ۇلتتىق قۇرىلتايدىڭ بۋرابايدا وتكەن ءىV وتىرىسىندا مەملەكەت باسشىسى بىرقاتار ساراپشىلار مەن قوعام وكىلدەرىنىڭ ىشكى ساياسات سالاسىندا تۇجىرىمدامالىق قۇجات قابىلداۋ قاجەتتىگى جونىندەگى باستاماسىن قولدادى.
پرەزيدەنت اكىمشىلىگى جارتى جىلدان اسا ۋاقىت بويى ءتۇرلى ديالوگ الاڭدارىندا ۇلتتىق قۇرىلتاي مۇشەلەرىنىڭ, ساراپشىلاردىڭ, قوعامدىق جانە عىلىمي ۇيىم وكىلدەرىنىڭ قاتىسۋىمەن پىكىرتالاستار ۇيىمداستىردى.
ساراپشىلىق تالقىلاۋلاردىڭ ناتيجەسىندە ىشكى ساياسات سالاسىندا جۇرگىزىلىپ جاتقان جۇمىستى جۇيەلەيتىن تۇجىرىمدامالىق قۇجاتتىڭ جوباسى ازىرلەندى.
كەشە مەملەكەت باسشىسى «قازاقستان رەسپۋبليكاسى ىشكى ساياساتىنىڭ نەگىزگى قاعيداتتارى, قۇندىلىقتارى مەن باعىتتارىن بەكىتۋ تۋرالى» جارلىققا قول قويدى. ىشكى ساياسات سالاسىنداعى جۇمىستى جۇيەلەپ, ۇيلەستىرۋدى كوزدەيتىن قۇجات ءبىرىنشى كەزەكتە مەملەكەتتىك ورگاندارعا ارنالعان. سونىمەن قاتار بۇل قوعامعا جۇرگىزىلىپ وتىرعان مەملەكەتتىك ساياساتتىڭ يدەيالىق ءمانىن جانە ەلىمىزدىڭ بولاشاقتاعى بەينەسىنىڭ ايقىن باعىتىن تۇسىنۋگە مۇمكىندىك بەرەدى.
ەرلان قارين,
مەملەكەتتىك كەڭەسشى