ەلىمىزدىڭ جەتەكشى قارجى ينستيتۋتى – Halyk Bank-ءتىڭ ماجوريتارلىق اكتسيونەرى «المەكس» حولدينگى ءوز ۇلەسىنىڭ ءبىر بولىگىن ساتۋ مۇمكىندىگىن قاراستىرىپ جاتىر. ساراپشىلاردىڭ پىكىرىنشە, بۇل شەشىم بانك وتىمدىلىگىن ارتتىرىپ قانا قويماي, وتاندىق كاپيتال نارىعىن جانداندىرۋعا دا اسەر ەتۋى مۇمكىن, دەپ جازادى Egemen.kz.
بۇگىندە «المەكس» حولدينگى بانكتىڭ 69,48 پايىز جاي اكتسياسىنا جانە 56,39 پايىز جالپى ۇلەسىنە يەلىك ەتەدى. ال The Bank of New York نومينالدى تۇردە 22,66 پايىز اكتسيانى ۇستاپ وتىر. بۇل شەشىم حالىقارالىق تاجىريبەدە ءجيى قولدانىلاتىن ءتاسىل – ەكىنشى رەتتىك اكتسيا ساتۋ ارقىلى وتىمدىلىكتى ارتتىرۋعا باعىتتالعان. ساراپشىلاردىڭ ايتۋىنشا, مۇنداي قادام جاڭا ينۆەستورلاردى تارتۋعا, بانكتىڭ كاپيتال نارىعىنداعى اينالىمىن كەڭەيتۋگە جانە قارجى ينستيتۋتىنىڭ بەدەلىن كۇشەيتۋگە جول اشادى.
2025 جىلدىڭ ماۋسىم ايىنداعى دەرەككە سۇيەنسەك, Halyk Bank اكتيۆتەرى 19,6 تريلليون تەڭگەگە جەتىپ, ەلدەگى ەڭ ءىرى كرەديتور مارتەبەسىن ساقتاپ وتىر. بانك 543 فيليال مەن بولىمشەدەن تۇراتىن كەڭ جەلىگە يە جانە ءوز قىزمەتىن گرۋزيا مەن وزبەكستاندا دا جۇزەگە اسىرىپ كەلەدى. بازالىق كاپيتالدىڭ جەتكىلىكتىلىك كوەففيتسيەنتى 18,1 پايىز دەڭگەيىندە قالىپتاسقان. بۇل بانككە تۇراقتى نەسيە ساياساتىن جۇرگىزۋگە جانە اكتسيونەرلەرگە تۇراقتى ديۆيدەند تولەۋگە مۇمكىندىك بەرەدى.
قارجى ساراپشىلارىنىڭ پىكىرىنشە, Halyk Bank اكتسيالارى بۇگىندە قازاقستان نارىعىنداعى ەڭ ءوتىمدى باعالى قاعازداردىڭ ءبىرى سانالادى. بانكتىڭ اشىق قارجىلىق ەسەپتىلىگى, تۇراقتى تابىستىلىعى جانە نارىقتاعى بەدەلى ينۆەستورلار سەنىمىن ارتتىرا تۇسەدى. ساراپشى نۇرلان ايدوسوۆتىڭ ايتۋىنشا, «مۇنداي شەشىم بانك ءۇشىن ستراتەگيالىق تۇرعىدان ءتيىمدى. ول تەك Halyk Bank-ءتىڭ وزىنە ەمەس, جالپى وتاندىق قور نارىعىنا سەرپىن بەرەدى».
ەكونوميستەر «المەكس» حولدينگىنىڭ بۇل باستاماسى قىسقا مەرزىمدى تابىسقا ەمەس, ۇزاقمەرزىمدى ينۆەستيتسيالىق تۇراقتىلىققا باعىتتالعانىن ايتادى. اكتسيالاردىڭ وتىمدىلىگىن ارتتىرۋ ارقىلى بانك كاپيتال نارىعىندا اشىق ءارى يكەمدى ويىنشى رەتىندە ءوزىنىڭ حالىقارالىق ءيميدجىن كۇشەيتە تۇسەدى. ساراپشىلار بۇل قادام قازاقستاننىڭ قارجى سەكتورىنداعى ينۆەستيتسيالىق احۋالدى جاقسارتۋعا جانە ەلدىڭ ەكونوميكالىق تارتىمدىلىعىن ارتتىرۋعا مۇمكىندىك بەرەدى دەپ ەسەپتەيدى.