كەگەن اۋىلىنداعى سادۋاقاس سەركەباەۆ اتىنداعى مەكتەپ-گيمنازيانىڭ دارىندى ۇستازى نۇربەك دوسىمحانوۆ «جىلدىڭ ۇزدىك مۇعالىمى – 2025» وبلىستىق بايقاۋىندا ارىپتەستەرىنەن وق بويى وزىپ, باس جۇلدە – اۆتوكولىكتىڭ كىلتىن يەلەندى. بۇل مەكتەپ ۇجىمى ءۇشىن زور جەتىستىك, ۇلكەن قۋانىشقا اينالدى.
جوعارى ءبىلىم العان سوڭ تۋعان اۋىلىنا تۋىن تىگىپ, وكشەلەي ءوسىپ كەلە جاتقان ۇرپاققا ءتالىمدى تاربيە, تەرەڭ ءبىلىم بەرۋدى وزىنە ماقسات ەتكەن نۇربەك كەرىمباي ۇلى العاشقى كۇننەن-اق ىركىلىسسىز ىزدەنىسپەن ەڭبەك ەتەدى. قاراسوزدىڭ قايماعىن قالقي سويلەيتىن شەشەندىگى مەن ىسكەرلىگى وقۋشىلاردىڭ بىلىمگە دەگەن ىنتاسىن وياتىپ قانا قويماي, ولاردىڭ ادەبيەتكە قىزىعۋشىلىعىن ارتتىرىپ, ساباق ۇلگەرىمدەرىنىڭ جاقسارا تۇسۋىنە وڭ اسەرىن بەرەدى. بىلىكتى پەداگوگ ۋاقىت كوشىنەن قالماي, وقىتۋدىڭ تىڭ ءادىس-تاسىلدەرىن قولدانا وتىرىپ, شاكىرتتەرىن جەتىستىككە جەتەلەيدى. ناتيجەسىندە, قازاق ءتىلى مەن قازاق ادەبيەتىنە قىزىعۋشىلىعى باسىم مەكتەپ وقۋشىلارى مەكتەپىشىلىكتەن باستاپ, اۋداندىق, وبلىستىق, ءتىپتى رەسپۋبليكالىق بايقاۋلاردىڭ جەڭىمپازدارى اتانىپ كەلەدى.
«بۇل مەنىڭ عانا ەمەس, جالپى ۇجىمنىڭ, وقۋشىلارىمنىڭ جەتىستىگى دەپ بىلەمىن. «جاقسى مۇعالىم – مەكتەپتىڭ جۇرەگى» دەپ الاش ارىسى احمەت بايتۇرسىن ۇلى ايتقانداي, مۇعالىم وزىنە جۇكتەلگەن جاۋاپكەرشىلىكتى جەتە سەزىنىپ, ەرىنبەي ەڭبەكتەنسە اسقار تاۋداي بيىكتەردى باعىندىرۋعا بولادى. مىسالى, بالانىڭ كىتاپ وقۋعا قۇلشىنىسىن وياتۋدىڭ ءتۇرلى تاسىلدەرىن پايدالانامىن. مەن ءۇشىن كىتاپ – بالالارعا دايىن اقپارات ەمەس, قيال الەمىنە اشىلعان پورتال. وقۋشىلاردى قىزىقتىرۋ ءۇشىن ءبىز كەيدە ءار وقىعان كىتاپتان كوميكس جاسايمىز. كەيىپكەرلەردىڭ بەينەسىن ولار ءوز قيالىمەن سالادى, سيۋجەت جەلىسىن قىسقا ديالوگكە اينالدىرادى. ءبىرى سۋرەت سالادى, ءبىرى ءسوز جازادى, ءبىرى بويايدى – ءبارى ورتاق ەڭبەككە قاتىسادى. وسىلايشا, كىتاپ قاعازدا عانا ەمەس, ولاردىڭ كوز الدىندا ء«تىرى» دۇنيە بولىپ شىعادى. ياعني وقۋشىلارعا كىتاپتى مىندەت ەمەس, ويىن, شىعارماشىلىق الاڭى رەتىندە كورسەتۋ الدەقايدا ءتيىمدى», دەيدى ۇشقىر ويلى ۇستاز.
بۇل سىندارلى ساتكە دەيىن دە بىرنەشە ساتىدان سۇرىنبەي وتكەن نۇربەك كەرىمباي ۇلى «جىلدىڭ ۇزدىك مۇعالىمى – 2025» بايقاۋىنا جولداما العاننان باستاپ ۇستازدىق جولدىڭ دارالىعىن, دانالىعىن, پاراساتتىلىعىن, شىعارماشىلىعىن, جاۋاپكەرشىلىگىن كورسەتۋگە بار كۇش-جىگەرىن جۇمىلدىرعان. ناتيجەسىندە, تىنىمسىز ەڭبەگى اقتالىپ, بايقاۋدىڭ باس جۇلدەسىن قانجىعاسىنا بايلادى.
جاس مامان كەزىنەن-اق اشىق ساباقتارىن اۋداندىق, وبلىستىق كولەمدە وتكىزىپ, تاجىريبەسىن تاراتقان دارىندى پەداگوگ بۇعان دەيىن دە تالاي بەلەستەردى باعىندىرعان. اتاپ ايتساق, وبلىستىق «ۇزدىك ءتىل مامانى», بەيسەن قۇرانبەك اتىنداعى جالپى ءبىلىم بەرۋ ۇيىمدارى پەداگوگتەرى اراسىنداعى وليمپيادانىڭ جۇلدەگەرى, ء«سوز شەبەرى» بايقاۋى, «ەسسە» بايقاۋلارىنىڭ جەڭىمپازى اتانعان.
تاجىريبەسى 15 جىلدان اسقان پەداگوگ زەرتتەۋشى نۇربەكتىڭ باستى قاعيداسى – بۇلاق كورسە, كوزىن اشۋ. وسى ماقساتتا تالانتتى شاكىرتتەر دايارلاۋدان تانباعان. سونىڭ ءبىرى, مەكتەپ ماقتانىشى ءسالىم بايان بيىل 11-سىنىپتى ءتامامدايدى. ول دا ۇستازىنان ۇلگى الىپ, قادىر مىرزا ءالى, مۇقاعالي وقۋلارىندا جەڭىمپازدار قاتارىنان كورىنگەن.
الماتى وبلىسى