اقتوبە وبلىسىندا اليمەنت ءوندىرۋ بويىنشا جەكە سوت ورىنداۋشىلارىنا كەلىپ تۇسكەن 16 916 ءىستىڭ 2 756-ى عانا اياقتالعان. 14 مىڭنان استامى ءالى دە ورىندالماي تۇر, دەپ جازادى Egemen.kz.
«وڭىردەگى 97 سوت ورىنداۋشىسى ەڭ ءبىرىنشى كەزەكتە كامەلەتكە تولماعان بالالارعا اليمەنت ءوندىرۋ, زاڭسىز جۇمىستان بوساتىلعاندار قۇقىعىن قالپىنا كەلتىرۋ مەن ەڭبەكاقى قارىزدارىن الا الماي جۇرگەندەردىڭ ىسىمەن شۇعىلدانادى. ءتۇرلى كەدەرگىگە قاراماستان وسى باعىتتا جۇمىس جالعاسىپ كەلەدى. سونىڭ دالەلى, وسى جىلى اليمەنت تولەۋدەن جالتارعاندارعا قاتىستى 425 اكىمشىلىك ءىس قوزعالىپ, 69 بورىشكەرگە ايىپپۇل سالىندى, 356 ادام اكىمشىلىك قاماۋعا الىندى», دەيدى اقتوبە وبلىسى بويىنشا جەكە سوت ورىنداۋشىلارى وڭىرلىك پالاتاسى باسشىسىنىڭ ورىنباسارى قايرات تاڭقاەۆ.
سالىستىرمالى تۇردە قاراعاندا, جەكە سوت ورىنداۋشىلارىنىڭ قولىنداعى اليمەنت ءوندىرۋ ىستەرىنىڭ مەملەكەت پايداسىنا بەرەشەكتەردى وندىرۋگە قاراعاندا سانى از. ماسەلەن, مەملەكەت كىرىسىنە بەرەشەكتەردى ءوندىرىپ الۋ بويىنشا تىركەلگەن 48 مىڭنان استام اتقارۋشىلىق قۇجاتتىڭ 27 مىڭى تولىق ورىندالعان. قالىپ تۇرعانى – 21 مىڭنان استام ءىس.
سوت ورىنداۋشىلارى بەرەشەك قارىزدارىن تولەۋدەن جالتارىپ جۇرگەندەرگە قاتىستى ءتۇرلى امالعا بارادى. سونىڭ ەڭ ءتيىمدىسى – كوشەدەگى رەيدتىك شارالار.
«بورىشكەرلەردى كوشەدە توقتاتىپ, كولىكتەرىن ايىپتۇراقتارعا سالۋ – قارىزدى وتەۋدىڭ ەڭ تەز ناتيجە بەرەتىن ءادىسى», دەيدى سوت ورىنداۋشىلارى.