Astana Hub-قا باردى

بەلارۋس رەسپۋبليكاسىنىڭ ۇكىمەتتىك دەلەگاتسياسى قازاقستانداعى تسيفرلىق يندۋستريانىڭ دامۋى, يننوۆاتسيالىق ستارتاپتار جانە GovTech شەشىمدەرىمەن تانىستى.

پرەزيدەنت قاسىم-جومارت توقاەۆتىڭ تسيفرلىق مەملەكەتتى جەدەل دامىتۋ جانە ەكونوميكانىڭ بارلىق سالاسىنا يننوۆاتسيالىق تەحنولوگيالاردى ەنگىزۋ جونىندە قويعان مىندەتى شەڭبەرىندە ۇكىمەت جۇيەلى جۇمىستار جۇرگىزۋدە. بۇگىنگى تاڭدا قازاقستان بۇۇ-نىڭ ونلاين قىزمەتتەر يندەكسى بويىنشا الەمدە 10-شى, ال تمد-دا 1-ورىندا, سونداي-اق جاھاندىق ەلەكتروندىق ۇكىمەتتى دامىتۋ يندەكسىندە 24-ورىندا تۇر. ەلىمىزدەگى مەملەكەتتىك قىزمەتتەردىڭ 90%-دان استامى ازاماتتارعا ونلاين رەجىمدە كورسەتىلەدى.

يننوۆاتسيالار ءۇشىن تارتىمدى ورتالىققا اينالعان Astana Hub الاڭىندا دەلەگاتسيا جاساندى ينتەل­لەكتىنى پايدالانۋ ارقىلى ءتۇرلى سالالاردا جۇزەگە اسىرىلاتىن وتاندىق ستارتاپتارمەن تانىستى. ولار – ەرەسەكتەر مەن بالالاردىڭ قاۋىپسىزدىگىن قامتاماسىز ەتۋدە – Aman, سپورتتىق اناليتيكانى دامىتۋدا – Mirai Tech, پيلوتسىز ۇشۋ تەحنولوگياسىن ازىرلەۋدە aDrone.kz جوبالارى. سونداي-اق ءبىلىم بەرۋدە TrustExam جانە Codiplay, دەنساۋلىق ساقتاۋدا Ascle جانە باسقا دا سالالاردا قولدانىلاتىن جي-ستارتاپتار ۇسىنىلعان. 2024 جىلى قازاقستانداعى IT-قىزمەتتەرىنىڭ ەكسپورتى 20%-دان استام ءوسىم كورسەتىپ,  880 ملن دوللاردان استى.

Peer-to-peer يننوۆاتسيالىق وقىتۋ جۇيەسى قولدانىلاتىن Tomorrow مەكتەبىنە بارعان كەزدە قازاقستاننىڭ جوعارى بىلىكتى IT مامانداردى دايار­لاۋ بويىنشا جۇرگىزىپ جاتقان جۇمىس­تارىنا نازار اۋدارتىلدى. جالپى, قازاقستاندا 500 مىڭعا جۋىق ازامات جاساندى ينتەللەكت نەگىزدەرىن وقىپ جاتىر.

ودان بولەك, بەلارۋس پرەمەر-مينيسترىنە تسيفرلىق كەڭسەنىڭ قىزمەتى جانە Egov Mobile, Egov Business, Smart Data Ukimet, جي-گە نەگىزدەلگەن ۇلتتىق پلاتفورما مەن تاعى دا باسقالاردىڭ تەحنولوگيالىق مۇمكىندىكتەرى تانىستىرىلدى. ولار – حالىق پەن بيزنەستىڭ ىڭعايلىلىعىنا, سونداي-اق مەملەكەتتىك ورگاندار جۇمىسىنىڭ تيىمدىلىگىنە باعىتتالعان.