇرگەن جاستارمەن تىعىز بايلانىستى بولدى. ال 1977 جىلى وبلىستىق كاسىپتىك-تەحنيكالىق ءبىلىم بەرۋ باسقارماسى باستىعىنىڭ ورىنباسارى بولىپ تاعايىندالدىم. جاستىق شاق, ءوز سالامدا جىلت ەتكەن جاڭالىقتىڭ ءبارىن دە قامتىپ قالۋعا, ۇيرەنىپ الۋعا قۇشتارلىق باسىم. باسقا رەسپۋبليكالاردىڭ كاسىپتىك ءبىلىم بەرۋ سالاسىندا بولىپ جاتقان وزگەرىستەرگە, جاڭاشىل باستامالارعا ەلتىپ, ەلەڭدەپ جۇرگەن كەز.
سول كەزدە وزىق دەپ تانىلعان جەزقازعاندىق تاجىريبەمەن جاقىن تانىسىپ, وزىعىن كورۋ ءۇشىن جەزقازعانعا ارنايى بارىپ, بولات ابدىكارىم ۇلىنىڭ قابىلداۋىندا بولدىم. تۋمىسىنان پەداگوگ بولىپ جاراتىلعان ۇستاز كاسىپتىك-تەحنيكالىق ءبىلىمنىڭ مەملەكەتتىڭ الەۋمەتتىك-ەكونوميكالىق دامۋىنداعى ەرەكشە ورنى, بۇل سالانى ودان ءارى دامىتۋ, جەتىلدىرۋ جولدارى, وقۋ-ادىستەمەلىك باعدارلامالار مەن تۇجىرىمدامالار تۋرالى بايسالدى اڭگىمە قوزعادى. سوسىن وبلىستاعى كاسىپتىك-تەحنيكالىق وقۋ ورىندارىنىڭ ماتەريالدىق-تەحنيكالىق, وقىتۋ بازاسىمەن, وقۋشىلاردىڭ تۇرمىسىمەن تانىستىردى. مەن بۇدان بۇرىن ماجارستاندا بولىپ, ولاردىڭ كاسىپتىك ءبىلىم بەرۋدەگى جەتىستىكتەرىن كورگەنمىن. بىراق بولات ابدىكارىم ۇلىنىڭ, جەزقازعاندىق ارىپتەستەردىڭ جاڭا, نەعۇرلىم ءتيىمدى ادىستەمەلەرى مەنى تاڭعالدىردى.
جەزقازعان وبلىستىق كاسىپتىك-تەحنيكالىق ءبىلىم بەرۋ باسقارماسىندا ون جىل ەڭبەك ەتىپ, سالانى دامىتۋدىڭ بۇرىن-سوڭدى بولماعان تاجىريبەسىن قالىپتاستىرعان بوكەڭدى ۇكىمەت ورتالىق اپپاراتقا اۋىستىردى. قازاق كسر كاسىپتىك-تەحنيكالىق ءبىلىم بەرۋ جونىندەگى مەملەكەتتىك كوميتەت توراعاسىنىڭ ءبىرىنشى ورىنباسارى قىزمەتىندە بولات ابدىكارىم ۇلىنىڭ دارىنى, ۇيىمداستىرۋ شەبەرلىگى مەملەكەتتىك جانە حالىقارالىق دەڭگەيدە بۇرىنعىدان دا اشىلا ءتۇستى.
