«تاشكەنت-حۋمو» اۋەجايىندا مارتەبەلى مەيماننىڭ كەلۋىنە وراي قۇرمەت قاراۋىلى مەن اسكەري ۇرمەلى وركەسترى ساپ تۇزەدى. قازاقستان پرەزيدەنتىن وزبەكستان پرەزيدەنتى شاۆكات ميرزيوەۆ پەن باسقا دا رەسمي تۇلعالار قارسى الدى. قازاقستان مەن وزبەكستاننىڭ ءانۇراندارى شىرقالىپ, قۇرمەت قاراۋىلىنىڭ باستىعى راپورت بەردى, دەپ حابارلايدى Egemen.kz.
سالتاناتتى راسىمنەن كەيىن مەملەكەتتەر باسشىلارى ءبىر-بىرىنە ەكى ەلدىڭ رەسمي دەلەگاتسيا مۇشەلەرىن تانىستىردى. قازاقستان پرەزيدەنتىنىڭ بۇل ساپارىنا كورشى ەل حالقى ەرەكشە ءمان بەرىپ وتىر. اۋا رايىنىڭ بۇگىن اشىق تا, جىلى بولۋىن جەرگىلىكتى جۇرت جاقسىلىققا بالاۋدا. ساپارعا دايىندىق رەتىندە تاشكەنتتىڭ كوشەلەرى مەن بيىك عيماراتتارى قازاقستان مەن وزبەكستان تۋىمەن بەزەندىرىلگەن, ال LED-ەكراندارعا قاسىم-جومارت توقاەۆ پەن شاۆكات ميرزياەۆتىڭ سۋرەتتەرى قويىلدى.
ساپار باعدارلاماسىنا سايكەس ەرتەڭ پرەزيدەنتتەر كەلىسسوزدەر جۇرگىزەدى. سونداي-اق قاسىم-جومارت توقاەۆ پەن شاۆكات ميرزيوەۆتىڭ توراعالىعىمەن قازاقستان-وزبەكستان جوعارى مەملەكەتارالىق كەڭەسىنىڭ ەكىنشى وتىرىسى وتەدى.