تسيفرلىق كودەكسىنىڭ جوباسى جونىندە ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ءابۋتالىپ ءمۇتالى بۇگىن ءماجىلىستىڭ جالپى وتىرىسىنداعى سويلەگەن سوزىندە, بۇل قۇجات – ەلىمىزدەگى تسيفرلىق سالانىڭ ۇزاق مەرزىمدى دامۋىن ايقىندايتىن جانە ءتيىمدى ءارى اشىق تسيفرلىق ورتانى قالىپتاستىراتىن باستى قۇجات ەكەنىن اتاپ ءوتتى, دەپ جازادى Egemen.kz.
«وسى زاڭ جوباسىنىڭ ۇيىتقىسى بولعان ءبىزدىڭ دەپۋتات ارىپتەستەرىمىزدى ەرەكشە اتاپ وتكىم كەلەدى. بۇل – ءوز ۋاقىتىندا كوتەرىلگەن ءارى وتە ماڭىزدى باستاما, سەبەبى تسيفرلاندىرۋ ەكونوميكانىڭ دامۋىنا جانە مەملەكەتتىك باسقارۋدىڭ تيىمدىلىگىن ارتتىرۋعا ىقپال ەتەتىن نەگىزگى فاكتورلاردىڭ ءبىرى», دەدى دەپۋتات.
ءماجىلىس دەپۋتاتى ناقتى تارماقتارعا توقتالدى.
«تسيفرلاندىرۋ سالاسىندا ۇلتتىق دامۋ ينستيتۋتىن قۇرۋ تۋرالى تۇزەتۋ تالداۋ جۇمىستارىن جانە ساراپتامانى كۇشەيتۋگە باعىتتالعان قادام سياقتى كورىنەدى, الايدا بۇل ينستيتۋت ناقتى قانداي ىسپەن اينالىساتىنىن ءتۇسىنۋ قاجەت.
الدىڭعى تسيفرلىق باستامالاردىڭ تاريحى بىزگە ماڭىزدى تاعىلىم بەرەدى. «زەردە» حولدينگى باستاپقىدا تسيفرلىق دامۋدىڭ قوزعالتقىشى رەتىندە قۇرىلعانىمەن, ءىس جۇزىندە فۋنكتسيالاردىڭ شوعىرلانۋىنا, تيىمسىزدىككە جانە قاعازباستىلىققا الىپ كەلدى», دەدى ءابۋتالىپ ءمۇتالى.
دەربەس دەرەكتەردى قورعاۋ جانە كيبەرقاۋىپسىزدىك ماسەلەلەرىنە جەكە توقتالعىم كەلەتىنىن ايتقان ءا.ءمۇتالى كودەكس جوباسىندا بۇل ماسەلەلەرگە ارنالعان جەكە باپتار بار ەكەنىن, الايدا ولار تسيفرلىق ورتاداعى بارلىق قاتىسۋشىلاردىڭ مۇددەسىن ناقتى قورعاۋ ءۇشىن ءالى دە پىسىقتالۋى قاجەت ەكەنىن اتاپ ءوتتى.
«سوڭعى جىلدارى ەلىمىزدە ينتەرنەت-الاياقتىق پەن جەكە اقپاراتتى زاڭسىز پايدالانۋ كەڭ ەتەك جايىپ وتىر. بۇل جاعداي مەملەكەتتىك تە, جەكە سەكتوردىڭ دا اقپاراتتىق جۇيەلەرى تولىق قورعالماعاندىعىن كورسەتەدى.
بۇل نورمالاردىڭ پراكتيكالىق تيىمدىلىگىن كۇشەيتۋ قاجەت: دەربەس دەرەكتەر وپەراتورلارىنا بىرىڭعاي تالاپتار ەنگىزۋ, اقپاراتتىق جۇيەلەردى تۇراقتى اۋديتتەن وتكىزۋ, ءىت-جۇيەلەردى سەرتيفيكاتتاۋ جانە دەرەكتەردىڭ تارالۋ فاكتىلەرى تۋرالى ازاماتتار مەن ۋاكىلەتتى ورگاندارعا مىندەتتى تۇردە حابارلاۋ ءتارتىبىن بەلگىلەۋ قاجەت», دەدى دەپۋتات.
ماجىلىسمەننىڭ ايتۋىنشا وسى تەتىكتەردى ەنگىزۋ قاۋىپتەردى دەر كەزىندە انىقتاۋعا, كەلەڭسىز جاعدايلاردىڭ الدىن الۋعا جانە ازاماتتاردىڭ, بيزنەس پەن مەملەكەتتىڭ مۇددەسىن قورعاۋعا مۇمكىندىك بەرەدى. سونىمەن قاتار مۇنداي شارالار ەلدىڭ تسيفرلىق جانە ۇلتتىق قاۋىپسىزدىك ماقساتتارىن تىكەلەي قولدايدى.
«قورىتىندىلاي كەلە ايتارىم - تسيفرلاندىرۋدىڭ ءوزى تۇپكى ماقسات ەمەس ەكەنىن ايقىن ءتۇسىنۋىمىز قاجەت. ول – ادامداردىڭ ءومىر ءسۇرۋ ساپاسىن ارتتىرۋعا, بيزنەستىڭ دامۋىنا جانە مەملەكەتتىك باسقارۋدىڭ تيىمدىلىگىن كۇشەيتۋگە قىزمەت ەتەتىن قۇرال. ءبىزدىڭ نەگىزگى مىندەت – تسيفرلىق كودەكستى ءدال وسىنداي ءتيىمدى تەتىككە اينالدىرۋ. ول بيۋروكراتيانى كوبەيتەتىن نەمەسە جاڭا شەكتەۋلەر تۋدىراتىن قۇجاتقا اينالماۋى ءتيىس.
وسىلاي ەتكەندە عانا ءبىز اشىق, قاۋىپسىز جانە ءتيىمدى تسيفرلىق مەملەكەتكە بەرىك ىرگە بولاتىن قۇجاتتى قابىلداي الامىز.
ەكىنشى وقىلىمعا دەيىن جوعارىدا اتالعان بارلىق ماسەلەلەردى مۇقيات پىسىقتاۋ قاجەت», دەپ ءسوزىن تۇيىندەدى دەپۋتات ءابۋتالىپ ءمۇتالى.