كەشە تۇركيادان سۇيىنشىلەگەن حابار جەتتى. انكارادا وتكەن اپتانىڭ سوڭىندا تۇركى دۇنيەسىنىڭ ءبىر تاراۋى رەتىندە قازاق كۇيلەرى سالتانات قۇرعانىن ەستىگەن قۇلاق بار شىعار. وعان وتانىمىزدان شەرتپە كۇيدىڭ وكىلدەرى جانعالي ءجۇزباي مەن قايرات ايتباەۆ جەتىپ, تاتتىمبەت بابامىزدىڭ 210 جىلدىعىنا ارنالعان كونتسەرت-كەزدەسۋدە كۇي يەسىنىڭ قوسباسارلار شەرۋىن جوسىلدىرسا كەرەك.
ودان كەيىن تۇركيانىڭ الانيا قالاسىندا مەديا سالاسى ماماندارىنىڭ V حالىقارالىق كەڭەسىندە بەلگىلى كۇيشى, ۇستاز جانعالي ءجۇزباي ىسمايىل گاسپرالى اتىنداعى سىيلىقپەن ماراپاتتالدى. بۇل سىيلىق تۇركى الەمىنىڭ بىرلىگى مەن مادەني بايلانىسىن نىعايتۋ ماقساتىندا بەرىلەدى. حالقىمىزدىڭ كۇي ونەرىنە ەرەن ەڭبەك ءسىڭىرىپ جۇرگەن جانعالي ءجۇزباي الەمنىڭ 41 مەملەكەتىنەن 310 مەديا سالاسىنىڭ ماماندارى قاتىسقان حالىقارالىق كەڭەستە ىسمايىل گاسپرالى سىيلىعىمەن ماراپاتتالۋى – ۇلتتىق دومبىرا اسپابىنىڭ بەدەلىن حالىقارالىق دەڭگەيگە كوتەرۋ بولسا, قازاق مادەنيەتىن وزگەشەلەپ تۇراتىن كۇي ونەرىنە قۇرمەت دەپ قابىلدادىق. بۇعان دەيىن سىيلىق «تۇركى ءدۇنياسىنا سىڭىرگەن ەڭبەگى ءۇشىن» دەپ اتالاتىن. ساياساتكەرلەر, عالىمدار, ونەرپازدار مەن باق وكىلدەرىنە بەرىلىپ كەلە جاتقان ماراپات بيىلدان باستاپ عالىمدار ءۇشىن «ىسمايىل گاسپرالى سىيلىعى» رەتىندە تاعايىندالىپ وتىر.
كەزىندە بۇل سىيلىقپەن دۇنيە جۇزىنە تانىمال تۇلعالار ماراپاتتالعانى بەلگىلى. ماسەلەن, تۇركيانىڭ ەكس-سىرتقى ىستەر ءمينيسترى, سولتۇستىك ماكەدونيا پارلامەنتىنىڭ توراعاسى, حالىقارالىق تۇركسوي ۇيىمىنىڭ باس حاتشىسى, بەلگىلى باق وكىلدەرى, تۇركى ءدۇنياسىنا ەڭبەك ءسىڭىرىپ جۇرگەن عالىمدار مەن ونەرپازدار بار.
قازاق ونەرى مەن مادەنيەتىنىڭ وزگەشە سيپاتى دومبىرا مەن كۇي ونەرىنە قۇرمەتىمىز ارتقان سايىن ءباسىمىز حالىقارالىق دەڭگەيدە دە جوعارىلارى انىق. ەلىمىزدە ۇلتتىق دومبىرا كۇنى بار, انكارادا تاتتىمبەت ەسكەرتكىشى تۇر, ونىڭ ونەرىن ۇستاعاندار مۇنداي ماراپات العانى – ۇلت مادەنيەتىنىڭ ۇپايى دەسەك ارتىق ەمەس.