شىمكەنت قالاسىندا تۇرعىنداردىڭ پىكىرى مەن ءوتىنىش-تىلەگىنە قۇلاق تۇرەتىن جاڭا جوبا قولعا الىندى. «شىمكەنتتى دامىتۋعا حالىقتىڭ ۇلەسى» دەپ اتالاتىن وسى جوبا اياسىندا ادامدار QR كودتقا ءوز ءوتىنىشىن نەمەسە شاعىمىن قالدىرا الادى. ۇسىنىستارىن دا بىلدىرۋگە بولادى, دەپ جازادى Egemen.kz.
جاۋاپتى سالا ماماندارى, اكىمدىكتىڭ جوعارى لاۋازىمدى قىزمەتكەرلەرى تۇرعىندارمەن كەزدەسۋدە ۇسىنىس-پىكىرلەرىن تىڭداپ جاتادى. ەندى حالىق اتقارۋشى بيلىك وكىلدەرىمەن كەزدەسپەي-اق كەز كەلگەن ماسەلەگە قاتىستى ويىن وسى QR كود ارقىلى بىلدىرە الادى.
QR-كودتار الداعى ۋاقىتتا قوعامدىق ورىندار مەن اۆتوبۋستارعا ورناتىلادى. سول ارقىلى ازاماتتار قالانى دامىتۋعا بايلانىستى يدەيالارىن QR-كودپەن وپ-وڭاي جولدايدى.
قالا اكىمدىگى ماماندارىنىڭ سوزىنشە, بۇل جوبا ءاربىر تۇرعىنعا شىمكەنتتىڭ دامۋىنا جەكە ۇلەس قوسىپ, وڭ وزگەرىستەرگە سەبەپشى بولۋعا مۇمكىندىك بەرەدى. تۇسكەن بارلىق ۇسىنىس مۇقيات زەردەلەنىپ, ىشىندەگى وزەكتى دەگەندەرى ناقتى جۇزەگە اسىرىلادى.
وسىلايشا, جوبا اكىمدىك پەن حالىق اراسىنداعى اشىق ديالوگتى نىعايتۋعا جانە قالانى كوركەيتۋگە باعىتتالعان يگى قادام بولىپ وتىر.