اقتوبەدە الاياقتاردىڭ ارباۋىنا تۇسكەن زەينەتكەر ايەل بار جيعان-تەرگەنىنەن ايىرىلدى. بەيتانىس ادامدار ءوزىن مەملەكەتتىك ورگانداردىڭ وكىلى رەتىندە تانىستىرىپ, الداپ كەتكەن, دەپ حابارلايدى Egemen.kz.
پوليتسيانىڭ دەرەگىنشە, ەگدە جاستاعى ايەلگە WhatsApp ارقىلى ءوزىن «قازپوشتا» قىزمەتكەرىمىن دەپ تانىستىرعان ەر ادام حابارلاسىپ, سالەمدەمە كەلگەنىن ايتقان. ول زەينەتكەردەن جەتكىزۋ پروتسەسىن «راستاۋ» ءۇشىن تەلەفونىنا كەلگەن SMS-كودتى ايتۋىن سۇراعان.
بۇدان سوڭ ايەلگە وزدەرىن ادىلەت مينيسترلىگى مەن ۇلتتىق بانكتىڭ قىزمەتكەرلەرىمىز دەپ تانىستىرعان وزگە ادامدار قوڭىراۋ شالعان. ولار زەينەتكەردىڭ بانكتىك شوتتارىنا «الاياقتىق ارەكەتتەر جاسالۋى مۇمكىن» دەپ قورقىتىپ, اقشانى «قورعاۋ» ءۇشىن ءوز نۇسقاۋلارىن ورىنداۋدى وتىنگەن.
الاياقتاردىڭ سوزىنە سەنىپ قالعان ايەل پاتەرىن ساتىپ, جيناعان قاراجاتىن شەشىپ, ءتىپتى التىن اشەكەيلەرىن دە لومباردقا وتكىزگەن. زەينەتكەر بارلىعى 11 ميلليون تەڭگەدەن استام قارجىنى ولاردىڭ ەسەپشوتتارىنا اۋدارعان.
قازىر اتالعان فاكتى بويىنشا تەرگەۋ امالدارى ءجۇرىپ جاتىر. پوليتسيا قىزمەتكەرلەرى ازاماتتاردى, اسىرەسە ەگدە جاستاعى تۋىستارىن الاياقتاردىڭ ءتۇرلى ايلاسىنا الدانباۋعا شاقىرادى.