كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆانىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتىپ, وندا 2016-2020 جىلدارعا ارنالعان «بولاشاق» حالىقارالىق ستيپەندياسىن دامىتۋ جوسپارى قارالدى. وتىرىستا مەملەكەتتىك حاتشى قازاقستان پرەزيدەنتىنىڭ «بولاشاق» حالىقارالىق ستيپەندياسىنىڭ الەۋەتىن مەملەكەت باسشىسىنىڭ بەس ينستيتۋتتىق رەفورماسىن ىسكە اسىرۋ جونىندەگى «100 ناقتى قادام» – ۇلت جوسپارىن ىسكە اسىرۋدا كەڭىنەن قولدانۋ قاجەتتىگىن اتاپ ءوتتى. «سوڭعى كەزدە وسى باعدارلاما بويىنشا 2016-2020 جىلدارعا دەيىنگى ۇسىنىس دايىندالدى. ول ۇسىنىستار قازىر «100 ناقتى قادام» – ۇلت جوسپارىمەن بايلانىستىرىلىپ جاتىر. سوندىقتان دا, پرەمەر-مينيستردىڭ قاتىسۋىمەن ۇكىمەتتە دە ءبىرنەشە رەت قارالدى. ەندى ەلباسىنا باستى ۇسىنىستاردى ەنگىزۋىمىز كەرەك», – دەدى گ.ابدىقالىقوۆا.
بۇل رەتتە كوميسسيانىڭ وتكەن جىلعى وتىرىسىندا مەملەكەتتىك حاتشى قازاقستان الەمنىڭ ەڭ دامىعان 30 ەلىنە كىرۋ جولىنداعى قارىشتى قادامى سانالاتىن ەلباسىنىڭ «نۇرلى جول» جاڭا ەكونوميكالىق ساياساتى اياسىنداعى جوعارى بىلىكتى كادرلاردى دايارلاۋ ايرىقشا ماڭىزعا يە ەكەندىگىنە ەكپىن بەرگەن-ءدى. كەشەگى وتىرىس تا بىلىكتى كادرلار دايارلاۋ ماسەلەسىنىڭ ءالى دە جەتىلدىرىلە بەرەتىنىن كورسەتتى. سونداي-اق, كوميسسيا مۇشەلەرى «بولاشاق» حالىقارالىق ستيپەندياسىنىڭ 2016-2020 جىلدارعا ارنالعان دامۋ جوسپارىن ماقۇلدادى. بۇل رەتتە دامۋ جوسپارىندا كوزدەلگەن «بولاشاق» ستيپەندياسىن دامىتۋعا جانە جەتىلدىرۋگە باعىتتالعان باستامالار تالقىلانعاندىعىن ايتا كەتۋ كەرەك. ويتكەنى, ەلىمىزدەگى اۋقىمدى ينفراقۇرىلىمدىق دامۋ, جاڭا ءوندىرىس ورىندارىن قۇرۋ جانە ەل وڭىرلەرى اراسىندا كولىك كوممۋنيكاتسيالارىنىڭ بارلىق تۇرلەرى ارقىلى بيزنەس ىنتىماقتاستىقتى جانداندىرۋ ءۇشىن دە بىلىكتىلىككە يە جوعارى دەڭگەيلى مەنەدجەرلەرگە دەگەن قاجەتتىلىكتى تۋدىراتىنى بەلگىلى جايت. سونىمەن قاتار, جيىندا كەزەكتى كونكۋرستىق ىرىكتەۋدىڭ ۇمىتكەرلەرىنە ستيپەنديا تاعايىنداۋ ماسەلەلەرى جانە ازاماتتاردىڭ وتىنىشتەرى قارالدى. وتىرىس قورىتىندىسى بويىنشا مەملەكەتتىك حاتشى گ.ابدىقالىقوۆا شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ جۇمىسىن ودان ءارى ۇيىمداستىرۋ بويىنشا بىرقاتار ناقتى تاپسىرمالار بەردى.
اسقار تۇراپباي ۇلى, «ەگەمەن قازاقستان».