«تۇتىنۋشىلاردىڭ ۇلتتىق ليگاسى» رەسپۋبليكالىق قوعامدىق بىرلەستىگىنىڭ مۇشەلەرى كەزەكتەن تىس پرەزيدەنتتىك سايلاۋ وتكىزۋ تۋرالى قازاقستان حالقى اسسامبلەياسى كەڭەسىنىڭ باستاماسىن قولدايتىنىن ارنايى ۇيىمداستىرىلعان ءباسپاسوز ءماسليحاتىندا ءمالىم ەتتى.
جۋرناليستەر الدىندا ويىمەن ورتاقتاسقان «تۇتىنۋشىلاردىڭ ۇلتتىق ليگاسىنىڭ» ءتورايىمى, پارلامەنت ءماجىلىسىنىڭ دەپۋتاتى سۆەتلانا رومانوۆسكايا الەمدەگى ەكونوميكالىق داعدارىس كەزەڭىندە كەز كەلگەن مەملەكەتتىڭ باستى مىندەتى – حالىقتىڭ تابىس دەڭگەيىن تومەندەتپەۋ جانە سونىمەن قاتار, ەلىمىزدەگى تۇتىنۋ دەڭگەيىن جوعالتپاۋ بولىپ ەسەپتەلەدى دەي كەلىپ, ال وسى ماقساتتىڭ «نۇرلى جول» باعدارلاماسى اياسىندا شەشىلەتىنىنە توقتالدى. قازىرگى كەزەڭدە الەمنىڭ كوپتەگەن مەملەكەتتەرى تاپ بولعان ەكونوميكالىق داعدارىستاردىڭ شارپۋى ەلىمىزگە اسەرىن مەيلىنشە ازىراق تيگىزۋىندە مەملەكەت تاراپىنان قولعا الىنعان كەشەندى باعدارلامانىڭ بەرەرى مولدىعىن جوعارى باعالاعان ول, وسىنداي قيىن كەزدەردەن وتۋدە, قازاقستاندىقتاردىڭ ءال-اۋقاتىن ساقتاۋدا جانە ەلىمىزدىڭ تۇتاستىعىن نىعايتۋدا كەزەكتەن تىس وتكىزىلۋى تالقىلانىپ جاتقان پرەزيدەنتتىك سايلاۋدىڭ قاجەتتىگىنە ايرىقشا ءمان بەردى.
الدىمىزعا قويىلعان ماسەلەلەردى جۇزەگە اسىرۋ ءۇشىن حالقىمىزدىڭ بىرىگۋى, ازاماتتىق ۇستانىمنىڭ كۇشەيۋى اۋاداي قاجەت دەسەك, ءبىز كەزەكتەن تىس پرەزيدەنتتىك سايلاۋ وتكىزۋدى ۋاقتىلى, دەر كەزىندە جاسالعان ۇسىنىس دەپ سانايمىز. بۇل ەكونوميكالىق جانە گەوساياسي تۇراقسىزدىق ۋاقىتىندا ۇلتتىڭ رۋحىنىڭ نىعايۋىنا, ازاماتتىق قوعام الەۋەتىنىڭ ارتۋىنا, پەسسيميستىك كوڭىل كۇيلەردىڭ ازايۋىنا اكەلىپ سوعاتىنى ءسوزسىز, دەگەن پىكىرىن ورتاعا سالعان دەپۋتات:
«سايلاۋ – بۇل قوعام كەمەلدىلىگىن تەكسەرەتىن ەمتيحان, سونىمەن قاتار, سىرتقى قاتەرلەرگە دەگەن جاۋاپ بولىپ تابىلادى. «مولشىلىقتى اسپاننان سۇراماي, حالىقتىڭ بىرلىگىن سۇرا!», – دەپتى دانىشپاندار. سايلاۋدى وتكىزۋدى حالىق سۇراۋدا, ال حالىق دانالاردىڭ داناسى», دەپ تۇتىنۋشىلار ليگاسى اتىنان بارلىق ازاماتتاردى بىرىگىپ, قازاقستان حالقى اسسامبلەياسى كەڭەسىنىڭ باستاماسىن قولداۋعا شاقىردى.
انار تولەۋحانقىزى,
«ەگەمەن قازاقستان».