ورال قالاسىندا پرەمەر-مينيستر ولجاس بەكتەنوۆ مەملەكەت باسشىسىنىڭ ينفراقۇرىلىمدى دامىتۋ جانە اباتتاندىرۋ, سونداي-اق سۋ تاسقىنىنىڭ الدىن الۋ شارالارى جونىندەگى تاپسىرمالارىنىڭ ورىندالۋ بارىسىمەن تانىستى. اتاپ ايتقاندا, 2024 جىلعى سۋ تاسقىنىنان زارداپ شەككەن وتباسىلار ءۇشىن سالىنعان ۇيلەردى جانە جايىق وزەنى بويىنداعى جاعالاۋدى نىعايتۋ جۇمىستارىنىڭ ناتيجەسىن كوردى, دەپ حابارلايدى Egemen.kz.
باتىس قازاقستان وبلىسىندا سۋ تاسقىنىنان زارداپ شەككەن وتباسىلار ءۇشىن بارلىعى 889 ءۇي سالىنعان, ونىڭ ىشىندە ورال قالاسىندا – 451 تۇرعىن ءۇي. قۇرىلىس جۇمىستارى 2024 جىلدىڭ قىركۇيەگىندە تولىعىمەن اياقتالىپ, وتباسىلارعا بەرىلدى. بۇگىنگى تاڭدا بارلىق ۇيلەر قاجەتتى ينجەنەرلىك ينفراقۇرىلىممەن قامتاماسىز ەتىلگەن.
سونداي-اق پرەمەر-مينيستر جايىق وزەنىنىڭ بويىنداعى جاعالاۋدى نىعايتۋ جانە رەكونسترۋكتسيالاۋ جۇمىستارىمەن تانىستى. وزەننىڭ جاعالاۋى مەن ارناسىن, تۇرعىن ۇيلەردى تاسقىننان قورعاۋ ءۇشىن ۇزىندىعى 383,6 مەتر بوگەت سالىنعان. جالپى, ەلدى مەكەندەردى سۋ تاسقىنىنان قورعاۋ ءۇشىن وبلىستا 143 شاقىرىم قورعانىس بوگەتتەرى, 9 شاقىرىم سۋ بۇرۋ كانالدارى سالىنىپ, 74 شاقىرىم ماگيسترالدى كانالدار تازارتىلعان.
ۇكىمەتتىڭ ءباسپاسوز قىزمەتىنىڭ مالىمدەۋىنشە, جاعالاۋدى رەكونسترۋكتسيالاۋ وسى جىلدىڭ مامىر-قىركۇيەك ايلارى ارالىعىندا جۇرگىزىلدى. جوباعا سايكەس, سۋ تاسقىنىنان قورعاۋ ماقساتىندا وزەن جاعالاۋى بۇرىنعىدان دا بيىكتەتىلدى. بارلىق اۋماق تولىعىمەن اباتتاندىرىلىپ, قورشاۋلار ورناتىلدى.
8 مىڭ شارشى مەتر الاڭعا تروتۋارلار توسەلدى, 102 كوشە شامدارى ورناتىلدى, 16 مىڭ شارشى مەتردەن استام كوگال مەن 768 اعاش كوشەتتەرى وتىرعىزىلدى. بالالار ويىن الاڭى, سپورت الاڭى, ۆوركاۋت-ايماق جانە تاعى دا باسقا نىساندار رەكونسترۋكتسيالاندى.