اۆتوموبيل ونەركاسىبى – ەل ەكونوميكاسىنىڭ ماڭىزدى سالالارىنىڭ ءبىرى. بۇگىندە ەلىمىزدە اۆتوكولىك قۇراستىرۋ كولەمى ارتىپ كەلە جاتقانىمەن, قوسالقى بولشەكتەردىڭ باسىم بولىگى شەتەلدەن اكەلىنەدى. وسىعان بايلانىستى مەملەكەت تاراپىنان اۆتوقۇراستىرۋ زاۋىتتارىن وتاندىق ونىمدەرمەن قامتاماسىز ەتۋ مىندەتى قويىلىپ وتىر.
وسى باعىتتا قولعا الىنعان «QazElastoPlast» زاۋىتىنىڭ اشىلۋى – ءوڭىردىڭ وندىرىستىك الەۋەتىن ارتتىرۋعا باعىتتالعان ناقتى قادام. زاۋىت ەلىمىزدىڭ اۆتووندىرۋشىلەرىنە قاجەتتى اۆتوكومپونەنتتەر ءوندىرىسىن جولعا قويۋدى كوزدەيدى.
جوبانىڭ ينۆەستيتسيا كولەمى 600 ميلليون تەڭگەنى قۇرايدى. بۇل قاراجات زاماناۋي ەۋروپالىق قۇرال-جابدىقتاردى ساتىپ الۋعا, ءوندىرىس تەحنولوگياسىن جەتىلدىرۋگە, جوعارى ساپالى ءونىم شىعاراتىن ءوندىرىس جەلىسىن ىسكە قوسۋعا باعىتتالدى.
كاسىپورىن جىلىنا 150 مىڭ جيىنتىق ءاۆتوونىم شىعارۋعا قاۋقارلى. بۇل كورسەتكىش ىشكى نارىقتاعى سۇرانىستى تولىقتاي قاناعاتتاندىرىپ, شەتەلدەن اكەلىنەتىن ونىمدەرگە تاۋەلدىلىكتى ايتارلىقتاي تومەندەتەدى.
بۇگىندە زاۋىتتا 30 ادام تۇراقتى جۇمىسپەن قامتىلعان, بۇل – جەرگىلىكتى تۇرعىندارعا ماڭىزدى الەۋمەتتىك قولداۋ. جۇمىسشىلاردىڭ ورتاشا ايلىق جالاقىسى – 250 مىڭ تەڭگە. بولاشاقتا ءوندىرىس كولەمى ارتقان سايىن جاڭا جۇمىس ورىندارى اشىلىپ, قىزمەتكەرلەر سانى دا كوبەيە تۇسەدى.
زاۋىتتا شىعارىلاتىن ءونىم تۇرلەرى اۆتوموبيل ونەركاسىبىنىڭ نەگىزگى قاجەتتىلىكتەرىن قامتيدى. تارقاتىپ ايتار بولساق, تەرموەلاستوپلاستتان جاسالعان كىلەمشەلەر, ءتۇرلى ۇلگىدەگى اۆتوموبيل توسەنىشتەرى, شاشىراتقىشتار, تىعىزداعىش رەزەڭكە تاسپالار. كاسىپورىن «Hyundai» ماركاسىنىڭ ءۇش مودەلىنە ارنالعان بولشەكتەردى شىعارىپ جاتىر. الداعى ۋاقىتتا ءونىم تۇرلەرىن كوبەيتىپ, ونىمدىلىكتى ارتتىرۋدى كوزدەپ وتىر.
بۇل ونىمدەر ەلىمىزدىڭ اۆتوكولىك قۇراستىراتىن زاۋىتتارىنا اسا قاجەت. بۇعان دەيىن مۇنداي بولشەكتەر نەگىزىنەن رەسەي, قىتاي, باسقا دا ەلدەردەن يمپورتتالاتىن. ەندى «QazElastoPlast» زاۋىتىنىڭ جۇمىسى ارقاسىندا وتاندىق اۆتوونەركاسىپ تولىققاندى جەرگىلىكتى ونىمگە سۇيەنىپ جۇمىس ىستەۋگە مۇمكىندىك الادى.
