پرەزيدەنت تاپسىرماسى اياسىندا كوكشەتاۋدا قايتارىلعان اكتيۆتەر قاراجاتى ەسەبىنەن جاڭا سپورت كەشەنى سالىنادى. ۇكىمەت وسى ماقساتتارعا ارناۋلى مەملەكەتتىك قوردان 12,6 ملرد تەڭگە ءبولدى.
سپورت كەشەنىندە وليمپيادالىق ستاندارتتىڭ سەرتيفيكاتتالعان قۇرالدارىمەن جابدىقتالعان بوكس, كۇرەس, اۋىر اتلەتيكا جانە كروسسفيتكە ارنالعان زالدار سالىنادى. بۇل كوكشەتاۋدا رەسپۋبليكالىق, الەمدىك دەڭگەيدەگى IBA جارىستارىن وتكىزۋگە مۇمكىندىك بەرەدى.
سپورت كەشەنىنىڭ اۋماعىندا ەكى فۋتبول الاڭى, يادرو مەن نايزا لاقتىرۋعا ارنالعان الاڭ, ويىن-جاتتىعۋ ايماقتارى, امبەباپ سپورت الاڭدارى, جەڭىل اتلەتيكا ايماعى ورنالاساتىن بولادى. حالىقتىڭ موبيلدىلىگى تومەن توپتارى ءۇشىن ارنايى قۇرال-جابدىقتار قاراستىرىلعان. بۇدان بولەك, ءورت-قولدانبالى سپورت تۇرلەرىنە ارنالعان سكالودروم مەن مۇناراسى بار امبەباپ سپورت زالىن اشۋ جوسپارلانىپ وتىر. مۇندا كاسىبي قۇتقارۋشىلاردى دايارلايتىن ازاماتتىق قورعاۋ اكادەمياسىنىڭ كۋرسانتتارى وزدەرىنىڭ كاسىبي داعدىلارىن ارتتىرا الادى.
مادەني-بۇقارالىق ءىس-شارالارعا ارنالعان زاماناۋي مۋلتيمەديالىق جۇيەلەرى بار 650 ورىندىق زال دا قولدانىسقا بەرىلەدى. نىساندا نەگىزگى قۇرىلىس جۇمىستارى اياقتالدى, ىشكى ارلەۋ, اباتتاندىرۋ جانە ينجەنەرلىك جەلىلەر جۇرگىزىلىپ جاتىر. نىساننىڭ جالپى دايىندىعى – 85%. وسى جىلدىڭ اياعىنا دەيىن پايدالانۋعا بەرۋ جوسپارلانعان.