ۇكىمەت ۇيىندە ۆيتسە-پرەمەر قانات بوزىمباەۆ دۇنيەجۇزىلىك بانك دەلەگاتسياسىمەن كەزدەستى. كەزدەسۋدە «ەنەرگەتيكا جانە كوممۋنالدىق سەكتورلاردى جاڭعىرتۋ» ۇلتتىق جوباسىن جۇزەگە اسىرۋدىڭ كەلەسى كەزەڭدەرى مەن تىكەلەي شەتەلدىك ينۆەستيتسيالاردى تارتۋدا بانكتىڭ اتقاراتىن ءرولى تالقىلاندى.
كەلىسسوزدەر بارىسىندا دۇنيەجۇزىلىك بانك وكىلدەرى قولجەتىمدى نەسيە قۇرالدارىن ۇسىندى. ولار قارجىلاندىرۋ شارتتارى مەن پايىزدىق مولشەرلەمەلەر تۋرالى اقپارات بەردى. «بايتەرەك» ۇلتتىق باسقارۋشى حولدينگى مەملەكەتتىك ورگاندارمەن بىرگە 2029 جىلعا دەيىنگى ءىرى جوبالار ءتىزىمىن ازىرلەپ جاتىر. بۇل جوبالار تولىق تالقىلاۋ جانە كەلىسۋ ءۇشىن دۇنيەجۇزىلىك بانككە جىبەرىلەدى.
تاراپتار سۋمەن جابدىقتاۋ مەن سۋ بۇرۋ جۇيەلەرىن دامىتۋ ماسەلەسىن دە قاراستىردى. ەلىمىزدە بىرنەشە ءىرى سۋ ارناسى زەرتتەلدى. سۋمەن جابدىقتاۋ جانە سۋ بۇرۋ قىزمەتتەرىن دامىتۋ بويىنشا جول كارتاسى دايىندالدى. دۇنيەجۇزىلىك بانك قارجىسى گيدراۆليكالىق جۇيەلەردى ورناتۋعا, سۋ ارنالارىن اۆتوماتتاندىرۋعا جانە تسيفرلاندىرۋعا جۇمسالماق. العاشقى جوبالار استانا, اقتاۋ, پەتروپاۆل, تالدىقورعان, سارىاعاش, تەكەلى جانە قوسشى قالالارىندا جۇزەگە اسادى.
الداعى ۋاقىتتا مەليوراتسيا جۇيەلەرىن, جىلۋ مەن ەنەرگەتيكالىق جەلىلەردى جاڭعىرتۋعا باعىتتالعان تاعى ەكى جول كارتاسى دايىندالادى. كەزدەسۋ سوڭىندا قانات بوزىمباەۆ دۇنيەجۇزىلىك بانككە العىسىن ايتتى. ول بانك توبىنىڭ ستراتەگيالىق ينفراقۇرىلىم نىساندارىن جاڭعىرتۋعا قاتىسۋعا دايىن ەكەنىن جوعارى باعالادى.