بولات ابدىكارىم ۇلى نەگىزىن قالاعان قازاقستاندىق كاسىپتىك-تەحنيكالىق ءبىلىم بەرۋ ءتاجىريبەسىن ناسيحاتتاۋ, وداقتاس رەسپۋبليكالارعا تاراتۋ ماقساتىندا بۇكىلوداقتىق سەمينار-كەڭەس وتكىزىلىپ, وعان بارلىق رەسپۋبليكالاردىڭ مينيسترلەر كەڭەسى توراعاسىنىڭ ورىنباسارلارى, وقۋ-اعارتۋ سالاسىنىڭ باسشىلارى قاتىستى. العاشقى باياندامانى كسرو مينيسترلەر كەڭەسى كاسىپتىك-تەحنيكالىق ءبىلىم بەرۋ جونىندەگى مەملەكەتتىك كوميتەتىنىڭ توراعاسى الەكساندر بۋلگاكوۆ جاسادى. مىنبەرگە ەكىنشى بولىپ كوتەرىلگەن ب.ابدىكارىم ۇلى ءوزىنىڭ سوزىمەن قاتىسۋشىلاردى ۇيىتىپ تاستادى. شەشەن دەپ بوكەڭدى ايتۋ كەرەك, جەر-جەردەن كەلگەن ارىپتەستەر تەرەڭ تۇجىرىم, عىلىمي نەگىزدە جاسالعان باياندامادان قۇندى كەڭەس, باي تاجىريبە الىپ قايتتى.
ب.ابدىكارىم ۇلى ءوزى قۇلاي ءسۇيگەن ءىسىن العا اپارۋ ءۇشىن ءوزىمىزدىڭ قازاقستانمەن عانا شەكتەلىپ قالمادى. ءوزى تىكەلەي باسشىلىق جاساپ ءجۇرىپ, اتسالىسىپ, الىس-جاقىن شەتەلدەردەگى ارىپتەس-عالىمدارمەن كاسىپتىك ءبىلىم بەرۋ ماسەلەلەرى بويىنشا ءوزارا ىسكەرلىك بايلانىس ورناتتى. قازىر تەرەڭ, ساپالى ءبىلىم بەرۋ وشاقتارىنا اينالعان بىرىككەن قازاق-تۇرىك, قازاق-نەمىس تەحنيكالىق ليتسەيلەرى بوكەڭنىڭ ولشەۋسىز ەڭبەگىنىڭ مايەگى, توككەن تەردىڭ جەمىسى. حالىق شارۋاشىلىعىنا قاجەتتى ورتا بۋىن ماماندارىن دايىنداۋدا ءبىلىم بەرۋدىڭ دۋالدى جۇيەسىن تاجىريبەگە ەنگىزدى. سوڭعى جىلدارى ەلباسى ن.نازارباەۆتىڭ دۋالدىق جۇيەنىڭ تيىمدىلىگى تۋرالى ءجيى قايتالاپ جۇرگەنى تەگىن ەمەس. قازىرگىدەي يندۋستريالىق-يننوۆاتسيالىق دامۋ باعىتىندا بۇل جۇيە الدەقايدا وزەكتى.
ءبىر كەزدەرى وتاندىق وندىرىسكە جۇمىسشى-مامانداردى دايارلايتىن كاسىپتىك-تەحنيكالىق ۋچيليششەگە بۇرىن-سوڭدى وگەيلەۋ كوزقاراس قالىپتاسىپ, ولارعا سەگىز جىلدىق جانە ورتا مەكتەپتىڭ جوعارعى كلاسىنداعى وقۋ ۇلگەرىمى ناشار, ءتارتىبى تومەن بالالاردى جىبەرۋ ادەتكە اينالعانى جاسىرىن ەمەس ەدى. ارينە, ولاردىڭ اراسىندا جاستىق جىگەرمەن نەمەسە وتباسى جاعدايىنا بايلانىستى ءبىر كاسىپتى يگەرىپ, ەرتەرەك ەڭبەككە ارالاسۋدى كوزدەگەن جاستار دا بولدى. سوندا دا كتۋ مارتەبەسى تۇرالاپ جاتقان ەدى. كاسىپتىك ءبىلىم بەرۋدى جەتىلدىرۋگە بارلىق كۇش-قايراتى مەن قۋاتىن, بىلىگى مەن ءبىلىمىن ارناعان بولات ابدىكارىم ۇلى وسى سىرەسكەن سەڭدى بۇزدى, قاتىپ قالعان توڭدى ءجىبىتتى. جەزقازعاننان ءبىز سونى كوردىك. بوكەڭ رەسەيدىڭ ۆولگوگراد وبلىسىنداعى بۇرىنعى تساريتسىن گيمنازياسىنىڭ لەنينگرادتاعى تسارسكوسەلسكي ليتسەيىنىڭ تاريحىمەن, وندا كاسىپتىك ءبىلىم بەرۋدىڭ ەرەكشەلىكتەرىمەن تانىسۋعا ءجون سىلتەدى.
