تۇركىستان قالاسىنداعى قازاق-تۇرىك ۋنيۆەرسيتەتىندە 30 جىلدان استام ۋاقىتتان بەرى تۇركى ەلدەرىنەن كەلگەن جاستار ءبىلىم الىپ, «دايىندىق ورتالىعىندا» وقۋ وردانىڭ ىشكى گرانتى نەگىزىندە تۇرىك, اعىلشىن تىلدەرىمەن قاتار قازاق ءتىلىن دە مەڭگەرەتىنى ءمالىم, دەپ جازادى Egemen.kz.
بيىل ازەربايجاننان كەلگەن ۇشەم – زەحرا, ەسرا, لالا ازيزوۆالار مەن قىرعىزستاننان كەلگەن ەگىزدەر – باتما جانە زۋرا اككاناليەۆالار ءبىلىم الىپ جاتىر. قازاق ءتىلىن ۇيرەنۋدى باستاعاندارىنا نەبارى ءبىر اي بولسا دا, تىڭداۋشىلار ەركىن سويلەپ, ءوز ويلارىن قازاق تىلىندە جەتكىزە الادى. ۇشەم مەن ەگىز قىزدار «دايىندىق ورتالىعىن» اياقتاعاننان كەيىن قالاۋلارىنا سايكەس ماماندىقتار بويىنشا بىلىمدەرىن جالعاستىرۋدى جوسپارلاپ وتىر.
ء«بىزدىڭ ءتۇر-سيپاتىمىز ۇقساس بولعانىمەن, تاڭداعان ماماندىعىمىز ءارتۇرلى. ءبىرىمىز – پسيحولوگ, ءبىرىمىز – دارىگەر, ەندى ءبىرىمىز مۇعالىم بولعىمىز كەلەدى», دەيدى ولار.
عىلىم جانە جوعارى ءبىلىم مينيسترلىگىنىڭ مالىمەتىنشە, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ «دايىندىق ورتالىعىندا» قازىرگى تاڭدا تۇركى مەملەكەتتەرىنەن كەلگەن 296 تىڭداۋشى بار. ولار ءبىر جىل كولەمىندە تىلدىك دايىندىقتان ءوتىپ, قورىتىندى ەمتيحان ناتيجەسىندە تاڭداعان ماماندىعى بويىنشا وقۋىن جالعاستىرادى.