قاسىم-جومارت توقاەۆ پەن ۆلاديمير پۋتين باق-قا بىرلەسكەن مالىمدەمە جاسادى

قازاقستان پرەزيدەنتى اتالعان ساپار ەكى ەل اراسىنداعى ستراتەگيالىق سەرىكتەستىك پەن وداقتاستىق قارىم-قاتىناستى ودان ءارى نىعايتۋ تۇرعىسىنان اسا ماڭىزدى دەپ سانايدى.

«بۇگىن قول جەتكىزىلگەن ۋاعدالاستىقتار ەلدەرىمىز اراسىنداعى سان قىرلى ىنتىماقتاستىقتىڭ تابىستى دامىپ كەلە جاتقانىن تولىق كورسەتەدى. بۇل بىرەگەي ىقپالداستىق ءوز باعىتىنان اينىمايدى. 

مەنىڭ ويىمشا, پوستكەڭەستىك كەڭىستىكتەگى ەكى جەتەكشى مەملەكەت اراسىندا ورناعان جان-جاقتى بايلانىستىڭ اۋقىمى, شىن مانىندە, ەۋرازيالىق قاۋىپسىزدىك جۇيەسىنىڭ ماڭىزدى ەلەمەنتىنە اينالدى. بۇل تۇجىرىمدامانى بىرقاتار مۇددەلى مەملەكەت تالقىلاپ, زەردەلەۋدە. 

ەڭ باستىسى, ءبىزدى عاسىرلاردان تامىر تارتاتىن باي تاريحىمىز, بەلسەندى مادەني-رۋحاني بايلانىستارىمىز, ورتاق قۇندىلىقتارىمىز, زاماناۋي سىن-قاتەرلەرگە قاتىستى ۇقساس كوزقاراسىمىز بەن بولاشاققا باعدارىمىز بىرىكتىرەدى. وسىنداي بەرىك نەگىزگە قۇرىلعان ستراتەگيالىق سەرىكتەستىگىمىز بارلىق باعىتتا قارقىندى دامىپ كەلەدى. 

بيىل مەملەكەتتەرىمىز ءۇشىن ءمانى زور بىرقاتار مەرەيتويلىق داتا اتالىپ ءوتتى. ءبىز ۇلى وتان سوعىسىنداعى جەڭىستىڭ 80 جىلدىعىن لايىقتى دەڭگەيدە مەرەكەلەدىك. وسىلايشا, وتاندى قورعاۋ جانە ۇلى جەڭىسكە جەتۋ جولىندا الەم تاريحىندا بۇرىن-سوڭدى بولماعان بىرلىكتىڭ ۇلگىسىن پاش ەتكەن ناعىز باتىرلار مەن پاتريوتتاردى ەسكە الىپ, قۇرمەت كورسەتتىك. 

ايگىلى بايقوڭىر عارىش ايلاعىنىڭ 70 جىلدىعى دا ايتۋلى وقيعا بولدى. بۇل – عارىشتى يگەرۋ ىسىندە ۇزاق جىلدار بويى عىلىمي-تەحنيكالىق ىنتىماقتاستىعىمىزدى تانىتىپ كەلە جاتقان بىرەگەي جوبا. 

قازاقستان-رەسەي مەملەكەتتىك شەكاراسى تۋرالى شارتتىڭ 20 جىلدىعى – ماڭىزدى مەجە. ءبىزدىڭ قۇرلىق ارقىلى وتەتىن الەمدەگى ەڭ ۇزىن شەكارامىز – تاتۋ كورشىلىكتىڭ جارقىن سيمۆولى», - دەدى مەملەكەت باسشىسى.

قاسىم-جومارت توقاەۆ قازاقستان مەن رەسەيدىڭ قارىم-قاتىناسىن جان-جاقتى ستراتەگيالىق سەرىكتەستىك پەن وداقتاستىق دەڭگەيىنە جەتكىزۋ جونىندەگى دەكلاراتسيا تۋرالى پىكىر ءبىلدىردى.

«بۇل قۇجاتتىڭ تاريحي ءمانى زور. حالىقتارىمىز اراسىنداعى مىزعىماس ءوزارا سەنىم مەن ىنتىماقتاستىقتىڭ كەلەشەگى كەمەل ەكەنىن كورسەتەدى. 