زاۋىتتىڭ اشىلۋى تەك وندىرىستىك سالاعا عانا ەمەس, الەۋمەتتىك باعىتقا دا وڭ اسەرىن تيگىزەدى. جاڭا جۇمىس ورىندارىنىڭ پايدا بولۋى – جەرگىلىكتى تۇرعىندارعا تۇراقتى تابىس كوزى. سونىمەن قاتار كاسىپورىننان تۇسەتىن سالىق تۇسىمدەرى اۋداندىق, وبلىستىق بيۋدجەتتەردىڭ كىرىسىن ارتتىرىپ, الەۋمەتتىك جوبالاردى قارجىلاندىرۋعا مۇمكىندىك بەرەدى. جامبىل اۋدانى اكىمىنىڭ ورىنباسارى اقنيەت تۇماتاەۆ ءوز سوزىندە زاۋىتتىڭ اشىلۋى ءوڭىر ەكونوميكاسىنداعى ۇلكەن جەتىستىك ەكەنىن اتاپ ءوتتى.
– بۇل جوبا ءبىزدىڭ اۋداننىڭ وندىرىستىك الەۋەتىن ارتتىرىپ قانا قويماي, ەلىمىزدەگى اۆتوونەركاسىپتىڭ دامۋىنا جاڭا سەرپىن بەرەدى. مەملەكەت تاراپىنان كورسەتىلىپ وتىرعان قولداۋ ناتيجەسىندە وسىنداي زاماناۋي كاسىپورىندار ىسكە قوسىلىپ جاتىر. بۇل يمپورتتى الماستىرۋ ساياساتىنىڭ ناقتى كورىنىسى. قازىبەك اۋىلدىق وكرۋگىندە جالپى كولەمى 960 گەكتاردى قۇرايتىن يندۋستريالىق ايماق قۇرۋ جوسپاردا بار, – دەدى ول.
«QazElastoPlast» زاۋىتى ءونىم ساپاسىنا ەرەكشە ءمان بەرەدى. ءوندىرىس ۇدەرىسىندە ەكولوگيالىق تالاپتارعا ساي, حالىقارالىق ستاندارتتارعا سايكەس كەلەتىن ماتەريالدار قولدانىلادى. زاۋىتتا ورناتىلعان زاماناۋي تەحنولوگيالار ءونىمنىڭ ۇزاق مەرزىمدىلىگىن, بەرىكتىگىن, قاۋىپسىزدىگىن قامتاماسىز ەتەدى.
كاسىپورىن ماماندارى ۇزدىكسىز وقىتۋدان ءوتىپ, ءوندىرىس تەحنولوگيالارىن جەتىلدىرۋمەن اينالىسادى. بولاشاقتا زاۋىتتىڭ عىلىمي-زەرتتەۋ ءبولىمى قۇرىلىپ, جاڭا ۇلگىدەگى اۆتوكومپونەنتتەردى ازىرلەۋ جوسپارلانىپ وتىر.
ساراپشىلاردىڭ ايتۋىنشا, «QazElastoPlast» زاۋىتى ەلىمىزدەگى اۆتوكومپونەنتتەر ءوندىرىسىن جاڭا دەڭگەيگە كوتەرەدى. بۇل وتاندىق اۆتوونەركاسىپ ءۇشىن اسا ماڭىزدى, سەبەبى قوسالقى بولشەكتەردىڭ جەرگىلىكتى ءوندىرىسى اۆتوموبيل باعاسىن تومەندەتىپ, نارىقتاعى باسەكەگە قابىلەتتىلىكتى ارتتىرادى. سونىمەن قاتار جوبا ەلىمىزدىڭ يندۋستريالىق-يننوۆاتسيالىق دامۋ باعدارلاماسىنا تولىق سايكەس كەلەدى, وڭىرلىك ەكونوميكانى ارتاراپتاندىرۋعا ۇلەس قوسادى.
الماتى وبلىسى