ءال-فارابي اتىنداعى قازاق ۇلتتىق ۋنيۆەرسيتەتىندە «AI-Art: بوياۋداعى بولاشاق» اتتى شىعارماشىلىق پلەنەر ۇيىمداستىرىلدى, دەپ حابارلايدى Egemen.kz.
ونەر سۇيەر قاۋىمنىڭ نازارىنا كاسىبي قىلقالام شەبەرلەرى مالىك قايداروۆ, قۇرمانعازى اقاشەۆ, ەرنات يمانباكيەۆ, نۇربولات تالعات ۇلى, ايدوس سەيداقۇل, مالىك جۇماعۇلوۆ, باقتيار بۇركىتباەۆ, تولەگەن سۇلەيمەنوۆ, سەرىك تاينوۆ, نۇرلان ساتاەۆ, سەرىك اعاتاەۆ, اقمارال قاجىبەك, پەريزات تاينوۆا, تۇرعىن ابدۋراحمان جانە باسقا دا سۋرەتشىلەردىڭ 30-عا جۋىق جۇمىسى ۇسىنىلدى.
مايلى بوياۋمەن سالىنعان تۋىندىلاردا ءال-فارابي اتىنداعى قازۇۋ-دىڭ جىلدىڭ ءتورت مەزگىلىندەگى كورىنىسى بەينەلەنگەن. ۋنيۆەرسيتەتتىڭ ساۋلەتتىك كەلبەتىمەن قاتار, ونىڭ رۋحاني ورتالىقتارى مەن وقۋ عيماراتتارى قامتىلعان.
كورمە جۇمىسىمەن تانىسقان قازۇۋ رەكتورى جانسەيىت تۇيمەباەۆ سۋرەتشىلەردىڭ تۋىندىلارىن جوعارى باعالاپ, مۇنداي مادەني جوبالاردىڭ جاستار اراسىندا ۇلتتىق قۇندىلىقتار مەن بەينەلەۋ ونەرىن دارىپتەۋگە جول اشاتىنىن اتاپ ءوتتى. سونىمەن قاتار ۋنيۆەرسيتەت قالاشىعىندا قىس-كوكتەم ايلارىندا دا پلەنەر ۇيىمداستىرۋ قاجەتتىگىن ايتتى.
«پلەنەرگە قاتىسۋشى سۋرەتشىلەر قازۇۋ-دىڭ كورىنىسىن جوعارى دەڭگەيدە بەينەلەگەن. بۇل تۋىندىلار وقۋ ورداسىنداعى 16 فاكۋلتەتكە جانە كىتاپحاناعا قويىلىپ, كوشپەلى كورمە جۇمىسى ۇيىمداستىرىلادى. سونداي-اق الداعى ۋاقىتتا قازۇۋ بازاسىندا قولونەر, سۋرەت ورتالىعىن اشۋ ماڭىزدى», دەدى رەكتور.
جاساندى ينتەللەكت تەحنولوگيالارىن شىعارماشىلىق سالادا قولدانۋدى ناسيحاتتاۋ, ستۋدەنتتەردىڭ تسيفرلىق ويلاۋ, ۆيزۋالدى ەكسپرەسسيا قابىلەتتەرىن دامىتۋ, سونداي-اق جاستاردىڭ يننوۆاتسيالىق الەۋەتىن ارتتىرۋدى ماقسات ەتكەن كورمەدە زاماناۋي تەحنولوگيا مەن ءداستۇرلى ونەر ۇيلەسىم تاپقانداي.
جاساندى ينتەللەكت داۋىرىندەگى قازۇۋ-دىڭ دامۋى مەن بولاشاقتاعى كەلبەتىن قىلقالام ارقىلى بەينەلەۋ, سونداي-اق جاساندى ينتەللەكت كومەگىمەن سۋرەت سالۋ كونكۋرسىن ۇيىمداستىرۋ ستۋدەنتتەردىڭ قىزىعۋشىلىعىن ارتتىرا ءتۇستى.
الماتى