ءبىز دە اقتوبەدە وزىمىزدە قالىپتاسقان ءىسىمىزدى جەتىلدىرىپ, جوعارىدا اتاپ كورسەتكەن تىڭ تاجىريبەلەردى پايدالانىپ, ناتيجەسىندە قازاقستاندا العاشقىلاردىڭ ءبىرى بولىپ, اقتوبە قالاسىندا №107-ءشى كاسىپتىك-تەحنيكالىق ۋچيليششە-ليتسەي, مەكتەپ-گيمنازيا اشتىق. ۇلت ءمۇددەسى ءۇشىن وتقا دا, سۋعا دا تۇسۋگە دايار, جاڭاشىل, تالاپشىل, تەرەڭ, پاراساتى دا مول ازامات شايسۇلتان شاياحمەتوۆ سول كەزدەرى ەلىمىزدىڭ ءبىلىم مينيسترلىگىن باسقارىپ تۇرعان ەدى. اقتوبەگە كەلىپ, ءىسىمىزدى كورىپ, ەلىمىزدىڭ كاسىپتىك ءبىلىم بەرۋ سالاسىنا قاجەت تاجىريبە ەكەن دەپ قولداي كەتتى. مەنى وزىنە ورىنباسارلىق لاۋازىمعا شاقىردى. شايسۇلتان شاياحمەت ۇلىنىڭ ورىنباسارلارىنىڭ ءبىرى, بۇدان بۇرىن پەداگوگتىق قىزمەتتە تاعدىرلاس بولىپ كەلە جاتقان ۇستازىم بولات ابدىكارىم ۇلىمەن بۇرىنعىدان دا جاقىنداسىپ, تىزە قوسىپ ەڭبەك ەتۋدىڭ ءساتى ءتۇستى. ءوزى جاراتىلىسى بەكزات, پاڭ مىنەزدى كورىنگەنىمەن توننىڭ ىشكى باۋىنداي ارالاسا-قۇرالاسا كەلە اعالى-ءىنىلى بولىپ كەتتىك. باسقا دا ورىنباسارلارى بولدى, ءبارى دە ەلگە تانىمال – ب.ساپارباەۆ, ش.بەركىمباەۆا, ۆ.كورولكوۆ, ە.مەدەۋوۆ, ج.ءازىزحانوۆ سياقتى شوقتىعى بيىك تۇلعالار. ءار ورىنباساردىڭ ءوزىنىڭ قىزمەتتىك مىندەتتەرى ءارتۇرلى بولعانىمەن, مۇددە ءبىر – ءبىلىم مەن تاربيە ساپاسىنا قىزمەت ەتۋ.
قازاق ەلىنىڭ تاۋەلسىز مەملەكەت كۇنتىزبەسىندەگى العاشقى كەزەڭدەر بولاتىن. بارلىعىنا دا, ءبىلىم بەرۋ ىسىنە دە كوزقاراس وزگەردى. ءبىرىنشى كەزەكتە وقۋ-ماتەريالدىق بازاسىن نىعايتۋ, ءبىلىم بەرۋ مازمۇنى مەن باعدارلاماسىن جاڭارتۋ جانە وقىتۋشىلار كورپۋسىن جەتىلدىرىپ, قازاقستاندىق ءمودۋلدى قالىپتاستىرۋ قاجەت بولدى.
