جاردەمگە مۇقتاج جاندارعا جەڭىلدىك

الەۋمەتتىك وسال توپ­تارعا جاتا­تىن تۇلعالار بىرجول­عى زەينەتاقى تولەمدەرى تۇرىندە سالىق سالىناتىن تابىسقا ستاندارتتى سالىق شە­گەرىمدەرىن قولدانۋعا قۇ­قىلى. ولاردىڭ كوپشىلىگى تۇرعىن ۇيگە, ەمدەلۋگە بزت العان كەزدە جەكە تابىس سالىعىن (جتس) بىردەن تولەگەن. سونىمەن قاتار 2024 جىلعى 1 قاڭتاردان باستاپ مۇنداي تۇلعالاردىڭ بزت تۇرىندەگى سالىق سالىناتىن تابىسىنا ستاندارتتى سالىق شەگەرىمدەرى (882 اي­لىق ەسەپتىك كورسەتكىش شەگىن­دە) قولدانىلادى. بۇل وسى ساناتقا جاتاتىن الۋشىلار بزت العان كۇننەن باستاپ ءۇش جىل ىشىندە جتس قايتا ەسەپتەۋ مەن وتەۋدى قولدانۋ ءۇشىن بجزق-عا ءتيىستى وتىنىشپەن, راستايتىن قۇجاتتارمەن جۇگىنە الاتىنىن بىلدىرەدى. الايدا بزت-نى 2021–2022 جىلدارى العان ادامدار ءارتۇرلى سەبەپتەرمەن بۇل مۇمكىندىكتى پايدالانا المادى. ەندى سالىق كودەكسىنە وزگەرىستەر مەن تولىقتىرۋلاردىڭ ەنگى­زىلۋىنە بايلانىستى جەكە تۇلعالاردىڭ وسىنداي وتىنىش­تەرىنە بەلگىلەنگەن تالاپ قويۋ مەرزىمى 3 جىلدان 5 جىلعا دەيىن ۇلعايتىلدى.

جتس قايتارۋعا قۇقىعى بار جەكە تۇلعالاردىڭ تىزبە­سى قولدانىستاعى سالىق كو­دەكسىندە ايقىندالعان. بۇل ءبىرىنشى, ەكىنشى نەمەسە ءۇشىنشى توپتاعى مۇگەدەكتەر, مۇگەدەك بالالاردىڭ اتا-انالارىنىڭ نەمەسە قام­قور­شىلارىنىڭ ءبىرى, بالا اسىراپ الۋشىلاردىڭ ءبىرى, جەتىم بالالاردىڭ اسىراپ الۋشى اتا-انالارى, سوعىس ارداگەرلەرى, باسقا ساناتتار. مۇنداي ازا­مات­تاردىڭ تولىق تىزبەسى سالىق كودەكسىنىڭ 346-بابىندا كورسەتىلگەن.

بزت بويىنشا سالىق سالىناتىن تابىستى ايقىنداۋ كەزىندە ستاندارتتى سالىق شەگەرىمدەرى قولدانىلما­عان زەينەتاقى تولەمدەرىن الۋشىلار, ولاردى قولدانۋ قۇ­قىعى بولعان جاعدايدا, كىرىس­تەردى قايتا ەسەپتەۋ, جتس وتەۋ ءۇشىن ستاندارتتى سالىق شەگەرىمدەرىن قولدا­نۋعا وتىنىشپەن, راستايتىن قۇ­جاتتارمەن بجزق-نىڭ جاقىن جەردەگى فيليالىنا شۇعىل تۇردە جۇگىنۋى قاجەت.

ستاندارتتى سالىق شەگەرى­مى قولدانىلعاننان كەيىن, بۇعان دەيىن جتس ۇستالعان بولسا, ول الۋشىنىڭ جەكە زەي­نەتاقى شوتىنا قايتارىلادى. ەگەر جتس تولەۋ كەيىنگە قال­دى­رىلعان بولسا, وندا اي سايىنعى زەينەتاقى تولەم­دەرىن العان كەزدە ونى تولەۋگە قاتىستى مىندەتتەمە الىنىپ تاستالادى.

اتالعان وزگەرىس 2025 جىلعى 31 جەلتوقسانعا دەيىن (قوسا العاندا) قولدانىستا بولادى, سەبەبى 2026 جىلعى 1 قاڭ­تاردان باستاپ جاڭا سالىق كودەكسى كۇشىنە ەنەدى.