وسى ورايدا ەكىجاقتى بايلانىستى نىعايتۋعا ەلەۋلى ۇلەس قوسقانى ءۇشىن ۆلاديمير ۆلاديميروۆيچ پۋتينگە شىنايى ريزاشىلىعىمدى بىلدىرەمىن. 

قازاقستاندىقتار رەسەي پرەزيدەنتىن جاھاندىق اۋقىمداعى مەملەكەت قايراتكەرى دەپ بىلەدى ءارى قۇرمەتتەيدى. ونىڭ ەسىمى الەمگە جاقسى ءمالىم جانە قازىرگى الماعايىپ زاماندا ورىس حالقى مەن رەسەي مەملەكەتىنىڭ مۇددەسىن قورعاۋ ىسىندە سەنىم مەن قاجىماس قايراتتىڭ سيمۆولى رەتىندە قابىلدانادى. 

قازاقستان رەسەي فەدەراتسياسىنىڭ وركەندەۋىنە شىن مانىندە مۇددەلى. بۇگىنگى كەلىسسوزدەر ناتيجەسىن جوعارى باعالايمىن. كەزدەسۋىمىز اشىق ءارى سەنىمدى راۋىشتە ءوتتى جانە ناقتى پايداسىن بەردى», - دەدى قازاقستان باسشىسى.

پرەزيدەنت بارلىق دەڭگەيدە قارقىندى ديالوگتى قولداۋعا ۋاعدالاسقانىن جەتكىزدى.

«ونەركاسىپ, ەنەرگەتيكا, كولىك-لوگيستيكا, اۋىل شارۋاشىلىعى, جوعارى تەحنولوگيالار, تسيفرلاندىرۋ, گۋمانيتارلىق ىقپالداستىق, سونداي-اق جاڭا ينفراقۇرىلىمدىق جوبالاردى جۇزەگە اسىرۋ ماسەلەلەرىنە باسا ءمان بەردىك. 

كۇردەلى حالىقارالىق احۋالعا قاراماستان ىنتىماقتاستىعىمىز حالىقتارىمىزدىڭ يگىلىگى جولىندا بەلسەندى دامىپ كەلە جاتقانىنا كوڭىلىمىز تولاتىنىن اتاپ وتتىك», - دەدى پرەزيدەنت.

قاسىم-جومارت توقاەۆ رەسەيدى قازاقستاننىڭ ماڭىزدى ساۋدا-ەكونوميكالىق جانە ينۆەستيتسيالىق سەرىكتەسى دەپ اتادى.

نەگىزگى كورسەتكىشتەر: 

2024 جىلدىڭ قورتىندىسى بويىنشا تاۋار اينالىمى شامامەن 28 ميلليارد دوللاردى, ال بيىلعى 8 ايدا 17 ميلليارد دوللاردان استى. 

مىندەت – ەكىجاقتى ساۋدا كولەمىن 30 ميلليارد دوللارعا دەيىن جەتكىزۋ.

رەسەيدەن قازاقستان ەكونوميكاسىنا قۇيىلعان تىكەلەي ينۆەستيتسيا كولەمى 27 ميلليارد دوللاردان استى.

2024 جىلى رەسەيدىڭ سالعان كاپيتال كولەمى رەكوردتىق 4 ميلليارد دوللارعا دەيىن ءوسىپ, ەلىمىزدىڭ ءىرى ينۆەستورىنا اينالدى.

قازاقستاننىڭ رەسەيگە قۇيعان ينۆەستيتسياسى دا ارتىپ, 15 جىلدا شامامەن 9 ميلليارد دوللارعا جەتتى.

قازاقستاندا رەسەيلىكتەردىڭ قاتىسۋىمەن 20 مىڭنان اسا كومپانيا جۇمىس ىستەيدى بۇل – ەلىمىزدە قىزمەت ەتەتىن شەتەلدىك كاپيتالى بار كاسىپورىنداردىڭ جارتىسىنا جۋىعى.

175 بىرلەسكەن جوبا جۇزەگە اسىرىلۋدا.

تاراپتار ىسكەرلىك بايلانىستاردىڭ جوعارى دەڭگەيىن ودان ءارى قولداۋعا جانە بيزنەس جۇرگىزۋگە قاجەتتى جاعداي جاساۋعا ۋاعدالاستى.

وسى ماقساتتا ەكونوميكالىق ىنتىماقتاستىقتىڭ 2030 جىلعا دەيىنگى كەشەندى باعدارلاماسى قابىلداندى.