مەملەكەتتىك مەنشىكتى جەكەشەلەندىرۋ سالدارىنان بالاباقشالاردىڭ, كاسىپتىك-تەحنيكالىق ۋچيليششەلەردىڭ, ءتىپتى كەيبىر جوعارى وقۋ ورىندارىنىڭ عيماراتتارى جەكەنىڭ قولىنا كوشىپ كەتكەن. ورتا ارناۋلى ءبىلىمى بار كادر بولمايىنشا ەشقانداي ەكونوميكا قۋاتتى بولۋى مۇمكىن ەمەس ەكەنىن بىلەتىن بولات ابدىكارىم ۇلى ەڭ باستىسى, كاسىپتىك-تەحنيكالىق مەكتەپتەردى ساقتاپ قالۋعا جان سالىپ باقتى. سولاي ەتىپ قانا قويماي كاسىپتىك-تەحنيكالىق ليتسەيلەر, گيمنازيالار, اۆتورلىق مەكتەپتەر, قازاق-تۇرىك ليتسەيلەرىن اشۋعا قول جەتكىزدى.
بولات ابدىكارىم ۇلى – بۇل سالادا قاراپايىم عانا قىزمەت ەتىپ قويماي, كاسىپتىك ءبىلىم بەرۋدى عىلىمي تۇرعىدا زەرتتەپ, زەردەلەپ, بەلگىلى ءبىر تۇجىرىم جاساعان عالىم. بوكەڭنىڭ ەڭبەكتەگى جەتىستىكتەرىنىڭ قۇپياسى – عىلىمي-تەوريالىق نەگىزدەمەدە. وتكەن عاسىر دانىشپاندارىنىڭ ءبىرى: «ادامنىڭ داڭقىن ەڭبەك شىعارادى» دەگەندەي, بوكەڭ ەڭبەگىمەن داڭققا بولەندى, سونىمەن بىرگە, ول ەڭبەكتى كوتەرەتىن دە ادام ەكەنىن ءوزىنىڭ ءىس-تاجىريبەسىمەن دالەلدەدى. ەلىمىزدە ءبىلىم بەرۋدى دامىتۋ تەورياسى مەن پراكتيكاسى بويىنشا كەڭ كولەمدى عىلىمي جانە پەداگوگيكالىق جۇمىستاردى ەڭسەردى. ءوز ارىپتەستەرىمەن ءبىرلەسىپ, كاسىپتىك-تەحنيكالىق مەكتەپتەر, ورتا ارناۋلى ءبىلىم بەرۋ, ءبىلىم بەرۋ جۇيەسىندە دەنە ءتاربيەسىن دامىتۋ, جالپى ءبىلىم بەرۋ مەكتەپتەرىندە وقۋشىلاردى ەڭبەككە باۋلۋ جانە تاربيەلەۋ تۇجىرىمدامالارىن جاسادى. عىلىمي جەتىستىكتەرىن وندىرىسكە نەعۇرلىم جاقىنداتۋ ماقساتىندا وقۋ-جوسپارلاۋ قۇجاتتارى توپتاماسىن, كاسىپتىك-تەحنيكالىق پەداگوگيكانىڭ عىلىمي نەگىزدەرى تۋرالى ەڭبەكتەردى جارىققا شىعاردى. بوكەڭ زامان اعىمىن, جاڭالىقتىڭ جاڭا لەبىن الدىن الا بولجاپ, ءبىلىپ وتىرۋشى ەدى. ونىڭ 1995 جىلى شىعارعان «كاسىپتىك-تەحنيكالىق مەكتەپ جانە نارىق» اتتى مونوگرافياسى عىلىمنىڭ وسى جۇيەسىندەگى اسا كورنەكتى ەڭبەك. عىلىمعا ادال, ىستە ەڭبەكقور عالىمنىڭ «كاسىپتىك-تەحنيكالىق دايارلاۋدىڭ عىلىمي-پەداگوگيكالىق نەگىزدەرى» مونوگرافياسى مەن «اسپيرانتتار جانە عىلىمي دارەجەلەر مەن اتاقتار ىزدەنۋشىلەرىنىڭ عىلىمي زەرتتەۋلەرىنىڭ نەگىزدەرى» اتتى وقۋ قۇرالى كەيىنگى ءىزباسارلار ءۇشىن قۇندى تۋىندىلار. ونىڭ جەتەكشىلىگىمەن جانە تىكەلەي قاتىسۋىمەن كاسىپتىك-تەحنيكالىق ۋچيليششەلەر ءۇشىن 50-دەن استام وقۋ جوسپارى مەن باعدارلامالار دايىندالعان. بۇل – كاسىپتىك ءبىلىم ءۇشىن ۇلكەن قازىنا.
