«اقىلدى باعدارشامدار» جوباسى اتىراۋ قالاسىندا ىسكە اسىرىلىپ جاتىر. جوبا زاماناۋي تەحنولوگيالار مەن جي ەلەمەنتتەرىن پايدالانا وتىرىپ, قالا كوشەلەرىندەگى قوزعالىستى ءتيىمدى رەتتەۋدى كوزدەيدى, دەپ جازادى Egemen.kz.
قازىرگى ۋاقىتتا باعدارشامدار سىناق-تەستىلەۋ رەجىمىندە جۇمىس ىستەپ جاتىر. وسى كەزەڭدە قالا تۇرعىندارى تاراپىنان كەيبىر قيىلىستاردا قوسىمشا باعىتتاۋىش جاسىل جەبەلەر مەن «جاسىل پليۋس» سيگنالىنىڭ بولماۋىنا بايلانىستى ۇسىنىستار مەن ەسكەرتپەلەر ءتۇسىپ جاتىر.
اتالعان ۇسىنىستار ەسكەرىلىپ, قوسىمشا باعىتتاۋىش جەبەلەردى ورناتۋ جۇمىستارى اتىراۋ قالاسى اكىمدىگى مەن قالالىق پوليتسيا باسقارماسى تاراپىنان مەردىگەر ۇيىممەن بىرلەسە وتىرىپ جۇزەگە اسىرىلماق.
ىشكى ىستەر مينيسترلىگىنىڭ مالىمەتىنشە, بۇگىندە قالا اۋماعىندا 78 باعدارشام ورناتىلعان: ونىڭ ىشىندە ازيا جاعىندا – 42 (سونىڭ 3-ءى جاياۋ جۇرگىنشىلەرگە ارنالعان), ال ەۋروپا جاعىندا – 36 (2-ءى جاياۋ جۇرگىنشىلەرگە ارنالعان). جوبا اياسىندا 160 مىڭنان استام دەرەك جۇيەگە ەنگىزىلىپ, ارنايى تالداۋ الگوريتمدەرى ارقىلى كولىك جانە جاياۋ جۇرگىنشىلەر قوزعالىسىن وڭتايلاندىرۋ كوزدەلىپ وتىر.