وڭىردە سوڭعى جىلدارى قوس ءسابيلى, ءتىپتى ۇشەمدى وتباسىلار سانى ارتقانى بايقالعان. باستاۋىش سىنىپتان باستاپ جوعارى سىنىپقا دەيىن 16 جۇپ ەگىز جانە سىڭار بالا وقيتىن ارىس قالاسىنداعى №32 مەكتەپتى تۇرعىندار «ەگىزدەر مەكتەبى» دەپ اتاپ كەتكەن, دەپ جازادى Egemen.kz.
«الماتى» تەلەارناسىنىڭ حابارلاۋىنشا, كەيبىر سىنىپتاردا مۇعالىمدەرگە دە وقۋشىلاردى اجىراتۋ قيىن. سولاردىڭ ىشىندە 11-سىنىپ وقۋشىلارى ونداسىن مەن نۇرسيپات كوزگە تۇسكەن.
«مەن بوكسقا قاتىسامىن. ءجيى وقۋ-جاتتىعۋ جيىندارىنا, جارىستارعا كەتەمىن. اپام ساباقتى جاقسى وقيدى, ءۇي تاپسىرماسىنا كومەكتەسەدى», دەيدى ونداسىن اسىلبەكوۆ.
بۇل مەكتەپتە ءبىر شاڭىراق استىندا ەكى بۋىن ەگىزدەر وقيتىن وتباسىلار دا بار. مىسالى, اقنۇر مەن ءبيبىنۇر – باستاۋىش سىنىپ وقۋشىلارى, ال ولاردىڭ اپكەسى سارا مەن اعاسى سالمان – 8-سىنىپتىڭ باعدارلاماسىن مەڭگەرىپ ءجۇر. سىرت كەلبەتتەرى ۇقساس بولعانىمەن, مىنەزدەرى ءبىر-بىرىنە مۇلدە كەرەعار.
«مەن وقۋدى جاقسى كورەمىن, ال سالمان سپورتقا بەيىم. مەن اۋىرسام, ول دا ءوزىن جايسىز سەزىنەدى, ال ەگەر ول سىرقاتتانسا – مەن دە مازاسىزدانامىن», دەيدى سارا مەن سالمان.
مۇعالىمدەردىڭ ايتۋىنشا, ەگىز جانە سىڭار بالالار كوماندالىق رۋحى جوعارى, مەيىرىمدى, ءبىر-بىرىنە دەگەن قولداۋى ەرەكشە ءارى وقۋ جەتىستىكتەرى دە ورتاشا دەڭگەيدەن جوعارى ەكەن.
«ولاردا باۋىرمالدىق سەزىم ايقىن. ءبىر-بىرىنە كومەكتەسۋگە دايىن, مەيىرىمدى, نيەتتەرى تازا. جىلى جۇرەكتى, جاناشىر بالالار», دەيدى №32 جالپى ورتا مەكتەپتىڭ ديرەكتورى راحيما ءجۇنىسوۆا.