بولات ابدىكارىم ۇلىنىڭ ۇلتتىق پەداگوگيكانى زەرتتەۋدەگى عىلىمي ەڭبەكتەرى ءوز الدىنا اسا باي ۇلكەن قازىنا. ونىڭ ءال-فارابي, ماحمۇد قاشقاري, ءجۇسىپ بالاساعۇني پەداگوگيكاسى جونىندەگى وقۋ قۇرالدارى پەداگوگيكانىڭ عىلىمي كىتاپحاناسى قورىن بايىتا ءتۇستى. بوكەڭنىڭ عىلىمي ۇستاحاناسىندا دۇنيەگە كەلگەن الاشوردا قايراتكەرلەرىنىڭ پەداگوگيكالىق مۇراسى تۋرالى قوماقتى ەڭبەك تە بار. ال «كاسىپتىك پەداگوگيكا» دەپ اتالاتىن اۆتورلىق ەڭبەك عالىمنىڭ ۇزاق جىلدار بويعى عىلىمي ىزدەنىستەرىنىڭ ءتۇيىنى بولدى.
بولات ابدىكارىم ۇلى 90-شى جىلداردىڭ ورتاسىنا قاراي قازاقستان رەسپۋبليكاسى جوعارعى كەڭەسىندەگى دەپۋتاتتىق قىزمەتىندە كاسىپتىك ءبىلىم بەرۋ سالاسىن زاڭنامالىق جاعىنان نىعايتۋعا ۇلكەن ىقپال ەتتى. وسى جۇيەنى قارجىلاندىرۋ ۇلەسىن ساتىلاپ ۇلعايتۋعا كوپ ەڭبەك ءسىڭىردى.
ول 1995 جىلى ءوزىنىڭ جان-ءتانىمەن, تۋا ءبىتتى بولمىسىمەن بەرىلگەن سالاسىنا كاسىپتىك ءبىلىم بەرۋ كوميتەتىنىڭ توراعاسى بولىپ قايتا ورالدى. رەسپۋبليكا وندىرىسىنە اسا قاجەتتى جۇمىسشى ماماندار دايارلاۋدىڭ وزىق تاسىلدەرى مەن ادىستەمەلەرىن تۇبەگەيلى مەڭگەرىپ العان بوكەڭ كوميتەتتىڭ دارەجەسىن وزگە مينيسترلىكتەردەن دە جوعارى كوتەرۋگە قول جەتكىزدى. ۇلكەن وتىرىستاردا كاسىپتىك-تەحنيكالىق ءبىلىم بەرۋ جۇيەسىن شىر-پىرى شىعىپ قورعايتىن. ونىڭ ارەكەتى ءجاي عانا جاناشىرلىق ەمەس, ءوز ويىن تۇجىرىمدى سوزبەن, دايەكتى بايلاممەن, العا قويعان ماقساتتتىڭ ءمان-ماعىناسىن عىلىمي-پراكتيكالىق دالەلدەرمەن شەگەلەپ تاستاعاندا پىكىرتالاسقا تۇسكەن ادامى بوجىراپ سالا بەرەتىن, قارسى ءۋاج ايتا المايتىن.
