بۇگىن استاناداعى «قازمەديا» ورتالىعىندا Astana Media Week 2025 فورۋمى باستالدى. 9 جىلدان بەرى ءدۇستۇرلى تۇردە ۇيىمداستىرىلىپ كەلە جاتقان شارا 7 قاراشاعا دەيىن جالعاسادى , دەپ جازادى Egemen.kz.
مەديااپتانىڭ العاشقى كۇنى «جاساندى ينتەللەكت پەن تسيفرلاندىرۋ كەزەڭىندەگى جۋرناليستيكانىڭ جاڭا باعىتتارى: قوعام سەنىمى جانە وركەندەۋ» اتتى پلەنارلىق سەسسيامەن اشىلدى. حالىقارالىق جانە وتاندىق مەديا كاسىبي ماماندارىن, مەديابيزنەس وكىلدەرى مەن مەملەكەتتىك ورگانداردى بىرىكتىرەتىن ماڭىزدى الاڭعا مادەنيەت جانە اقپارات ءمينيسترى ايدا بالاەۆا كەلىپ, فورۋم جۇمىسىنا تابىس تىلەدى.
«اقپارات باستى رەسۋرسقا اينالعان زاماندا ءبىزدىڭ وسىنداي باسقوسۋلارىمىزدىڭ ماڭىزى ەرەكشە. سەبەبى ءدال وسىنداي الاڭدا عانا ءبىز وزەكتى ماسەلەلەردى اشىق تالقىلاپ, قورىتىندى جاساپ, سونىڭ نەگىزىندە بيزنەس پەن مەملەكەتتىك باسقارۋ جۇيەسىنە قاتىستى ماڭىزدى شەشىمدەر قابىلداي الامىز. بۇگىندە قازاقستان كەڭىستىك پەن ۋاقىت توعىسىنداعى ەرەكشە كەزەڭدى باستان وتكەرۋدە. مەملەكەت, قوعام جانە مەديا ازاماتتاردىڭ سۇرانىسىنا ساي, ەلدىڭ الداعى دامۋىنىڭ زاماناۋي باعىت-باعدارىن ايقىنداپ كەلەدى. مەملەكەت باسشىسىنىڭ «ادىلەتتى قازاقستاندى» قۇرۋ ىسىندە وسىنداي ءوزارا بەكەم بايلانىس بەرىك ىرگەتاسقا اينالۋعا ءتيىس دەگەنى دە بەكەر ەمەس», دەدى ايدا بالاەۆا.
مينيستر Digital News Report زەرتتەۋىن نەگىز ەتىپ, قازاقستان ازاماتتارىنىڭ بۇقارالىق اقپارات قۇرالدارىنا دەگەن سەنىم دەڭگەيى ورتالىق ازياداعى باسقا ەلدەرمەن سالىستىرعاندا ايتارلىقتاي جوعارى ەكەنىن اتاپ ءوتتى. مۇنداي وڭ كورسەتكىشكە مەدياسالانى رەفورمالاۋ اياسىندا قول جەتكىزىلگەن. سونداي-اق قازاقستان وڭىردە العاشقىلاردىڭ ءبىرى بولىپ حالىقارالىق ستاندارتتارعا, سونىڭ ىشىندە Digital Services Act قاعيداتتارىنا نەگىزدەلگەن «ونلاين-پلاتفورمالار جانە ونلاين-جارناما تۋرالى» زاڭ قابىلداعان. جاڭا «ماسس-مەديا تۋرالى» زاڭ رەداكتسيالاردىڭ قۇقىقتىق مارتەبەسىن كۇشەيتىپ, جۋرناليستەردى قورعاۋ تەتىكتەرىن كەڭەيتكەن.
پلەنارلىق سەسسيادا مادەنيەت جانە اقپارات ۆيتسە-ءمينيسترى قانات ىسقاقوۆ, Euronews-ءتىڭ قازاقستانداعى بيۋرو جەتەكشىسى بويان بركيچ, Euronews حالىقارالىق ءتىلشىسى (فرانتسيا) دەنيس لوكتە, وزبەكستان ۇلتتىق مەديا قاۋىمداستىعى باس ديرەكتورىنىڭ ورىنباسارى سانجار ۋستابوبوەۆ, تۇركيا راديوتەلەۆيزيالىق كورپوراتسياسىنىڭ (تۇركيا) قازاقستانداعى وكىلدىگىنىڭ ديرەكتورى مەحمەد زاحيد چالىشكان جانە «جەتىنشى ارنا» تەلەارناسىنىڭ باس ديرەكتورى يلحام يبراگيموۆ ءسوز سويلەدى.
مەديا شارا ءارى قاراي «جۋرناليستيكا توعىسىندا: جاساندى ينتەللەكتى بار تسيفرلىق مەديانىڭ پايدا بولۋى» اتتى پانەلدىك سەسسيامەن جالعاستى.
الداعى ەكى كۇندە مەدياورتالىق حوللىندا Astana Media Week 2025 كونتەنت-ماركەتى وتەدى. بۇل – جاڭا فورمات, كوپرودۋكتسيالار جانە حالىقارالىق كووپەراتسيالار تانىستىرىلاتىن الاڭ. كونتەنت-ماركەت پروداكشن-كومپانيالار, ديستريبيۋتورلار جانە پلاتفورمالار اراسىندا ءوزارا ىسكەرلىك كەزدەسۋلەر وتكىزۋگە مۇمكىندىك بەرەدى. مۇندا قىرعىزستان, وزبەكستان, قىتاي مەن ەلىمىزدىڭ ىشكى جانە سىرتقى نارىقتارىنا ارنالعان جاڭا يدەيا مەن قاناتقاقتى جوبالار مەن بىرلەسكەن ءوندىرىس مۇمكىندىكتەرى ۇسىنىلادى.
ەل وڭىرلەرىنەن كەلگەن باق وكىلدەرى ۇشىن پلەنارلىق جانە پانەلدىك تالقىلاۋلار, جابىق پيتچينگ-سەسسيالار وتەدى. سالاداعى جەتەكشى ساراپشىلار پراكتيكالىق شەبەرلىك دارىستەرىن ۇيىمداستىرادى.