جەر اياعى كەڭىپ, سۋدىڭ تارتىلعاندىعى تۋرالى قۋانىشتى حاباردى نۇح پايعامباردىڭ كەمەسىنە كوگەرشىن جەتكىزگەن كورىنەدى. ءبىزدىڭ دە كەمەدەي ەلىمىز جاڭا استانا ىزدەپ تاريح تولقىنىندا قايراڭداعان كەزىندە ءوزىنىڭ العاشقى كوگەرشىندەرىن جىبەردى. ولاردىڭ ىشىندە قازىرگى ەلوردامىزدىڭ مادەنيەتىن كوتەرۋگە ەرەكشە ەڭبەك ەتكەن ونەرپازدار بار ەدى. ولار – كۇيشى انار مۇزداحانوۆا مەن قوبىزشى جانار ءجۇسىپوۆا.
كۇيشىلەرمەن كەزدەسۋ ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ءوتتى. «كاۋسار» مادەني-تانىمدىق بىرلەستىگىنىڭ ىجداعاتىمەن وتكەن كەشتە كۇمبىرلەپ كۇي توگىلدى, اسەرلى اڭگىمە ايتىلدى. اۋەلگى ءسوزدى بىرلەستىك جەتەكشىسى, ءانشى, ەلىمىزدىڭ ەڭبەك سىڭىرگەن ءارتىسى كەنجەعالي مىرجىقباي ايتتى.
«1996 جىلى الماتىداعى اباي اتىنداعى وپەرا جانە بالەت تەاترىنىڭ ءانشىسى بولىپ قىزمەت ىستەپ جۇرگەنىمدە گاسترولدىك ساپارمەن اقمولاعا باردىم. «دۆورەتس تسەليننيكوۆتە» جەكە كونتسەرتىمدى وتكىزىپ اۋداندارىن ارالاپ جۇرگەنىمدە 23 مامىردا تسيسي مەن پەداگوگيكا ينستيتۋتىن قوسىپ ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن قۇرۋ تۋرالى پرەزيدەنت جارلىعى شىقتى. ونىڭ رەكتورى بولىپ تاعايىندالعان امانگەلدى قۇسايىنوۆ جاڭادان قۇرىلعان ۋنيۆەرسيتەتتىڭ مۋزىكالىق فاكۋلتەتىنە ارنايى شاقىرىپ, مادەنيەت ءمينيسترى تالعات ماماشوۆقا مەنى ۋنيۆەرسيتەتكە اۋىستىرۋ جونىندە ءوتىنىش حاتىن جازىپ بەردى», دەدى كەنجەعالي مىرجىقباي.
وسى كەزدە اقمولاعا ءار سالانىڭ ۇزدىكتەرى قونىس اۋدارىپ, الماتىداعى زيالى قاۋىمدى تەرىسكەيگە شاقىردى. ۋنيۆەرسيتەتتەگى قازاق ادەبيەتى كافەدراسىنىڭ مەڭگەرۋشىسى بولىپ تاعايىندالعان ديحان قامزابەك ۇلى عالىمداردىڭ ىشىنەن العاشقىلاردىڭ ءبىرى بولىپ كوشىپ كەلىپ, رىمعالي نۇرعاليەۆ, سەيىت قاسقاباسوۆ, سەرىك نەگيموۆ, مىرزاتاي سەرعاليەۆ قاتارلى زيالى قاۋىم وكىلدەرىن جينادى. وسى كەزدە قىرىقتاعى تالانتتى ءانشى كەنجەعالي مىرجىقباي دا ءوز سالاسىنىڭ مىقتىلارىن جيناۋ كەرەك دەپ تۇيەدى. وبلىستىق فيلارمونيانىڭ ديرەكتورى ءارى كوركەمدىك جەتەكشىسى بولىپ تاعايىندالعان ول بىردەن جەر-جەردەن ونەرپازداردى ىزدەستىرەدى.
«كاسىبي مۋزىكالىق ءبىلىمى بار ماماندار وتە از, قالادا وتەتىن مادەني ءىس-شارالار مەن كونتسەرتتەردە حالىقتىق ونەرگە ورىن جوق. ۇلتتىق تالعامنان الىستاعان جەرگىلىكتى ەلدىڭ ءان مەن كۇيدى ۇعىنا المايتىندارى بەسەنەدەن بەلگىلى. سوندىقتان قالانى قازاقىلاندىرۋ ءۇشىن بىردەن ۇلت اسپاپتار وركەسترىن قۇرۋ ماسەلەسىن كۇن تارتىبىنە قويدىق. بولاشاق استانامىزعا ءبىرىنشى بولىپ كەلگەن ونەرپازداردىڭ ىشىندە دومبىراشى انار مۇزداحانوۆا مەن قوبىزشى ءجانار جۇسىپوۆا بولدى», دەدى كەنجەعالي مىرجىقباي.
كەزدەسۋ بارىسىندا ەكى ونەرپاز حالىق كومپوزيتورلارىنىڭ شىعارمالارى مەن قاتار وزدەرىنىڭ اۆتورلىق تۋىندىلارىن كەزەكتەسە توگىلتىپ ورىندادى. اتاپ ايتساق, انار مۇزداحانوۆانىڭ ۇلت ارداقتىسى مىرجاقىپ دۋلات ۇلىنىڭ رۋحىنا ارنالعان «ويان, قازاق!» كۇيى مەن جانار ءجۇسىپوۆانىڭ «اققۋ-قازدار» ءھام «تۇران» اتتى ءتول شىعارمالارى كوپشىلىك كوڭىلىن ءسۇيسىنتتى.
فيلولوگيا عىلىمدارىنىڭ دوكتورى, پروفەسسور سەرىك نەگيموۆ توقسانىنشى جىلداردىڭ تولعاقتارىندا ەلدىگىمىزدى بەكەمدەپ, ەڭسەمىزدى تىكتەگەن ونەر قايراتكەرلەرىن ەرەكشە اتاپ ءوتتى.
«حالىقتىڭ مادەني مۇراسىن ناسيحاتتاۋشىلار رەسمي ساحنالاردا عانا ەمەس, اۋىل ەڭبەككەرلەرىنە, شوپاندارعا, ەگىنشىلەرگە وزدەرى بارىپ كونتسەرت قويدى. وسىنداي ونەرپازداردىڭ ەرەن ەڭبەگى ارقاسىندا حالقىمىز ءوزىنىڭ ەگەمەندىگىن شىنايى سەزىندى. ولاردىڭ ىشىندە كوركەم ونەردىڭ كوگەرشىندەرى – انار مەن جاناردىڭ ۇلەسى زور. اسىرەسە, اقمولا وبلىسىنىڭ مادەنيەتىنە جاساعان جۇمىستارى ءۇشىن بۇل ونەرپازدار قانداي قۇرمەتكە دە لايىق», دەدى سەرىك نەگيموۆ.