2025 جىلعى 4 قاراشادا QS Quacquarelli Symonds جوعارى ءبىلىم بەرۋ سالاسىنداعى حالىقارالىق تالداۋ اگەنتتىگى QS Asia University Rankings 2026 – ازيانىڭ ەڭ ۇزدىك ۋنيۆەرسيتەتتەرى رەيتينگىنىڭ 2026 جىلعى ءتىزىمىن جاريالادى, دەپ حابارلايدى Egemen.kz عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
بۇل ايماقتىق رەيتينگ شىعىس, وڭتۇستىك-شىعىس, وڭتۇستىك جانە ورتالىق ازيا وڭىرلەرىندەگى ۋنيۆەرسيتەتتەردىڭ جەتىستىكتەرىن ساراپتايدى. بيىلعى رەيتينگ – ءوزىنىڭ تاريحىنداعى ەڭ اۋقىمدى رەيتينگ بولىپ وتىر, وعان 25 ەلدەن 1529 ۋنيۆەرسيتەت ەنگەن, ونىڭ ىشىندە 554 جوعارى وقۋ ورنى العاش رەت تىزىمگە كىردى.
ورتالىق ازيا ەلدەرى اراسىندا قازاقستان QS Asia University Rankings رەيتينگىندە قاتىسۋ اياسىن ايتارلىقتاي كەڭەيتتى – 112 ۋنيۆەرسيتەتتىڭ ىشىندە 44 قازاقستاندىق جوو ەندى. سالىستىرۋ ءۇشىن: وزبەكستاننان – 22 ۋنيۆەرسيتەت (204-تەن), قىرعىزستاننان – 6 ۋنيۆەرسيتەت (61-دەن), تاجىكستاننان 1 ۋنيۆەرسيتەت (27-دەن) ەنگەن.
اتاپ ءوتۋ كەرەك, بيىل رەيتينگكە 10 جاڭا قازاقستاندىق ۋنيۆەرسيتەت ەندى:
نازارباەۆ ۋنيۆەرسيتەتى – 201 ورىن الماتى مەنەدجمەنت ۋنيۆەرسيتەتى – 741-750 ورىندار مۇحامەدجان تىنىشباەۆ اتىنداعى ALT ۋنيۆەرسيتەتى – 1001-1100 ورىندار اباي مىرزاحمەتوۆ اتىنداعى كوكشەتاۋ ۋنيۆەرسيتەتى – 1101-1200 ورىندار Alikhan Bokeikhan University – 1201-1300 ورىندار كاسپي ۋنيۆەرسيتەتى – 1201-1300 ورىندار رۋدنىي يندۋستريالىق ينستيتۋتى – 1301-1400 ورىندار وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتى – 1301-1400 ورىندار Astana International University – 1401-1500 ورىندار سافي وتەباەۆ اتىنداعى اتىراۋ مۇناي جانە گاز ۋنيۆەرسيتەتى – 1401-1500 ورىندار.قازاقستاندىق ۋنيۆەرسيتەتتەر اكادەميالىق بەدەل, وقىتۋ ساپاسى, حالىقارالىق ىنتىماقتاستىق جانە تۇلەكتەردىڭ ەڭبەك نارىعىنداعى سۇرانىسى سياقتى رەيتينگتىڭ نەگىزگى كورسەتكىشتەرى بويىنشا ايماقتاعى ۇزدىك ناتيجەلەردىڭ ءبىرىن كورسەتىپ جاتىر.
«سونىمەن قاتار قازاقستان – ورتالىق ازيا ەلدەرى ىشىندە ازيانىڭ ەڭ ۇزدىك توپ-100 ۋنيۆەرسيتەتىنە كىرگەن جالعىز مەملەكەت: ءال-فارابي اتىنداعى قازاق ۇلتتىق ۋنيۆەرسيتەتى – 38-ورىن, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى – 61-ورىن, Satbayev University – 79-ورىن», - دەپ جازىلعان حابارلامادا.
قازاقستاننىڭ رەيتينگتەگى پوزيتسياسىنىڭ ءوسۋى اكادەميالىق ستاندارتتاردىڭ ارتۋىمەن قاتار حالىقارالىق ستراتەگيالىق سەرىكتەستىكتەردى دامىتۋدا جۇيەلى جۇمىسىنىڭ ناتيجەسىن كورسەتەدى. رەيتينگ دەرەكتەرى بويىنشا شەتەلدىك جەتەكشى ۋنيۆەرسيتەتتەردىڭ فيليالدارىن اشۋ جانە بىرلەسكەن ءبىلىم بەرۋ مەن عىلىمي جوبالارعا قاتىسۋ ەلدىڭ جوعارى ءبىلىم بەرۋ جۇيەسىنىڭ باسەكەگە قابىلەتتىلىگىن ارتتىرۋعا ىقپال ەتەدى.
قازىرگى تاڭدا رەيتينگكە ەنگەن 29 قازاقستاندىق جوو الەمنىڭ جەتەكشى ۋنيۆەرسيتەتتەرىمەن ستراتەگيالىق ارىپتەستىك ورناتقان, ال 15 جوعارى وقۋ ورنىندا شەتەلدىك ۋنيۆەرسيتەتتەردىڭ فيليالدارى جۇمىس ىستەيدى.
ينتەرناتسيوناليزاتسيا كورسەتكىشتەرى دە ەرەكشە نازار اۋدارادى. QS اگەنتتىگىنىڭ مالىمەتىنشە, قازاقستان حالىقارالىق ستۋدەنتتەر مەن زەرتتەۋشىلەر ءۇشىن ايماقتىق ءبىلىم ورتالىعىنا اينالىپ كەلەدى. بۇل ەل ۋنيۆەرسيتەتتەرىندە شەتەلدىك ستۋدەنتتەر مەن وقىتۋشىلاردىڭ ۇلەسىنىڭ جوعارى بولۋىمەن دالەلدەنەدى.
وسىلايشا, جوعارى وقۋ ورىندارىن ستراتەگيالىق سەرىكتەستىكتەر قۇرۋ ارقىلى ترانسفورماتسيالاۋ قازاقستاننىڭ جاھاندىق ءبىلىم كەڭىستىگىنە كىرىگۋىنىڭ نەگىزىنە اينالىپ, جوعارى ءبىلىم بەرۋ سالاسىنداعى مەملەكەتتىك ساياساتتىڭ تيىمدىلىگىن كورسەتىپ وتىر.
ايتا كەتسەك, QS اگەنتتىگى رەيتينگتى جىل سايىن كۇزدە جاريالايدى. اكادەميالىق كەزەڭ كۇزدە باستالاتىندىقتان اتاۋدا كەلەسى جىل كورسەتىلەدى جانە رەيتينگ كەلەسى كۇنتىزبەلىك جىل بويى وزەكتىلىگىن ساقتايدى.