قازاقستاندىق Alatau City Bank يەسى ۆياچەسلاۆ كيم مەن DDH (North America) Inc. كومپانياسى قازاقستان رەسپۋبليكاسىنىڭ جاساندى ينتەللەكت جانە تسيفرلىق دامۋ مينيسترلىگىنىڭ قولداۋىمەن قۇنى 300 ميلليون دوللار بولاتىن ءوزارا تۇسىنىستىك تۋرالى مەموراندۋمعا قول قويدى, دەپ حابارلايدى Egemen.kz.
ماقساتى - تسيفرلىق ماينينگ سالاسىنداعى ستراتەگيالىق سەرىكتەستىكتى نىعايتۋ, ەنەرگەتيكالىق جانە ەسەپتەۋ ينفراقۇرىلىمىن جاڭعىرتۋ, ەلدە زاماناۋي دەرەكتەردى وڭدەۋ ورتالىقتارىن قۇرۋ, ماينينگ سالاسىنداعى اشىقتىق پەن تيىمدىلىكتى ارتتىرۋ ءۇشىن ينۆەستيتسيا تارتۋ.
«ەلىمىز تسيفرلىق اكتيۆ سالاسىنداعى ىنتىماقتاستىقتى اشىق تۇردە جۇرگىزەدى. قازاقستاندىق ينۆەستور مەن امەريكالىق ماينينگ كومپانياسى اراسىنداعى مەموراندۋمعا قول قويۋ - حالىقارالىق ارىپتەستىككە, تەحنولوگيا الماسۋ جانە ورنىقتى ينۆەستيتسيالىق بايلانىستاردى دامىتۋعا دەگەن ۇستانىمدى كورسەتەدى. بۇل وزىق تاجىريبەنى پايدالانۋ, قۇزىرەتتەردى كۇشەيتۋ جانە تسيفرلىق ماينينگ پەن جاساندى ينتەللەكت سالالارىندا بىرلەسكەن يننوۆاتسيانى دامىتۋ ءۇشىن بەرىلگەن مۇمكىندىك. مۇنداي جوبالار قازاقستاننىڭ جاھاندىق تسيفرلىق ەكونوميكاداعى سەنىمدى جانە جاۋاپتى سەرىكتەس رەتىندەگى مارتەبەسىن نىعايتۋعا ىقپال ەتەدى», دەپ اتاپ ءوتتى قازاقستان رەسپۋبليكاسى پرەمەر-ءمينيسترىنىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.
Alatau City Bank يەسى ۆياچەسلاۆ كيمنىڭ ايتۋىنشا, دەرەكتەردى وڭدەۋ نارىعىنداعى الەمدەگى جەتەكشى كومپانيالاردىڭ بىرىمەن مەموراندۋمعا قول قويۋ – قازاقستاندىق بيزنەستىڭ اقپاراتتىق تەحنولوگيا, تسيفرلىق اكتيۆتى دامىتۋ, جاساندى ينتەللەكت جانە قازاقستان ەكونوميكاسى ءۇشىن باسىم باعىتتاعى باسقا دا سالالارداعى حالىقارالىق ارىپتەستىكتى نىعايتۋعا باعىتتالعان.
ءبىز بۇل سەرىكتەستىكتى تەك ينۆەستيتسيالىق جوبا رەتىندە عانا ەمەس, يننوۆاتسيالاردى جەتكىزۋ, ەنەرگەتيكالىق جانە ەسەپتەۋ ينفراقۇرىلىم سالاسىنداعى ساراپتامانى ارتتىرۋدىڭ, بۇلتتى تەحنولوگيالاردى جانە بولاشاقتىڭ تسيفرلىق ەكونوميكاسىنىڭ باسقا دا اجىراماس ەلەمەنتتەرىنە قاتىستى بىرەگەي مۇمكىندىك رەتىندە قاراستىرامىز», دەپ اتاپ ءوتتى ول.
ايتا كەتەيىك, DDH (North America) Inc. اقش-تا تسيفرلىق ماينينگ سالاسىندا جۇمىس ىستەيدى. كومپانيا دەرەكتەر ورتالىقتارىن باسقارادى جانە جوعارى جۇكتەمەلى جۇيەلەر سالاسىنداعى وزىق تەحنولوگيالاردى ەنگىزەدى, سول ارقىلى تسيفرلىق اكتيۆتەر ماينينگىنە ارنالعان تۇراقتى جانە ءتيىمدى ينفراقۇرىلىمدى قامتاماسىز ەتەدى.