كەشە پرەمەر-ءمينيستردىڭ ورىنباسارى بەردىبەك ساپارباەۆ جۇمىس بابىمەن الماتى قالاسىندا بولدى, دەپ حابارلادى پرەمەر-ءمينيستردىڭ ءباسپاسوز قىزمەتى.
ساپار بارىسىندا ب.ساپارباەۆ بىرقاتار ءبىلىم بەرۋ نىساندارىن ارالادى. اتاپ ايتقاندا, ۆيتسە-پرەمەر ءال-فارابي اتىنداعى قازاق ۇلتتىق ۋنيۆەرسيتەتى مەن الماتى مەملەكەتتىك بيزنەس كوللەدجى باسشىلىعىمەن جانە ستۋدەنتتەرىمەن كەزدەستى. قازۇۋ-دا ب.ساپارباەۆ عىلىمي-تەحنولوگيالىق پاركتە بولىپ, وندا جۇزەگە اسىرىلىپ جاتقان جوبالارمەن تانىستى. «كەرەمەت» ستۋدەنتتەرگە قىزمەت كورسەتۋ ورتالىعىندا ۆيتسە-پرەمەرگە وڭتۇستىككورەيالىق ارىپتەستەرمەن بىرلەسىپ جاسالعان مەديتسينالىق دياگنوستيكالىق ورتالىق مۇمكىندىكتەرى كورسەتىلدى.
الماتى جوو-لارى رەكتورلارىنىڭ وڭىرلىك كەڭەسىندە قازاقستاندىق ۋنيۆەرسيتەتتەردىڭ الەمدىك ءبىلىم بەرۋ كەڭىستىگىندەگى باسەكەگە قابىلەتتىلىگىن ارتتىرۋ ماسەلەسى ۇسىنىلدى. وعان قاتىسۋشىلار ءبىلىم بەرۋ ساپاسىن ارتتىرۋ, ەڭبەك رىنوگى سۇرانىستارىن زەرتتەۋ, سونداي-اق, ەل ەكونوميكاسىنىڭ سالالارى ءۇشىن جوعارى بىلىكتى ماماندار دايارلاۋ ماسەلەلەرىن تالقىلادى.
كۇننىڭ ەكىنشى جارتىسىندا ۆيتسە-پرەمەر بىرقاتار سپورتتىق جانە ينفراقۇرىلىمدىق نىسانداردىڭ قۇرىلىس الاڭدارىندا بولىپ, 2017 جىلعى قىسقى ۋنيۆەرسيادانى وتكىزۋگە الماتىنىڭ دايىندىعى بارىسىمەن تانىستى.
ودان كەيىن بولعان كەڭەستە الماتىنىڭ سپورتتىق ينفراقۇرىلىمىن دامىتۋ, 2017 جىلعى ۋنيۆەرسياداعا دايىندىق ماسەلەلەرى قارالىپ, حالىقارالىق وليمپيادالىق كوميتەتتىڭ باعالاۋ كوميسسياسى ساپارىنىڭ قورىتىندىلارى تۋرالى ەسەپ تىڭدالدى.
كەڭەستى قورىتىندىلاي كەلە, ب.ساپارباەۆ ۋنيۆەرسيادا-2017-ءنىڭ نىساندارى قۇرىلىسىن ساپالى جانە ۋاقتىلى اياقتاۋ قاجەتتىگىن, بۇل ماسەلەلەردىڭ ۇنەمى مەملەكەت باسشىسى نازارىندا تۇرعانىن اتاپ كورسەتتى.