بولات ابدىكارىم ۇلى قازاقستانداعى كاسىپتىك ءبىلىم بەرۋ سالاسىندا قۋاتتى, الىپ مۇزجارعىش اتاندى. قولعا العان ءىسىن ساپالى اياقتاپ, العا قويعان ماقساتىنا جەتۋ – ناعىز ازاماتتىڭ قاھارماندىعى دەپ بىلەمىن. قايسارلىق, تاباندىلىق, جىگەرلىلىك تابيعاتى ەرەكشە جاراتىلعان, ءوزىنىڭ ءومىرىن جاسامپاز ىستەرگە ارناعان كوشباسشىلاردىڭ عانا قولىنان كەلەدى. مۇنداي جەتىستىككە, لايىقتى قۇرمەتكە, بيىك مارتەبەگە بوكەڭ وڭاي جەتكەن جوق. بۇل – تولاسسىز ەڭبەكتىڭ, تىنىمسىز ىزدەنىستىڭ, عىلىم مەن ءىلىمنىڭ تۇڭعيىعىنا سۇڭگىپ, ونىڭ تۇنىعىنان باعالى مارجانىن تاۋىپ, تەرە بىلگەن ولشەۋسىز ءىستىڭ ناتيجەسى.
بولات ابدىكارىم ۇلى ءبىر سالادا قىزمەت ەتىپ جۇرگەن ارىپتەستەرىن, سوڭىنان ەرىپ كەلە جاتقان, ءۇمىت كۇتكەن شاكىرتتەرىن توننىڭ ىشكى باۋىنداي كورىپ, ءىشتارتىپ, قامقورلىعىنا, قاناتىنىڭ استىنا الۋعا ءازىر تۇراتىن ءمارت ەدى. مەن دە بوكەڭدى ءوزىمنىڭ ۇلاعاتتى ۇستازىم سانايمىن. دانىشپان نيۋتون ايتقانداي, وسىنداي پاراساتى بيىك ۇستازداردىڭ يىعىندا تۇرعاندا ولاردىڭ ۇزەڭگىلەستەرى دە الىستاعىنى كورىپ, تانىدى.
ەندى, مىنە, استانا ارقانىڭ, حالقىمىزدىڭ ايبىنىن بۇرىنعىدان دا اسقاقتاتىپ وتىر.
بوكەڭ ءوزارا سۇحباتتاسىپ, سىرلاسىپ وتىرعاندا ءوزىنىڭ تۋما-تۋىستارى, جاقىن اعايىندارى, باۋىرلارى تۋرالى اسقان ريزاشىلىقپەن اڭگىمەلەيتىن. اسىرەسە, ءىنىسى ورالباي ابدىكارىم ۇلى مەن كەلىنى جامالدى ەرەكشە جاقسى كورىپ, قادىرلەدى. مەملەكەت جانە قوعام قايراتكەرى ورەكەڭ مەن زايىبى ەكەۋى دە اعانىڭ قۇرمەتىنە لايىق بولا ءبىلدى. بوكەڭ دۇنيەدەن وزعاندا اياعىنان تىك تۇرىپ قىزمەت كورسەتىپ, اقتىق ساپارعا ارۋلاپ شىعارىپ سالدى.
بولات ابدىكارىم ۇلىنىڭ بيىككە كوتەرىلىپ, شىڭعا سامعاۋىنا ادال جارى, سەنىمدى سەرىگى تازاگۇل مۇقاشقىزى ىقپال ەتكەنىن ايتا كەتۋىمىز كەرەك. ۇيدە جاعدايىن جاساپ, تۇزدە تىلەگىن تىلەپ وتىراتىن تازاگۇل مۇقاشقىزى عىلىممەن شۇعىلدانۋعا دا ۋاقىت تابا ءبىلدى. ول – ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ءتىل ءبىلىمى كافەدراسىنىڭ پروفەسسورى, پەداگوگيكا عىلىمدارىنىڭ دوكتورى, قازاقستان پەداگوگيكالىق عىلىمدار اكادەمياسىنىڭ اكادەميگى. ءبىلىم بەرۋ سالاسىنداعى ۇزدىك قىزمەتى, جوعارى وقۋ ورىندارى مەن جالپى ءبىلىم بەرەتىن مەكتەپتەرگە ارناپ بىرنەشە وقۋلىقتار شىعارعانى ءۇشىن ەۇۋ-ءدىڭ اكادەميالىق پروفەسسورى اتاعى بەرىلدى. ول جۇزدەن استام عىلىمي-زەرتتەۋ ماقالالارىنىڭ, جەكە جانە اۆتورلىق ۇجىممەن بىرلەسىپ شىعارعان 23 وقۋلىق, وقۋ-ادىستەمەلىك قۇرالداردىڭ اۆتورى.
