اقتاۋدا ماڭعىستاۋ وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ گرانتتىق تاپسىرىسىمەن تۇركيا مەملەكەتىندە ءبىر ايعا جۋىق شىعارماشىلىق ساپاردا بولعان سۋرەتشىلەردىڭ ارت-ەكسپەديتسياسى اياسىندا «تۇرىك عاجاپتارى» اتتى سۋرەت كورمەسى ءوتتى, دەپ حابارلايدى Egemen.kz.
كورمەدە ەكسپەديتسيا قاتىسۋشىلارى تۇركيا اۋماعىندا جازىلعان تۋىندىلارىن كوپشىلىك نازارىنا ۇسىندى. ساپار بارىسىندا سۋرەتشىلەر ەلدىڭ تابيعاتى مەن تاريحي ورىندارىن ەتيۋد جانرىندا بەينەلەپ, كاسىبي شەبەرلىكتەرىن ارتتىردى.
«بيىل وڭىرلىك مادەنيەت, تىلدەردى دامىتۋ جانە ارحيۆ ءىسى باسقارماسى 4 گرانتتىق جوبانى جۇزەگە اسىرىپ جاتىر. سول جوبالاردىڭ ىشىندە ەرەكشەلەنەتىنى – «تۇرىك عاجاپتارى» سۋرەتشىلەر ارت-ەكسپەديتسياسى. بۇعان دەيىن بۇل جوبا قىرعىزستان مەن وزبەكستان اۋماعىندا وتكەن بولاتىن. بۇل ەكسپەديتسيا سۋرەتشىلەردىڭ ونەرگە, تۋعان ەل مەن جەرگە دەگەن قۇرمەتى مەن سۇيىسپەنشىلىگىنىڭ ارقاسىندا تۇراقتى تۇردە ىسكە اسىپ كەلەدى. «اقتاۋ – تۇركى الەمىنىڭ مادەني استاناسى» اتانعان مەرەيلى جىل اياسىندا ءبىز قىرعىز ارىپتەستەرىمىزبەن كەلىسىپ, تۇركياعا مادەني ءىسساپار ۇيىمداستىردىق. سول ساپاردا جاسالعان جۇمىستىڭ ناتيجەسىندە بۇگىن وسىنداي اسەم, كوز سۇيسىندىرەر تۋىندىلاردى تاماشالاپ وتىرمىز. بۇل جوبادا سۋرەتشىلەردىڭ ەڭبەگى ەرەكشە. ولارعا العىس بىلدىرەمىز», دەدى ماڭعىستاۋ وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسى باسشىسى نۇرتاس سالي.
ارت ەكسپەديتسيا جەتەكشىسى تىنىشبەك بالتاباەۆ بۇل ساپاردىڭ مادەني ماڭىزدىلىعىن اتاپ ءوتتى. ول ءوز سوزىندە جوبانىڭ ماڭعىستاۋ وڭىرىندەگى وتپان تاۋدا باستالعانىن جانە ونىڭ مادەنيەت پەن وركەنيەتتى ناسيحاتتاۋدى ماقسات ەتكەنىن جەتكىزدى.
«العاشقى جوبامىز قازاقستانداعى ماڭعىستاۋ وڭىرىندەگى وتپان تاۋدان باستالدى. كەيىن وزبەكستاننىڭ تاشكەنت قالاسىندا ءبىر كۇندىك باعدارلاما جۇزەگە استى. ەكسپەديتسيانىڭ ماقساتى – ەلىمىزدىڭ مادەنيەتى مەن وركەنيەتىن ناسيحاتتاۋ, ەتيۋد جانرىن دامىتۋ, ءتۇرلى ۇلتتار اراسىنداعى دوستىقتى نىعايتۋ جانە جاس سۋرەتشىلەرگە ۇلگى بولۋ. بۇل ساپار بارىسىندا قىرعىزستاننان 2, ماڭعىستاۋدان 4 سۋرەتشى قاتىسىپ, ناتيجەسىندە 60-70 جۋىق شىعارما دۇنيەگە كەلدى», دەدى ارت ەكسپەديتسيا جەتەكشىسى تىنىشبەك بالتاباەۆ.