«جولاۋشىلار تاسىمالى» اق مەرەكە قارساڭىندا تەمىرجول بيلەتتەرىنىڭ قۇنى وزگەرمەيتىنىن ايتتى, دەپ حابارلايدى Egemen.kz.
كومپانيانىڭ حابارلاۋىنشا, الداعى مەرەكەلىك كەزەڭدە بيلەتتەر باعاسى وزگەرىسسىز قالادى, الايدا جولاۋشىلاردى قامتاماسىز ەتۋ ءۇشىن قوسىمشا ۆاگوندار قوسىلادى. بۇل اسىرەسە سۇرانىسى جوعارى استانا - الماتى; استانا - شىمكەنت, اقتوبە - استانا باعىتتارىنا قاتىستى.
بۇعان دەيىن «جولاۋشىلار تاسىمالى» اق شۆەيتساريالىق Stadler كومپانياسىمەن ءارتۇرلى ۇلگىدەگى 557 جاڭا ۆاگون جەتكىزۋ تۋرالى كەلىسىم جاساعان. ولاردىڭ ىشىندە كۋپە جانە پلاتسكارت ۆاگوندارى, ەرەكشە قاجەتتىلىكتەرى بار جولاۋشىلارعا ارنالعان بەيىمدەلگەن ۆاگوندار, سونداي-اق گەنەراتورلى ۆاگوندار بار.
جاڭا بۋىنداعى پويىزدار 2026 جىلدىڭ قاڭتارىنان باستاپ تۇراقتى باعىتتارعا شىعارىلادى. زاماناۋي ۆاگونداردا كونديتسيونەرلەر, بەينەباقىلاۋ, ءورت ءسوندىرۋ جۇيەسى, ءار ورىنعا ارنالعان روزەتكالار مەن USB-ۇياشىقتار ورناتىلادى.
كومپانيانىڭ مالىمەتىنشە, جاڭا ۆاگونداردىڭ ىسكە قوسىلۋى بيلەت باعاسىنا اسەر ەتپەيدى.
«جولاۋشىلار ءۇشىن جول اقىسى بەكىتىلگەن تاريف شەگىندە ساقتالادى جانە جاڭا ۆاگونداردىڭ ەنگىزىلۋىنە بايلانىستى قىمباتتامايدى», دەپ حابارلادى «جولاۋشىلار تاسىمالى» اق.