تازاگۇل مۇقاشقىزى عىلىممەن تەرەڭ شۇعىلدانا ءجۇرىپ, وتباسىنا انالىق جىلۋى مەن مەيىرىمىن دە ارناي ءبىلدى. بوكەڭ مەن تازاگۇل جەڭگەي دۇنيەگە اكەلىپ, تاربيەلەگەن ۇل-قىزى دا قازىر ءوز الدىنا شاڭىراق كوتەرىپ, بالا ءوسىرىپ, كوڭىلى مەن داستارقانى داريا وتاۋ يەسى بولىپ وتىر.
قوس عالىمنىڭ ۇرپاقتارى دا عىلىمدى سەرىك ەتتى. كەزىندە ۇلاعاتتى اكە نۇسقاعان جولمەن ۋچيليششەدە وقىعان ايان بولات ۇلى كەيىن پوليتەحنيكالىق جانە حالىق شارۋاشىلىعى ينستيتۋتتارىن ءبىتىردى. تەحنيكا عىلىمدارىنىڭ كانديداتى. قاراعاندى وبلىسى بويىنشا تەكسەرۋ كوميسسياسىنىڭ مۇشەسى. زايىبى اينۇر ەكەۋىنىڭ اقان, ساكەن, نۇركەن اتتى ۇلدارى مەن ءداليا اتتى قىزدارى بار. اينۇر بولات كەلىنى تۋريستىك اگەنتتىكتى باسقارىپ وتىر. دينا بولاتقىزى اباي اتىنداعى الماتى مەملەكەتتىك ۋنيۆەرسيتەتى مەن زاڭ ينستيتۋتىن بىتىرگەن. ول فيلولوگيا عىلىمدارىنىڭ كانديداتى. قازاقستان رەسپۋبليكاسىنىڭ جوعارعى سوتىندا باس كونسۋلتانت. جۇبايى تيمۋر ەكەۋى شىڭعىس اتتى ۇل مەن دانەليا اتتى قىزدارىن تاربيەلەپ, وسىرۋدە. تيمۋر – بانك قىزمەتكەرى. شىڭعىس سوناۋ جىلدارى اتاسى نەگىزىن قالاعان قازاق-تۇرىك ليتسەيىن ۇزدىك ءبىتىرىپ, نازارباەۆ ۋنيۆەرسيتەتتە ءبىلىمىن جالعاستىرۋدا.
مىنە, ارتىنداعى كەيىنگى ۇرپاققا ۇلگى بولارداي اسا باي عىلىمي, رۋحاني قازىنا, لايىقتى ۇرپاق قالدىرعان اسا قادىرلى بولات ابدىكارىم ۇلىنىڭ ارامىزدان كەتكەنىنە دە ءبىر جىل ۋاقىت بولىپ قالدى. ول ومىردەن وتكەندە وتباسى, وزىمەن قاتار زامانداستارى, اعايىن-تۋىستارى, ارىپتەستەرى, شاكىرتتەرى ەگىلىپ, جىلادى, ىزدەدى. جايدارى, تۋراشىل مىنەزىمەن, جىگەرلى ىسىمەن, ىسكە الىمدى, سوزگە شالىمدى, ەرتەڭىن وزا ويلايتىن, ادەپتەن اسپايتىن, بولدىم دەپ تاسپايتىن قاسيەتىمەن جۇرەگىمىزدە, جادىمىزدا ساقتالعان بوكەڭ ءوز ءىسىنىڭ تارلانى, حالقى سۇيگەن پەرزەنتى بولىپ قالا بەرەدى.
ەلەۋسىن ساعىندىقوۆ,
پارلامەنت سەناتىنىڭ دەپۋتاتى, ەكونوميكا عىلىمدارىنىڭ دوكتورى, پروفەسسور