قازاقستاندا 1 جەلتوقساننان باستاپ جەكە تۇلعالارعا ارنالعان جاڭا اۆتوليزينگ باعدارلاماسى ىسكە قوسىلادى. بۇل تۋرالى ءماجىلىس دەپۋتاتى ولجاس قۇسپەكوۆ ءوزىنىڭ Instagram پاراقشاسىندا حابارلادى. جاڭا جۇيە كولىك الۋدىڭ بالاما جانە ىڭعايلى ءتاسىلىن ۇسىنادى, دەپ جازادى Egemen.kz.
ەندى ەل ازاماتتارى اۆتوكولىكتى ليزينگ ارقىلى راسىمدەپ, ونى بەلگىلى ءبىر مەرزىم پايدالانعاننان كەيىن تولىقتاي ساتىپ الۋ نەمەسە كومپانياعا قايتارىپ بەرۋ مۇمكىندىگىنە يە بولادى.
دەپۋتاتتىڭ ايتۋىنشا, جاڭا باعدارلاما قولدانىستاعى جەڭىلدەتىلگەن اۆتونەسيەلەۋ جۇيەسىن تولىقتىرىپ, حالىققا قوسىمشا مۇمكىندىك بەرەدى.
«كولىك ساتىپ الۋداعى قارجىلىق قيىندىقتار كوپشىلىككە تانىس. بارلىعىندا بىردەي قىمبات نەسيە الۋعا نەمەسە العاشقى جارنا ءۇشىن ۇزاق جىلدار بويى اقشا جيناۋعا مۇمكىندىك جوق», دەدى ولجاس قۇسپەكوۆ.
ليزينگ دەگەن نە؟
اۆتوليزينگ – بۇل ۇزاق مەرزىمدى جالداۋ ءتۇرى. ياعني ازامات بەلگىلى ءبىر مەرزىمگە (ادەتتە 2 جىلدان 5 جىلعا دەيىن) كولىكتى پايدالانۋ قۇقىعىنا يە بولادى جانە اي سايىن تولەم جاساپ وتىرادى. بۇل كەزەڭدە اۆتوكولىك ليزينگتىك كومپانيانىڭ مەنشىگىندە قالادى.
مەرزىم اياقتالعان سوڭ تۇتىنۋشى كولىكتى كومپانياعا قايتارىپ بەرە الادى, قالدىق قۇنى بويىنشا تولىقتاي ساتىپ الا الادى نەمەسە جاڭا شارت جاساپ, باسقا اۆتوكولىك الۋعا مۇمكىندىك الادى.
جالپى, اۆتوليزينگ – ساتىپ الۋ مەن جالعا الۋ اراسىنداعى ارالىق نۇسقا. تۇتىنۋشى كولىكتىڭ تولىق قۇنىن ەمەس, تەك ونى پايدالانۋ مەرزىمىنە جانە قۇنىنىڭ ازايۋىنا بايلانىستى تولەم جاسايدى.