كەشە «قازاقستان-2050» جالپىۇلتتىق قوزعالىسى قازاقستان حالقى اسسامبلەياسى كەڭەسىنىڭ قازاقستان پرەزيدەنتىنىڭ كەزەكتەن تىس سايلاۋىن وتكىزۋ تۋرالى باستاماسىنا وراي, ءوز مالىمدەمەسىن جاسادى. كەزدەسۋگە «قازاقستان-2050» جالپىۇلتتىق قوزعالىسىنىڭ توراعاسى دانات جۋمين مەن مەديا ديرەكتور قانات اۋەسباي قاتىستى.
بۇگىندە عالامدىق قارجىلىق-ەكونوميكالىق داعدارىس بارلىق مەملەكەتتەرگە ءوز تالاپتارىن قويىپ, دەگەندەرىن جاساتىپ جاتىر. الەمدە دىنارالىق جانە ۇلتارالىق توزىمسىزدىك ءورشىپ, قارۋلى قاقتىعىستار ۋشىعا تۇسۋدە. سىرتقى فاكتورلار الەمدىك ساياسي ساحنادا ورىن العان جاعدايلاردان ابىرويمەن شىعۋ ءۇشىن الدىن الۋ قادامدارىن جاساۋعا باستاپ وتىر. ال ءبىزدىڭ مەملەكەتىمىزدىڭ ول ءۇشىن بارلىق جاعدايى مەن مۇمكىندىكتەرى بار, دەدى ق.اۋەسباي ءوز سوزىندە. ونىڭ پىكىرىنشە, قازاقستان الەمدىك قوعامداستىق تاراپىنان الدەقاشان الەۋمەتتىك-ەكونوميكالىق جاڭعىرۋلاردىڭ كوشباسشىسى رەتىندە تانىلىپ وتىر ەكەن. سونداي-اق, ول الەمدە تولەرانتتىلىق پەن بىرلىكتىڭ, بەيبىتشىلىك پەن كەلىسىمنىڭ قازاقستاندىق مودەلى تۋرالى ءجيى ايتىلاتىنىن دا تىلگە تيەك ەتتى.
ءبىز كەزەكتەن تىس سايلاۋدىڭ سىرتقى قاۋىپ-قاتەرلەرگە بەرىلگەن ناقتى جاۋاپ ەكەنىن قۋاتتايمىز. سونداي-اق, داعدارىستىڭ الدىن الۋدى كوزدەيتىن, ەلىمىزدىڭ الەمنىڭ دامىعان 30 ەلىنىڭ قاتارىنا ەنۋىن قامتاماسىز ەتەتىن «قازاقستان-2050» ستراتەگياسىنىڭ ءارى قاراي جۇزەگە اسىرىلۋىن قولدايمىز. بۇل – ەلباسى, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ ساياسي باعدارى. پرەزيدەنتتىك سايلاۋ قازاقستاننىڭ دامۋىنا جانە ازاماتتاردىڭ ءال-اۋقاتىن ارتتىرۋعا وڭ ىقپال ەتەتىنىنە سەنىمدىمىز, دەدى ءسوزىنىڭ سوڭىندا قوزعالىستىڭ مەديا ديرەكتورى.
ءلايلا ەدىلقىزى,
«ەگەمەن قازاقستان».
استانا.