باس شاھاردىڭ بەلسەندى ۇزاق ءومىر ءسۇرۋ ورتالىقتارىندا 25 ءتۇرلى باعىت بويىنشا ۇيىرمەلەر جۇمىس ىستەيدى. 17 مىڭنان استام زەينەتكەر اتالعان ورتالىقتاردىڭ قىزمەتىن تۇراقتى تۇردە پايدالانسا, بيىل 4 090 زەينەتكەر تىركەلىپ, قىزمەت الا باستاعان, دەپ جازادى Egemen.kz.
وسى جىلدىڭ وزىندە ورتالىق 13 721 زەينەتكەرگە 444 216-دان استام الەۋمەتتىك قىزمەت كورسەتكەن. كۇن سايىن ورتالىقتىڭ 6 اۋداندىق بولىمشەسىنە 2 500-دەن استام ادام كەلىپ, بەلسەندى ءومىر سالتىن جالعاستىرىپ ءجۇر, ەڭ بەلسەندى قاتىسۋشىلار – ايەل زەينەتكەرلەر. مىسالى, ەڭبەك تەراپياسىنا 733 ادام, تىگىن الىپپەسىنە 248 ادام, ارت-تەراپياعا 734 ادام, ال قۇم تەراپياسىنا 248 ادام قاتىسقان.
ەلوردا اكىمدىگىنىڭ رەسمي سايتىنىڭ مالىمەتىنشە, سونىمەن قاتار زەينەتكەرلەر ءوز قىزىعۋشىلىقتارىنا قاراي 25-تەن اسا ءتۇرلى كلۋبقا قاتىسا الادى. اتاپ ايتقاندا: «اتادان بالاعا امانات», «زياتكەرلىك ويىندار», «Speaking English», «وقۋ جانە پوەزيا كلۋبى», «كۇمىس ەرىكتىلەر», «حور جانە ۆوكال», «ۆولەيبول», «ۇستەل تەننيسى», «گيتارادا ويناۋ», «دومبىرا ۇيرەنۋ», «دومبىرا وركەسترى», «كاراوكە», «كىلەم توقۋ», «ۇرشىق ءيىرۋ», «سالاۋاتتى ءومىر سالتى», «كومپيۋتەرلىك ساۋاتتىلىق», ء«تىل شاڭىراعى», «اجەلەر 80+», «كيىم ۇلگىلەرىن كورسەتۋ» جانە تاعى باسقا كلۋبتار بار. سونداي-اق, ساۋىقتىرۋ باعىتىندا تسيگۋن, كۋن-فۋ جانە بي سەكىلدى قوزعالىس بەلسەندىلىگىن ارتتىراتىن كلۋبتار جۇمىس ىستەيدى.