قاراعاندىدا بالاپان ابەنوۆتى ەسكە الۋعا ارنالعان شاعىن فۋتبولدان وبلىستىق اشىق بىرىنشىلىك 2018 جىلدان بەرى وتكىزىلىپ كەلەدى. ءداستۇرلى دوپ دوداسى فۋتبولسۇيەر جاس بۋىننىڭ باسىن قوساتىن الاڭعا اينالدى. بيىل ءتۋرنيردىڭ اۋقىمى كەڭەيدى. العاش رەت تۋرنير رەسپۋبليكالىق دەڭگەيگە ءوتىپ, 2012–2013 جىلى تۋعان جاسوسپىرىمدەر سايىسقا ءتۇستى.
ايماق-اتىراپقا تانىمال ارىس ازامات بالاپان زيپاتوللا ۇلىنىڭ ەسىمىن ەل جادىندا ساقتاۋ ماقساتىندا ءداستۇرلى تۇردە وتكىزىلىپ كەلە جاتقان تۋرنيردە ەلىمىزدىڭ تۇكپىر-تۇكپىرىنەن كەلگەن كوماندالار ءوزارا باق سىناسىپ, ۇزدىكتەردى انىقتادى.
جارىسقا قاتىسقان كوماندالار تۋرنير ەرەجەسىنە سايكەس ەكى سەبەتكە ءبولىندى. ءار سەبەت ءوز ىشىندە ءتورت كوماندادان توپتاستىرىلدى. ءار ۇجىم توپتىق كەزەڭدە ءۇش ويىن وتكىزدى. ناتيجەسىندە, توپتىق سىن قورىتىندىسىندا جوعارى ۇپاي ەنشىلەگەن ەكى كوماندا كەلەسى كەزەڭگە, 1/16 فينالعا جولداما الدى. بۇدان كەيىن جارىس پلەي-وفف جۇيەسىمەن جالعاستى. جەڭگەن كوماندا كەلەسى كەزەڭگە ءوتىپ, جەڭىلگەندەرى جارىس جولىنان شىعىپ قالا بەردى.
ەكى كۇنگە سوزىلعان تارتىستى دودادا 1-ورىندى ەلوردالىقتار يەلەندى. 2-ورىندى «جاڭاارقا – 2012» كومانداسى ەنشىلەسە, قاراعاندىلىق «جاس قىران» كلۋبى ۇزدىك ۇشتىكتى تۇيىندەدى. مۇنىمەن قوسا, «ۇزدىك قاقپاشى», «ۇزدىك شابۋىلشى», «ۇزدىك قورعاۋشى», «ۇزدىك ويىنشى», «كورەرمەندەر كوزايىمى» سىندى اتالىمداردا ۇزدىكتەر انىقتالىپ, ۇيىمداستىرۋشىلار تاراپىنان قارجىلاي سىيلىقتارعا يە بولدى.
قاراعاندى وبلىسى