شەبەردىڭ قولى ورتاق

ەرمەك بايىمبەتوۆا,

بالقاش اۋدانى باقاناس اۋىلىنىڭ تۇرعىنى:

– مونشاقتان ءتۇرلى بۇيىم مەن سىيكادەلەر جاساۋدى 20 جىلدان بۇرىن قانداستاردان ۇيرەن­گەن ەدىم. مىنە, زەينەتكە شىققالى 6 جىلعا اياق باستى. ەڭ باستى ەرمەگىمە ءارى ازعانتاي بولسا دا تابىس تابۋىما سەپ بولىپ وتىر. ءار بۇيىم زور ىقىلاس, شىنايى شابىتپەن جاسالادى. مىسالى, كۇنى كەشە اياقتاعان مىنا قۇمىراعا 300 گرامنان ارتىق مونشاق كەتتى.

ەڭلىك داۋلەتكەلدى,

كەگەن اۋدانىنان كەلگەن تىگىنشى:

– كەگەن اۋىلىندا جەكە كاسىپكەر مەرۋەرت نۇرعازيەۆا جەتەكشىلىك ەتەتىن قازاقى كيىمدەر تىگەتىن شەبەرحانامىز بار. 2014 جىلدان بەرى جۇمىس ىستەيدى. پرەزيدەنتىمىزدىڭ «ۇلتتىق ناقىشتى ۇلىقتايىق!» اتتى تاپسىرماسىنا وراي, ويۋلى كوستيۋم, بۇرمەلى كويلەك, ۇكىلى تاقيا تىگۋدى جانداندىرىپ كەلەمىز. جىلدىق وندىرىستىك قۋاتى – 1 000 دانا كيىم تىگۋ. بيىل اۋداندىق «ونەر» مەكتەبىنىڭ ونەرپازدار ۇجىمىنا, سونداي-اق مەملەكەتتىك, الەۋمەتتىك سالا قىزمەتكەرلەرىنە ارناپ كوستيۋمدەر تىكتىك. بۇدان بولەك, قالا, اۋىلدىق جەرلەر­دەگى بالاباقشالاردان, مەكتەپتەردەن ارنايى تاپسىرىس­تار قابىلدايمىز. سەبەبى جۇما كۇنى اۋداننىڭ ءبىلىم مەكەمەلەرىندە وقۋشىلار ۇلتتىق ناقىشتا فورما كيۋدى داستۇرگە اينالدىرعان. كيىمنىڭ بارلىعىنا قاجەت ويۋ-ورنەكتەر قولمەن جاسالادى. ساپالى بولۋىنا باسا نازار اۋدارىلادى. تىگىن تسەحىندا 3 شەبەر جۇمىس ىستەيمىز. تاپسىرىسقا قاراي كۇ­نىنە 10 شاقتى, اپتاسىنا 100 شاقتى وقۋشىلار فورماسى تىگىلە­دى. وعان قوسا توقىما زاتتار, بيسەردەن بۇيىمدار جاسايمىز.

ەلۆيرا سپانوۆا,

الاتاۋ قالاسى جەتىگەن شاعىن اۋدانىنىڭ تۇرعىنى, شەبەر:

– بيىلعى جىلى قۇراق كورپە­لەرىممەن 660 قۇراقشى الەمدىك رەكورد جاساعان «اlaman Quraq-2025» جوباسىنا قاتىسىپ, ارنايى سەرتيفيكات الدىم. بۇل جەتىستىك مەنى قاناتتاندىرا ءتۇستى. ۇيدە ءىس تىگەمىن. ءۇش بالا ءوسىرىپ وتىرمىن, ونىڭ بىرەۋى ەرەكشە بالا, بيىل 18 جاسقا تولادى. قۇراق قۇراۋدىڭ ادام ومىرىنە اسەرى زور, وعان قوسا كۇنكورىسكە دە سەپتەسەدى.